Read La Bible en Malgache Isaia 30 Bible Online

Isaia 30 - La Bible en Malgache bible

Isaia 30

¹Lozan’ny zaza maditra! Hoy NY TOMPO. Manao tetikasa izy nefa tsy avy Amiko izany, ary manao fanekena izy nefa tsy avy amin’ny Fanahiko, ka ota anampy ota izany!

²Mandeha midina ho any Ejipta izy nefa tsy nanontany ny hevitro, hiery any amin’ny fiarovana mafin’ny farao sy hitady fialofana ao amin’ny alokalok’i Ejipta.

³Kanjo ho tonga henatra ho anareo ny fiarovana mafin’ny farao, ary ho fanalam-baraka anareo ny fialokalofanareo ao amin’ny alokalok’i Ejipta.

⁴Fa tonga any Zoana ireo lehibeny, ary tonga any Hanesa ny irany.

⁵Izy rehetra dia samy hahazo henatra noho ny amin’ny firenena tsy mahasoa azy, izay tsy manampy na mahasoa, fa mahatonga henatra sy latsa ho azy kosa.

⁶Ny loza hanjo ny behemota[10] any amin’ny Negeva. Any amin’ny tany feno fahoriana sy tebiteby, izay iavian’ny liom-bavy sy ny lion-dahy ary ny menarana sy ny dragona manidina, no nitondrany ny harenany teny an-damosin’ny boriky tanora, ary ny fananany teo amin’ny trafon’ny rameva, ho any amin’ny firenena tsy mahasoa azy akory!

⁷Zava-poana sy tsinontsinona mantsy ny famonjen’ny Ejiptiana; koa izany no niantsoako azy hoe: Rahaba[11] tsy mahefa na inona na inona!

⁸Avia ankehitriny, soraty izany, soraty amin’ny fafana eo anatrehany ary soraty amin’ny boky, mba haharitra amin’ny andro ho avy, ho vavolombelona mandrakizay doria.

⁹Fa firenena maditra izy, zanaka mpamadika, zanaka tsy mety mihaino ny lalànan’NY TOMPO,

¹⁰fa miteny amin’ny mpahita izy hoe: Aza mahita! Ary amin’ny mpaminany hoe: Aza maminany zavatra marina aminay, manaova teny malefaka aminay, maminania fitaka!

¹¹Mialà amin’ny lalana, mivilia amin’ny sakeli-dalana, atsaharo tsy ho eo anoloanay intsony ny Iray Masin’ny Israely!

¹²Koa izao no lazain’ny Iray Masin’ny Israely: Satria mandà izany teny izany ianareo sady matoky ny herisetra sy ny fiolakolahana ka miankina amin’izany,

¹³dia ho toy izao ity heloka ity eo aminareo: Tahaka izay mivava efa mila hianjera ka mivohitra amin’ny manda avo, ary ho tampoka dia tampoka no haharavany.

¹⁴Hopotipotehina tahaka ny fahapotipotiky ny vilanin’ny mpanefy tanimanga izy; homontsamontsanina tsy misy indrafo; ary tsy hisy vakiny ho tavela ka mbola ho azo angalana afo ao am-patana, na ho azo atao fangalan-drano ao an-davaka famorian-drano.

¹⁵Fa izao no lazain’ny Tompo, dia NY TOMPO, ny Iray Masin’ny Israely: Amin’ny fiverenana sy ny fitsaharana no hamonjena anareo, amin’ny fahanginana sy ny fahatokiana no hisian’ny herinareo. Nefa tsy nety ianareo!

¹⁶Fa hoy kosa ianareo: Tsia! Handositra an-tsoavaly izahay! Noho izany dia handositra tokoa ianareo. Hoy koa ianareo: Hitaingina ny haingam-pandeha izahay! Dia ho haingam-pandeha koa ny mpanenjika anareo.

¹⁷Handositra toy ny olona tokana ny arivo raha rahonan’ny olona iray; eny, handositra ianareo raha rahonan’ny dimy, mandra-pahatongan’ny sisa aminareo ho tahaka ny tsato-kazo avo any an-tampon’ny tendrombohitra sy tahaka ny faneva any amin’ny havoana.

¹⁸Koa mbola hiandry ny hamindrany fo aminareo NY TOMPO, ary mbola hisandratra Izy mba hiantra anareo. Fa Andriamanitry ny fahamarinana NY TOMPO; sambatra izay rehetra miandry Azy!

¹⁹Fa ianao ry firenena mitoetra ao Ziona* any Jerosalema, dia tsy hitomany intsony! Fa hamindra fo aminao tokoa Izy noho ny feon’ny fitarainanao; eny, raha vao reny izany dia hamaly anao Izy.

²⁰Homen’ny Tompo mofo ianao raha ory, ary rano raha malahelo; tsy hiery intsony ny Mpampianatra anao; hahita ny Mpampianatra anao ny masonao.

²¹Fa na mivily ho amin’ny ankavanana ianao, na mivily ho amin’ny ankavia, ny sofinao dia handre teny ao ivohonao hoe: Ity no lalana ka andehano.

²²Ary holotoinao ny takelaka volafotsy voapetaka amin’ny sarivongana sampinao sy ny takelaka volamena voapetaka amin’ny sampinao voarendrika; harianao tahaka ny maloto izany. Mialà amiko! Izany no holazainao aminy.

²³Hanome ranonorana ho an’ny masomboly izay nafafinao tamin’ny tany Izy, ary ny hanina vokatry ny tany dia sady ho tsara no mahavoky; ary amin’izany andro izany dia hihinana eny amin’ny tany malalaka ny ombinao.

²⁴Ny omby sy ny boriky tanora izay miasa ny tany dia hihinana vilona voaisy sira izay voatsikerakera amin’ny angady rovi-dela sy ny fikororohana.

²⁵Ary amin’ny andro lehibe famonoana, amin’ny fianjeran’ny tilikambo fiambenana, dia hisy lakandrano sy rian-drano hikoriana any an-tendrombohitra avo sy ny havoana manerinerina rehetra.

²⁶Ny hazavan’ny volana dia ho tahaka ny fahazavan’ny masoandro, ary ny hazavan’ny masoandro dia ho avo fito heny ka ho tahaka ny fahazavan’ny hafitoana, amin’ny andro hamehezan’NY TOMPO ny fahatorotoroan’ny olony, sy hanasitranany ny fery tamin’ny namelezana azy.

²⁷Indro, avy any lavitra any ny anaran’NY TOMPO, mirehitra ny fahatezerany sady mavesatra no mandrahona; feno hatezerana ny molony, ary tahaka ny afo mandevona ny lelany;

²⁸ny fofonainy tahaka ny riaka dia manafotra hatreny am-bozona; hanivana ny firenena amin’ny sivana fandevonana Izy; ho lamboridy mampivily eo amin’ny valanoranon’ny olona izany.

²⁹Ny hira hataonao dia ho tahaka ny amin’ny alina fankalazana ny andro firavoravoana; ny hafalian’ny fonao dia ho tahaka ny olona mandeha miaraka amin’ny feon-tsodina ho any amin’ny tendrombohitry NY TOMPO, any amin’ny Vatolampin’ny Israely.

³⁰Hanandratra ny feon’ny fiandrianany NY TOMPO ary hampiseho ny fiantefan’ny sandriny amin’ny fahatezerana mirehitra sy ny lelafo mandevona, amin’ny oram-baratra sy ny orana mivatravatra ary ny havandra vaventy.

³¹Fa noho ny feon’NY TOMPO dia ho raiki-tahotra ny Asiriana. Hokapohiny amin’ny tsorakazo ireo.

³²Isaky ny miantefa ny tsorakazo voatendry, izay amelezan’NY TOMPO azy, dia harahina ampongatapaka sy lokanga izany; ary amin’ny tanana misandratra no hiadiany aminy.

³³Fa efa voavoatra hatramin’ny taloha i Tofeta; eny, efa nataony vonona ho an’ny mpanjaka izy, natao lalina sady malalaka; ny fatany dia misy afo sy kitay betsaka; ary ny fofonain’NY TOMPO izay tahaka ny renirano solifara no mampirehitra azy.