Read La Bible en Malgache Isaia 31 Bible Online

Isaia 31 - La Bible en Malgache bible

Isaia 31

¹Lozan’izay midina any Ejipta hitady famonjena, sy izay miantehitra amin’ny soavaly ary matoky ny kalesy fitondra miady satria maro ireny, sy ny mpitaingin-tsoavaly satria mahery dia mahery ireny, fa tsy mibanjina ny Iray Masin’ny Israely, na mitady NY TOMPO!

²Izy anefa dia hendry ka mahatonga loza; tsy mba tsoahiny ny teniny; fa mitsangana Izy hamely ny mpianakavin’ny mpanao ratsy sy izay manampy ny mpanao heloka.

³Olona ihany ny Ejiptiana fa tsy Andriamanitra; nofo ihany ny soavaliny fa tsy fanahy. Koa rehefa atsotran’NY TOMPO ny tanany dia ho tafintohina izay manampy ary ho potraka izay ampiana, koa samy ho levona avokoa izy rehetra.

⁴Fa izao no nolazain’NY TOMPO tamiko: Tahaka ny fieron’ny liona sy ny liona tanora eo amin’ny rembiny, koa na dia betsaka aza ny mpiandry ondry voaantso hamely azy dia tsy matahotra ny feon’ireo izy, na mivarahontsana noho ny fihorakorahany, tahaka izany no hidinan’Andriamanitra, Tompon’izao rehetra izao, hiady ao amin’ny tendrombohitra Ziona* sy ny havoanany.

⁵Tahaka ny fandrakofan’ny vorona amin’ny elany no hiarovan’Andriamanitra, Tompon’izao rehetra izao, an’i Jerosalema; sady hiaro Izy no hamonjy; eny, sady hiantra no hanafaka.

⁶Koa miverena ho amin’Izay efa nikomianareo fatratra ry Zanak’Israely ô!

⁷Fa amin’izany andro izany dia harian’ny olona rehetra ny andriamanitra volafotsiny sy ny andriamanitra volamenany, izay fahotana nataon’ny tananareo.

⁸Ho lavo ny Asiriana, ho lavon’ny sabatra izay tsy mba an’olona; eny, sabatra izay tsy mba an’olombelona no handringanana azy; handositra ny sabatra izy ary hampanaovina fanompoana ny zatovony.

⁹Handositra noho ny tahotra ny mpanjakany ary hivadi-po eo anoloan’ny faneva ny mpanapaka eo aminy, hoy NY TOMPO, izay manana afo ao Ziona* sy fatana fandoroana ao Jerosalema.