Read La Bible en Malgache Isaia 32 Bible Online

Isaia 32 - La Bible en Malgache bible

Isaia 32

¹Indro, araka ny fahamarinana no hanjakan’ny mpanjaka, ary araka ny rariny no hitondran’ny manampahefana.

²Samy ho fierena amin’ny rivotra, ary ho fialofana amin’ny oram-baratra izy, ho lakandrano manondraka ny tany maina izy, ho alokalo-batolampy mandondona amin’ny tany karankaina.

³Tsy hikimpy ny mason’izay mahita ary hihaino ny sofin’izay mandre.

⁴Hahazo fahalalana ny fon’izay maimaika ary ny lelan’izay mikodedidedy dia hahay miteny haingana sy mazava.

⁵Ny adala dia tsy hantsoina intsony hoe andriana ary ny mpanambaka dia tsy holazaina hoe mahafoy be.

⁶Ny adala mantsy dia mbola miteny hadalana ihany ary mamoron-keloka ny fony mba hanaovany izay ratsy sy hitenenany ratsy NY TOMPO, ary hiraharahany ny kibon’ny noana sy hanakanany ny mangetaheta tsy hisotro rano.

⁷Ratsy ny hafetsen’ny mpanambaka; manao teti-dratsy izy hanimbany ny ory amin’ny teny lainga na dia manana ny rariny aza ny mahantra;

⁸Fa ny olo-mihaja kosa dia manana fikasana araka izay mahamendrika olo-mihaja ary izay mahamendrika olo-mihaja no ifikirany.

⁹Mitsangàna, ry vehivavy tsy manana ahiahy, ka henoy ny feoko! Ry zazavavy matokitoky foana, mihainoa ny teniko!

¹⁰Raha afaka herintaona mahery kely dia ho raiki-tahotra ianareo, ry vehivavy matokitoky foana; hifarana mantsy ny taom-piotazam-boaloboka ary tsy hisy akory ny fanangonam-boankazo.

¹¹Mangovita, ianareo vehivavy tsy manana ahiahy! Mangorohoroa, ianareo matokitoky foana! Endaho ny akanjonareo ka mitanjaha ary misikìna lamba fisaonana.

¹²Miteha-tratra izy fa malahelo ny saha mahafinaritra sy ny voaloboka vokatra.

¹³Ho rakotry ny tsilo sy ny anjavidy ny tanin’ny oloko; eny, hatrany amin’ny trano filalaovana rehetra any amin’ny tanàna miravoravo.

¹⁴Fa ho foana ny lapan’ny mpanjaka, hilaozana ny tanàna mitabataba; ho tonga zohy mandrakizay i Ofela sy ny tilikambo fiambenana; ho zary fikarenjen’ny borikidia sy firaofan’ny andian’ny ondry aman’osy.

¹⁵Mandra-pandrotsaka ny Fanahy ho amintsika avy amin’ny avo ka ny tany efitra dia ho tonga saha mahavokatra, ary ny saha mahavokatra dia hoheverina ho ala.

¹⁶Hitoetra any an-tany efitra ny rariny ary honina ao amin’ny saha mahavokatra ny fahamarinana.

¹⁷Fiadanana no ho vokatry ny fahamarinana, filaminana sy fandriampahalemana mandrakizay no asan’ny fahamarinana.

¹⁸Hitoetra ao amin’ny fonenana mandry fehizay ny oloko, ao amin’ny toerana mahatoky sy ao amin’ny fialan-tsasatra milamina.

¹⁹Nefa ho ripaka amin’ny filatsahan’ny havandra ny ala, ary hadaboka ambany dia ambany ny tanàna.

²⁰Sambatra ianareo izay mamafy eny amoron’ny rano rehetra sady mampiriaria ny omby sy ny boriky!