Read La Bible en Malgache Isaia 34 Bible Online

Isaia 34 - La Bible en Malgache bible

Isaia 34

¹Manatòna ianareo Jentilisa* mba handre! Mihainoa ianareo firenena! Aoka handre ny tany sy ny ao aminy rehetra, izao tontolo izao sy ny vokatra rehetra avy aminy!

²Fa ny fahatezeran’NY TOMPO dia amin’ny Jentilisa rehetra ary mirehitra amin’ny miaramilany rehetra ny fisafoahany; efa nodidiany hatao zavatra voaozona ireo ary natolony hovonoina.

³Izay voavono amin’ireo dia hariana ka hamofona ny hamaimbon’ny fatiny, ary hiempo ny tendrombohitra azon’ny rany.

⁴Ho levona ny tafiky ny lanitra rehetra ary hahorona tahaka ny fangorona taratasy ny lanitra; ny tafiny rehetra dia halazo tahaka ny falazon’ny ravina mihintsana avy amin’ny voaloboka, ary tahaka ny ravina malazo, mihintsana avy amin’ny aviavy.

⁵Fa ny sabatro dia mamo any amin’ny lanitra; indro, hidina ao amin’i Edoma izy sy amin’ny firenena voatendriko ho zavatra voaozona mba ho fitsarana azy.

⁶Feno ra ny sabatry NY TOMPO; eny, mihoso-menaka avy amin’ny matavy sy amin’ny ran’ny zanak’ondry sy ny osilahy ary amin’ny jabora fonom-boan’ny ondrilahy; fa misy fanatitra ataon’NY TOMPO ao Bozra, ary misy fandringanana be ao amin’ny tany Edoma.

⁷Miaraka aripaka aminy ny ombimanga mbamin’ny vantotra omby sy ny ombilahy ka vonton-dra ny taniny ary mihoso-menaka ny vovo-taniny.

⁸Fa andro famalian’NY TOMPO izany, taona famaliana hiadiana ho an’i Ziona*.

⁹Hovana ho tonga dity ny renirano any Edoma, ary ho solifara ny vovo-taniny; ho toy ny dity mirehitra ny taniny.

¹⁰Tsy hovonoina izany na alina na andro, ary hisavoana tsy mitsahatra ny setrony; ho tany karankaina hatramin’ny taranaka fara aman-dimby izy, tsy hisy handeha hamakivaky azy intsony mandrakizay mandrakizay.

¹¹Fa ho zaratanin’ny tararaka sy ny sokina izy. Hitoetra ao ny vorondolo lehibe sy ny goaika, ary hohenjanina eo aminy ny kofehy fandrefesan’ny fikorontanana sy ny fandrefesana marindranon’ny fahafoanana.

¹²Tsy hisy ho ao intsony ny lehibe hanendry izay ho mpanjaka, fa ho fongana ny mpanapaka rehetra ao aminy.

¹³Ho rakotry ny tsilo ny ao anatin’ny lapan’ny mpanjakany, songosongo sy voaroy no ho ao amin’ny manda fiarovany, ary ho fonenan’ny amboadia sy fitoeran’ny aotirisy izany.

¹⁴Hihaona amin’ny kary ireo mponina any an-tany efitra, hiantso ny namany ny osilahy; ary ilay biby mandehandeha amin’ny alina no hitoetra any ka hahita toeram-pialan-tsasatra ho azy;

¹⁵hanao ny lavany any ny bibilava ka hanatody sy hikotrika ary hifana ao amin’ny alokalony; any koa no hiangonan’ny papango, samy eo amin’ny namany avy.

¹⁶Tadiavo ny bokin’NY TOMPO ka vakio! Tsy misy tsy ao ireo na dia iray akory aza; tsy misy na dia iray akory aza hitady ny namany; fa ny vavan’NY TOMPO no nandidy izany, ary ny Fanahiny ihany no nanangona azy.

¹⁷Izy no nanendry anjara ho an’ireo ary ny tanany no nizara izany ho an’ireo tamin’ny kofehy fandrefesana. Handova izany mandrakizay ireo ka hitoetra ao hatramin’ny taranany fara aman-dimby.