Read La Bible en Malgache Isaia 35 Bible Online

Isaia 35 - La Bible en Malgache bible

Isaia 35

¹Ravoravo ny tany efitra sy ny tany karankaina, mibitaka ny tany ngazana sady mamony tahaka ny lisy;

²mamony be dia be izy; eny, mibitaka sy mihoby izy, homena azy ny voninahitr’i Libanona mbamin’ny hatsaran-tarehin’i Karmela sy i Saròna. Dia hahita ny voninahitry NY TOMPO sy ny famirapiratan’Andriamanitsika izy.

³Ampaherezonareo ny tanana miraviravy ary hatanjaho ny lohalika malemy;

⁴Lazao amin’izay mitebiteby hoe: Mahereza, aza matahotra, indro Andriamanitrareo! Avy mitondra famaliana Izy, dia ny famalian’Andriamanitra; eny, Izy tokoa no ho avy ka hamonjy anareo.

⁵Dia hampahiratina ny mason’ny jamba ary hampandrenesina ny sofin’ny marenina.

⁶Hitsambikina tahaka ny diera ny mandringa ary hihoby ny lelan’ny moana. Fa hisy rano hiboiboika any an-tany efitra ary hisy renirano any amin’ny tany karankaina.

⁷Ny tany ngazana dia ho tonga farihy, ary ny tany mangentana dia ho loharano miboiboika; ny fonenana izay amitsahan’ny amboadia dia haniry volotara sy zozoro.

⁸Hisy lalambe any, lalana voavoatra, izay hatao hoe lalan’ny fahamasinana. Tsy mba handia izany ny tsy madio; fa ho an’izay mandeha eo aminy kosa, na ny adala aza dia tsy ho diso lalana;

⁹tsy hisy liona ao sady tsy hiakaran’ny biby masiaka, tsy ho hita ao ireny fa ny olona navotana no handeha ao.

¹⁰Eny, hiverina ny navotan’NY TOMPO. Hankany Ziona* amin’ny fihobiana izy ireo, ary ny fifaliana mandrakizay no ho eny an-dohany; hahazo fifaliana sy faharavoravoana izy ka handositra ny alahelo sy ny fisentoana.