Read La Bible en Malgache Isaia 36 Bible Online

Isaia 36 - La Bible en Malgache bible

Isaia 36

¹Tamin’ny taona fahefatra amby folo nanjakan’i Hezekia mpanjaka dia niakatra hamely ny tanàna mimanda rehetra any Joda i Sankeriba mpanjakan’i Asiria ka nahazo azy.

²Ary naniraka an’i Rabsake mbamin’ny miaramila betsaka avy teo Lakisy hankany Jerosalema ho any amin’i Hezekia mpanjaka ny mpanjakan’i Asiria. Dia nitsangana teo anilan’ny lakandrano amin’ny kamory ambony izy, teo amin’ny lalambe mankany amin’ny sahan’ny mpanasa lamba.

³Dia nivoaka hitsena azy i Eliakima, zanak’i Hilkia, izay lehiben’ny tao an-dapa, sy i Sebna mpitantsoratra ary i Joa, zanak’i Asafa, mpitantsoratry ny raharaham-panjakana.

⁴Dia hoy i Rabsake tamin’ireo: Andeha, lazao amin’i Hezekia hoe: Izao no lazain’ny mpanjaka lehibe, dia ny mpanjakan’i Asiria: Inona moa izato itokianao?

⁵Teny foana, hoy aho, ny hoe: Manana saina sy hery hiady aho! Fa iza moa no itokianao ankehitriny no mikomy amiko ianao?

⁶Indro, matoky io tehina volotara torotoro io ianao, dia i Ejipta; nefa raha itehenan’olona io dia manindrona managorobaka ny tanany; eny, tahaka izany ny farao, mpanjakan’i Ejipta, amin’izay rehetra matoky azy.

⁷Fa raha hoy ianao amiko: NY TOMPO Andriamanitray no itokianay, moa tsy Azy va ny toerana fanaovana sorona mbamin’ny alitara izay noravan’i Hezekia, izay nilaza tamin’ny Joda sy i Jerosalema hoe: Eto anoloan’ity alitara ity no hiankohofanareo?

⁸Koa aoka ary hifaninana ianao sy ny tompoko, dia ny mpanjakan’i Asiria, fa homeko soavaly roa arivo ianao raha mahita olona hitaingina azy.

⁹Hataonao ahoana no fampiamboho ny mpitari-tafika iray amin’ny mpanompon’ny tompoko, na dia izay kely indrindra aza? Nefa i Ejipta no itokisanao hahazoanao kalesy fitondra miady sy mpitaingin-tsoavaly!

¹⁰Koa moa haitraitrako va izao niakarako izao? Tsia, fa NY TOMPO no naniraka ahy handrava ity tany ity ka niteny hoe: Miakara ho amin’izany tany izany ka ravao izy.

¹¹Dia hoy i Eliakima sy i Sebna ary i Joa tamin’i Rabsake: Miangavy anao aho, teny arameana no ataovy amin’ny mpanomponao, fa fantatray ihany izany, fa aza manao teny jiosy ho ren’ny olona eny ambonin’ny manda.

¹²Hoy anefa i Rabsake: Moa ho amin’ny tomponao sy ianao va no nanirahan’ny tompoko ahy hilaza izany teny izany, fa tsy ho amin’ny olona mipetraka eny ambonin’ny manda, izay voatery hihinana ny fivalanany sy hisotro ny fivalanan-dranony miaraka aminareo?

¹³Dia nijoro i Rabsake ka niantso tamin’ny feo mahery tamin’ny teny jiosy hoe: Henoy ny tenin’ny mpanjaka lehibe, dia ny mpanjakan’i Asiria!

¹⁴Izao no lazain’ny mpanjaka: Aza mety hofitahin’i Hezekia ianareo, fa tsy hahavonjy anareo izy tsy akory.

¹⁵Aza mety hasain’i Hezekia hatoky NY TOMPO ianareo amin’ny filazany hoe: Hamonjy antsika tokoa NY TOMPO! Tsy hatolotra eo an-tanan’ny mpanjakan’i Asiria tsy akory ity tanàna ity!

¹⁶Aza mihaino an’i Hezekia ianareo, fa izao no lazain’ny mpanjakan’i Asiria: Mihavàna amiko ianareo ka mankanesa atỳ amiko! Ary samia homana ny voalobony sy ny aviaviny avy ianareo, ary samia misotro ny rano avy amin’ny lavaka famorian-dranony

¹⁷mandra-piaviko hitondra anareo ho any amin’izay tany tahaka ny taninareo, dia tany misy vary sy ranom-boaloboka, tany misy mofo sy tanim-boaloboka.

¹⁸Aza mety hofitahin’i Hezekia ianareo amin’ny ilazany hoe: NY TOMPO no hamonjy antsika! Moa nisy nahavonjy ny taniny tamin’ny tanan’ny mpanjakan’i Asiria va ireo andriamanitry ny firenena ireo?

¹⁹Aiza moa ny andriamanitr’i Hamata sy i Arpada? Ary aiza koa ny andriamanitr’i Sefarvaima? Nahavonjy an’i Samaria tamin’ny tanako va ireo andriamaniny?

²⁰Iza moa amin’ny andriamanitra rehetra amin’ireo tany ireo no efa nahavonjy ny taniny tamin’ny tanako, koa aiza no hahafahan’NY TOMPO mamonjy an’i Jerosalema amin’ny tanako?

²¹Nangina anefa ny olona ka tsy nisy namaly azy na dia teny indraimbava akory aza, satria ny mpanjaka dia efa nandidy hoe: Aza misy mamaly azy.

²²Ary i Eliakima, zanak’i Hilkia, izay lehiben’ny tao an-dapa, sy i Sebna mpitantsoratra ary i Joa, zanak’i Asafa, mpitantsoratry ny raharaham-panjakana dia niditra nankao amin’i Hezekia rehefa avy nandriatra ny fitafiany, ary nitatitra taminy ny tenin’i Rabsake izy ireo.