Read La Bible en Malgache Isaia 37 Bible Online

Isaia 37 - La Bible en Malgache bible

Isaia 37

¹Nony nandre izany i Hezekia mpanjaka dia nandriatra ny fitafiany sady nitafy lamba fisaonana ka lasa niditra tao amin’ny tranon’NY TOMPO.

²Ary nirahiny ho any amin’Isaia mpaminany, zanak’i Amoza, i Eliakima, lehiben’ny tao an-dapa, sy i Sebna mpitantsoratra ary ny lehiben’ny mpisorona, izay samy nitafy lamba fisaonana.

³Izao no nampilazainy azy ireo: Izao no lazain’i Hezekia: Andro fahoriana sy famaizana ary fanalam-baraka ity andro ity; fa efa hivoaka ny kibon’ny reniny ny zaza nefa tsy misy hery hiterahana azy izy.

⁴Angamba ho ren’NY TOMPO Andriamanitrao ny tenin’i Rabsake, izay nirahin’ny mpanjakan’i Asiria tompony hihantsy an’Andriamanitra velona ka mba hovaliny izy noho ny teny izay efa ren’NY TOMPO Andriamanitrao. Koa manandrata vavaka ianao ho an’ireo izay mbola sisa.

⁵Dia nankany amin’Isaia ireo mpanompon’i Hezekia mpanjaka.

⁶Ary hoy Isaia taminy: Ambarao amin’ny tomponareo hoe: Izao no lazain’NY TOMPO: Aza matahotra ny teny renao, dia izay nanompan’iretsy mpanompolahin’ny mpanjakan’i Asiria iretsy Ahy.

⁷Fa indro, hanisy fanahy ao anatiny Aho, ary hahare vaovao izy ka hiverina ho any amin’ny taniny, dia hataoko lavon-tsabatra any amin’ny taniny izy.

⁸Dia niverina i Rabsake ka nankany Libna izay nataon’ny mpanjakan’i Asiria fahirano tamin’izay, satria reny fa efa niala tany Lakisy ny mpanjaka.

⁹Ary nandre vaovao mikasika an’i Tiraka mpanjakan’i Kosy i Sankeriba hoe: Avy hiady aminao izy. Nony nandre izany izy dia nandefa iraka ho any amin’i Hezekia ary niteny hoe:

¹⁰Izao no holazainareo amin’i Hezekia mpanjakan’ny Joda: Aza mety hofitahin’ny Andriamanitrao izay itokianao ianao, hoe: Tsy hatolotra eo an-tanan’ny mpanjakan’i Asiria i Jerosalema!

¹¹Indro, efa renao izay nataon’ireo mpanjakan’i Asiria tamin’ny tany rehetra, dia ny nanaovany ho zavatra voaozona azy; koa ianao indray va no ho voavonjy?

¹²Moa nahavonjy azy va ireo andriamanitry ny firenena noravan’ny razako, dia i Gozana, i Harana, i Rezefa ary ny taranak’i Edena izay tao Telasara?

¹³Aiza ny mpanjakan’i Hamata, ny mpanjakan’i Arpada, ny mpanjakan’ny tanànan’i Sefarvaima, i Henà ary Iva?

¹⁴Dia noraisin’i Hezekia tamin’ny tanan’ny iraka ny taratasy ka novakiny, dia niakatra nankao amin’ny tranon’NY TOMPO izy ka namelatra izany teo anatrehan’NY TOMPO.

¹⁵Ary nivavaka tamin’NY TOMPO i Hezekia hoe:

¹⁶Ry Andriamanitra, Tompon’izao rehetra izao ô, Andriamanitry ny Israely, izay mipetraka amin’ny kerobima*; Ianao dia Ianao ihany no Andriamanitry ny fanjakana rehetra ambonin’ny tany; Ianao no nanao ny lanitra sy ny tany.

¹⁷Atongilano ny sofinao, TOMPO ô, ka mihainoa! Ahirato ny masonao, TOMPO ô, ka mijere! Ary mihainoa ny teny rehetra izay nampitondrain’i Sankeriba hihantsy an’Andriamanitra velona!

¹⁸TOMPO ô, marina ihany tokoa fa ireo mpanjakan’i Asiria dia efa nandrava ny firenena rehetra sy ny taniny

¹⁹ary efa nariany tao anaty afo ny andriamaniny; tsy Andriamanitra akory mantsy ireny, fa asan’ny tanan’olona ihany, dia hazo sy vato, ka azony nosimbana.

²⁰Koa ankehitriny, RY TOMPO Andriamanitray ô, vonjeo amin’ny tanany izahay mba hahafantaran’ny fanjakana rehetra ambonin’ny tany fa Ianao irery ihany no TOMPO!

²¹Dia nandefa iraka Isaia zanak’i Amoza, hankany amin’i Hezekia hilaza hoe: Izao no lazain’NY TOMPO, Andriamanitry ny Israely: Ny amin’ilay fitarainana nataonao tamiko ny amin’i Sankeriba, mpanjakan’i Asiria,

²²dia izao no teny nolazain’NY TOMPO ny amin’i Sankeriba: Manao tsinontsinona sy mandatsalatsa anao i Ziona*, zanakavavy virijiny, mihifikifi-doha ao aoriananao i Jerosalema zanakavavy.

²³Fa iza no nohantsianao sy nompanao? Ary hanohitra an’iza no nanandratanao ny feonao? Nampiandrandra ny masonao any ambony ianao mba hanohitra ny Iray Masin’ny Israely!

²⁴Tamin’ny alalan’ny mpanomponao no nihantsianao ny Tompo ka hoy ianao: Tamin’ny kalesiko fitondra miady maro no niakarako tany an-tampon’ny tendrombohitra, tao afovoan’i Libanona; hokapaiko ny sedera avo sy ny kipreso voafantina, dia hiditra any amin’izay farany azo iakarana ao aho sy any amin’ny alany matevina.

²⁵Nihady lavaka Aho ka nisotro rano ary ny faladiako no handritako ny lakandrano rehetra any Ejipta.

²⁶Tsy mbola renao va fa hatry ny fony ela no nanaovako izany, ary hatramin’ny andro taloha no namolavolako izao? Ankehitriny dia nahatanteraka izany Aho. Koa ny anjaranao sisa dia ny handrava tanàna mimanda ho tonga korontam-bato.

²⁷Efa tsy nahatohitra ny mponina any, sady raiki-tahotra izy ireo no nangaihay; tahaka ny ahitra any an-tsaha sy ny ahi-maitso izy, tahaka ny ahitra eo amin’ny tampon-trano*, ary tahaka ny vary maty raha vao mitsiry.

²⁸Fa samy fantatro avokoa na mipetraka ianao na mivoaka hiady, na miverina avy niady, na mihetsiketsika hanohitra Ahy.

²⁹Satria mihetsiketsika hanohitra Ahy tokoa ianao ary efa tafakatra atỳ an-tsofiko ny fireharehanao, dia hasiako ny faraingoko ny oronao ary hopetahiko ny lamboridiko ny vavanao dia hampivereniko amin’ny lalana izay niavianao ianao.

³⁰Izao kosa no famantarana ho anao: Hihinana ny vokatry ny voa nihintsana ianareo amin’ity taona ity ary amin’ny taona manaraka dia ny kolokolon’izany. Fa amin’ny taona fahatelo kosa dia mamafaza ianareo ka mijinjà ary manaova tanim-boaloboka ka mihinàna izay vokatra avy aminy.

³¹Ary izay sisa ho tavela amin’ny taranak’i Joda dia mbola hamaka lalindalina kokoa sady hisondrotra hamoa.

³²Fa hisy sisa hivoaka avy ao Jerosalema ary ny sisa afaka avy ao amin’ny tendrombohitra Ziona*. Izany no hataon’ny fahasaro-piaron’Andriamanitra, Tompon’izao rehetra izao.

³³Noho izany dia izao no lazain’NY TOMPO ny amin’ny mpanjakan’i Asiria: Tsy ho tafiditra amin’ity tanàna ity izy, na handefa zana-tsipìka ho ato, na hitondra ampinga eo anoloany, na hanandratra tovon-tany hamelezany azy.

³⁴Ny lalana izay niaviany ihany no hiverenany fa tsy ho tafiditra amin’ity tanàna ity izy, hoy NY TOMPO

³⁵Fa hiaro ity tanàna ity Aho ka hamonjy azy noho ny amin’ny tenako sy i Davida mpanompoko.

³⁶Dia avy ilay Anjelin’NY TOMPO* ka namely olona dimy arivo sy valo alina sy iray hetsy tao amin’ny tobin’ny Asiriana; ary nony nifoha vao maraina ny olona dia hita fa indreo, efa maty avokoa ireo!

³⁷Dia niainga i Sankeriba, mpanjakan’i Asiria, ka lasa nody ary nitoetra tany Ninive.

³⁸Ary raha niankohoka tao an-tranon’i Nisroka andriamaniny izy dia nokapain’i Adrameleka sy i Sarezera zanany lahy tamin’ny sabatra; dia afaka nandositra ho any amin’ny tany Ararata izy mirahalahy; ary i Esara-Hadona zanany lahy no nanjaka nandimby azy.