Read La Bible en Malgache Isaia 38 Bible Online

Isaia 38 - La Bible en Malgache bible

Isaia 38

¹Tamin’izany andro izany dia narary saika maty i Hezekia; ary nankao aminy Isaia mpaminany, zanak’i Amoza, ka nilaza taminy hoe: Izao no lazain’NY TOMPO: Hafaro ny ankohonanao fa ho faty ianao fa tsy ho velona.

²Dia nitodika nankany amin’ny rindrina i Hezekia ka nivavaka tamin’NY TOMPO.

³Hoy izy: TOMPO ô, enga anie ka hotsarovanao ny nandehanako teo anatrehanao tamin’ny fahamarinana sy tamin’ny foko manontolo ary ny nanaovako izay tsara teo imasonao! Dia nitomany mafy indrindra izy.

⁴Dia tonga tamin’Isaia ny tenin’NY TOMPO hoe:

⁵Mandehana lazao amin’i Hezekia hoe: Izao no lazain’NY TOMPO, Andriamanitr’i Davida rainao: Efa reko ny fitarainanao ary efa hitako ny ranomasonao. Indro, hampiako dimy amby folo taona ny andronao.

⁶Hamonjy anao sy ity tanàna ity amin’ny tanan’ny mpanjakan’i Asiria Aho; hiaro ity tanàna ity Aho.

⁷Ary izao no ho famantarana ho anao avy amin’NY TOMPO, hahalalanao fa NY TOMPO hanatanteraka izay zavatra nolazainy:

⁸Indro, hampivereniko ambaratonga folo miaraka amin’ny masoandro ny aloka eo amin’ny famantaranandro aloka an’i Ahaza, eo amin’ilay efa nidinany iny. Dia niverina tokoa ny masoandro teo amin’ny ambaratonga folo izay efa nidinan’ny aloka.

⁹Ny teny nosoratan’i Hezekia, mpanjakan’ny Joda, raha narary izy ka sitrana tamin’ny aretiny:

¹⁰Hoy aho: Amin’izao andro mbola iadanako izao no tsy maintsy idirako amin’ny vavahadin’ny fitoeran’ny maty*. Nesorina tamiko ny androko sisa!

¹¹Hoy aho: Tsy mba hahita NY TOMPO intsony aho; eny, tsy mba hahita NY TOMPO ao amin’ny tanin’ny velona intsony aho; tsy mba hahita olona intsony aho, fa ho isan’ny mponina any amin’ny fitoeran’ny maty.

¹²Nesorina ny fonenako ka nafindra tsy ho amiko, tahaka ny tranolain’ny mpiandry ondry; ahoroko tahaka ny tenona ny androko, fa efa hotapahiny ho afaka amin’ny kofehy mihazona azy izy. Indray andro monja no anaperanao ny aiko!

¹³Nampangina ny foko aho mandra-paharain’ny andro; tahaka ny fanapatapaky ny liona taolana no anapatapahany ny taolako rehetra; indray andro monja no anaperanao ny aiko!

¹⁴Mikoraraika tahaka ny sidintsidina sy ny vano aho ary mitolokoloko tahaka ny voromailala. Reraka miandrandra ny avo ny masoko, TOMPO ô, ory loatra aho, aoka hiantoka ahy Ianao!

¹⁵Inona no holazaiko? Sady namaly ahy Izy no Izy ihany no nahatanteraka. Handeha am-panetren-tena aho amin’ny taonako sisa rehetra noho ny fahoriana mangidy mahazo ahy.

¹⁶Tompo ô, ny fahatsaranao no mahavelona, ary amin’izany tokoa no iainan’ny fanahiko ka manasitrana sy mamelona ahy Ianao.

¹⁷Indro, tonga fiadanana ilay fahoriana mangidy dia mangidy nanjo ahy. Ny fitiavanao no namonjenao ny fanahiko tsy hankany amin’ny lavaka mangitsokitsoka, fa narianao tao ivohonao ny fahotako rehetra.

¹⁸Fa tsy mba mahasaotra Anao ny fitoeran’ny maty, tsy mba mahadera Anao ny fahafatesana; ary izay midina any an-davaka dia tsy mahazo manantena ny fahamarinanao intsony.

¹⁹Ny velona, ny velona ihany no hidera Anao, tahaka ahy izao anio izao; hampahalala ny zanany ny fahamarinanao ny ray.

²⁰NY TOMPO efa namonjy ahy! Hitendry ny lokangako ao amin’ny tranon’NY TOMPO izahay amin’ny andro rehetra iainanay.

²¹Dia hoy Isaia: Makà mofo aviavy ary apetaho amin’ny vay izany mba ho sitrana i Hezekia.

²²Ary hoy i Hezekia: Inona no famantarana fa hiakatra ao amin’ny tranon’NY TOMPO aho?