Read La Bible en Malgache Isaia 39 Bible Online

Isaia 39 - La Bible en Malgache bible

Isaia 39

¹Tamin’izany andro izany no nampitondran’i Merodaka-Baladana, zanak’i Baladana, mpanjakan’i Babilona, taratasy sy fanomezana ho an’i Hezekia; reny mantsy fa narary izy ka sitrana.

²Faly noho izany i Hezekia ka nampiseho azy ny trano fitahirizany zava-tsoa, dia volafotsy, volamena, zavamanitra ary menaka tsara, sy ny trano fitahirizana ny fiadiany rehetra mbamin’izay rehetra tao amin’ny firaketany; tsy nisy zavatra tsy nasehon’i Hezekia azy, na ny tao an-tranony, na ny tao amin’ny fanjakany rehetra.

³Dia nankany amin’i Hezekia mpanjaka Isaia mpaminany ka niteny taminy hoe: Inona no nolazain’ireo olona ireo ary avy taiza no niaviany hankaty aminao? Ary hoy i Hezekia: Nankaty amiko avy tany an-tany lavitra izy, avy tany Babilona.

⁴Dia hoy Isaia: Koa inona avy anefa no hitany tato an-tranonao? Ary hoy i Hezekia: Izay rehetra ato an-tranoko dia hitany avokoa; tsy nisy zavatra tsy nasehoko azy ny ao amin’ny trano fitahirizana rehetra.

⁵Dia hoy Isaia tamin’i Hezekia: Henoy ary ny tenin’Andriamanitra, Tompon’izao rehetra izao!

⁶Indro, avy ny andro, koa hoentina any Babilona izay rehetra ao an-tranonao sy izay rehetra noharin’ny razanao ka voatahiry mandraka androany; eny, tsy hisy sisa hijanona na inona na inona, hoy NY TOMPO.

⁷Ary na dia ny naterakao aza dia hisy hoentiny koa ka ho ionoka any amin’ny lapan’ny mpanjakan’i Babilona ireo.

⁸Dia hoy i Hezekia tamin’Isaia: Tsara ny tenin’NY TOMPO izay nolazainao. Hoy koa izy: Eny, hisy fiadanana amin’ny androko ka handry fahalemana ny tany.