Read La Bible en Malgache Isaia 41 Bible Online

Isaia 41 - La Bible en Malgache bible

Isaia 41

¹Mangìna ianareo hihaino Ahy, ry nosy! Ary aoka hanavao ny heriny ny firenena; aoka hanatona izy ka hiteny! Andeha isika hifanatona eo amin’ny fitsarana.

²Iza no nanaitra avy any atsinanana ilay nomban’ny fahamarinana tamin’ny diany rehetra? Iza no nanolotra ny firenena ho eo anatrehany, ary nampietry mpanjaka? Iza no nanao ny sabany ho tahaka ny vovoka, sy ny tsipìkany ho tahaka ny mololo paohin’ny rivotra?

³Manenjika ireo izy ka mihoatra azy soa amantsara any amin’izay lalana tsy mbola nodiavin’ny tongony.

⁴Iza moa no nanao sy nahavita izany? Ilay miantso ny taranaka maro hatramin’ny taloha. Izaho TOMPO no voalohany, ary hatramin’ny farany dia mbola Izaho ihany no Izy.

⁵Nahita ny nosy ka raiki-tahotra. Toran-kovitra ny vazan-tany. Dia nanatona izy ireo ka tonga.

⁶Samy manampy ny namany avy izy rehetra, ary samy milaza amin’ny rahalahiny avy hoe: Mahereza!

⁷Koa ny mpahay taozavatra dia mampahery ny mpanefy volamena, ary izay mandama tamin’ny maritoa mampahery izay mively eo amin’ny riandriana, Ka hoy izy, miantso ny faninginana: Tsara ity! Dia homboany mafy tamin’ny fantsika ilay sampy mba tsy hihozongozona.

⁸Fa ianao kosa, ry Israely mpanompoko, ry Jakoba izay nofidiko, taranak’i Abrahama sakaizako!

⁹Ianao izay efa notantanako avy tany amin’ny faran’ny tany ary nantsoiko avy tany an-tsisiny ka nilazako hoe: Mpanompoko ianao, efa nofidiko ka tsy mba hariako!

¹⁰Aza matahotra ianao fa momba anao Aho; ary aza miherikerika foana fa Izaho no Andriamanitrao; mampahery anao Aho sady mamonjy anao; eny, mitantana anao amin’ny tanana ankavanan’ny fahamarinako Aho.

¹¹Indro, ho menatra sy hangaihay izay rehetra tezitra aminao; ho tonga tsinontsinona izy; eny, ho levona izay miady aminao.

¹²Hotadiavinao izay mifanditra aminao fa tsy ho hitanao; ho tahaka ny tsinontsinona sy ny zava-poana izay miady aminao.

¹³Fa Izaho TOMPO Andriamanitrao no mitantana ny tananao havanana, dia Ilay miteny aminao hoe: Aza matahotra, Izaho no hamonjy anao.

¹⁴Aza matahotra ianao, ry Jakoba kankana, dia ianareo, ry Israely olom-bitsy; Izaho no hamonjy anao, hoy NY TOMPO, Izaho Iray Masin’ny Israely no Mpanavotra anao.

¹⁵Indro, ataoko ragiragy vaovao misy nify maranitra ianao; hanosihosy ny tendrombohitra ianao ka hanorotoro azy ary hanao ny havoana ho tahaka ny akofa.

¹⁶Hikororoka azy ianao ka hopaohin’ny rivotra izy, ary hanely azy ny tafio-drivotra. Fa ianao kosa dia hiravoravo amin’NY TOMPO, ary ny Iray Masin’ny Israely no ho reharehanao.

¹⁷Mitady rano ny ory sy ny mahantra nefa tsy mahita, mainan’ny hetaheta ny lelany. Izaho TOMPO no hamaly azy, Izaho, Andriamanitry ny Israely, tsy hahafoy azy;

¹⁸Hampiboiboika renirano eny an-tampon-tanety mangadihady Aho, ary loharano eny afovoan’ny lohasaha; hataoko tonga farihy ny tany efitra ary ny tany karankaina ho loharano miboiboika;

¹⁹Hampaniry hazo sedera sy akasia, sy rotra ary oliva any an-tany efitra Aho, ary ny kipreso sy hazo kesika ary kirihitra dia hampiarahina eny amin’ny tany ngazana,

²⁰mba ho hitan’izy ireo sy ho fantany, ary hoheveriny sy ho azony an-tsaina fa ny tanan’NY TOMPO no nanao izany, ary ny Iray Masin’ny Israely no nahary azy.

²¹Alaharo eto ny teninareo, hoy NY TOMPO; asehoy izay fiarovan-tenanareo, hoy ny Mpanjakan’i Jakoba.

²²Aoka hanatona izy. Aoka hasehony amintsika izay zavatra mbola ho avy, nanao ahoana ny zavatra taloha, mba hosaininay ka ho fantatray izay hiafarany; na mba ilazao koa izay zavatra ho avy izahay.

²³Ambarao anay izay zavatra mbola ho avy rahatrizay, mba ho fantatray fa andriamanitra ianareo; eny, manaova soa na manaova ratsy, mba hitaha isika ka hiaraha-mahita.

²⁴Indro, tena tsinontsinona ianareo, ary ny asanareo dia tena naman’ny zava-poana; fahavetavetana ny nifidianana anareo.

²⁵Nanaitra olona iray avy tany avaratra Aho ka tonga izy. Avy any amin’ny fiposahan’ny masoandro no hiantsoany ny anarako; hanosihosy ny mpanapaka tahaka ny fanosihosy fotaka izy, tahaka ny mpanefy vilany mihosy tanimanga.

²⁶Iza no nanambara izany hatramin’ny voalohany, mba ho fantatray dieny mialoha ka hataonay hoe: Marina izany! Tsy nisy nanambara; eny, tsy nisy nilaza ary tsy nisy nandre ny teninareo.

²⁷Izaho no voalohany izay milaza amin’i Ziona* hoe: Indreo izy! Manome mpitondra teny soa mahafaly ho an’i Jerosalema Aho.

²⁸Dia nijery Aho, kanjo tsy nisy na iza na iza; eny, tsy nisy mpanolotsaina tamin’izy ireo ka tsy misy afaka hamaly Ahy raha manontany azy Aho!

²⁹Indro, zava-poana avokoa izy rehetra; tsinontsinona ny asany; rivotra sy zava-poana ny sampiny voarendrika.