Read La Bible en Malgache Isaia 43 Bible Online

Isaia 43 - La Bible en Malgache bible

Isaia 43

¹Fa ankehitriny, izao no lazain’NY TOMPO, izay nahary anao, ry Jakoba ô, sady namolavola anao, ry Israely ô: Aza matahotra ianao, fa efa nanavotra anao Aho. Efa niantso anao tamin’ny anaranao Aho, Ahy ianao!

²Raha mita ny rano ianao dia homba anao Aho; raha mita ny ony ianao dia tsy hanafotra anao izy; raha mandeha mamakivaky ny afo ianao dia tsy ho may, fa tsy handoro anao ny lelafo.

³Fa Izaho no TOMPO Andriamanitrao, dia ny Iray Masin’ny Israely, Mpamonjy anao; omeko ho fanavotana anao i Ejipta, ary ho solonao i Kosy sy i Seba.

⁴Satria sarobidy eo imasoko ianao, ary be voninahitra ianao sady tiako, dia olona no omeko ho solonao, ary firenena no ho solon’ny ainao.

⁵Aza matahotra fa momba anao Aho; hitondra ny taranakao avy any atsinanana Aho, ary avy any andrefana no hanangonako anao.

⁶Ny avaratra dia hilazako hoe: Omeo! Ary ny atsimo hoe: Aza hazonina! Alao ny zanako lahy avy lavitra sy ny zanako vavy avy any amin’ny faran’ny tany,

⁷dia izay rehetra antsoina amin’ny anarako sady nohariko ho voninahitro, dia izay novolavolaiko sy nataoko.

⁸Ento mivoaka ny olona jamba nefa mana-maso, ary ny marenina nefa manan-tsofina.

⁹Aoka hiangona ny firenena rehetra ary aoka hivory ny mponina! Iza tamin’izy ireo no nanambara izany? Iza tamin’izy ireo no nanambara tamintsika izay niseho taloha? Aoka hoentiny hanamarina azy ny vavolombelony! Ary aoka hohenoina ireo mba hiaiky hoe: Marina izany!

¹⁰Ianareo no vavolombeloko hoy NY TOMPO, sady mpanompoko izay nofidiko mba hahafantaranareo sy hinoanareo Ahy ka ho azonareo tsara fa Izaho no Izy; talohako dia tsy nisy andriamanitra voaforona, sady tsy hisy handimby Ahy.

¹¹Izaho dia Izaho ihany no TOMPO, ary tsy misy Mpamonjy afa-tsy Izaho.

¹²Izaho no nilaza sy namonjy ary nanambara, ary tsy nisy olon-kafa tao aminareo; koa ianareo no vavolombeloko, hoy NY TOMPO, ary Izaho no Andriamanitra.

¹³Eny, hatramin’izany andro izany dia Izaho no Izy, ary tsy misy maharombaka ny eto amin’ny tanako; miasa Aho ka iza moa no hahasakana izany?

¹⁴Izao no lazain’NY TOMPO Mpanavotra anareo, dia ny Iray Masin’ny Israely: Noho ny aminareo no nanirahako olona hiady amin’i Babilona, ary harendriko ireo mpandositra rehetra ireo, dia ireo Kaldeana izay mirebika any amin’ny sambony.

¹⁵Izaho no TOMPO, Iray Masinareo, Mpamorona ny Israely sady Mpanjakanareo.

¹⁶Izao no lazain’NY TOMPO, izay manao lalana eny amin’ny ranomasina sy lalan-kaleha eny amin’ny rano manonja,

¹⁷izay mamoaka ny kalesy fitondra miady sy ny soavaly, ny tafika sy ny lehilahy mahery. Miara-mandry avokoa izy ka tsy hiarina intsony. Mitsilopilopy izy ka maty toy ny lahin-jiro lany:

¹⁸Aza mahatsiaro ny lasa, na misaina ny taloha.

¹⁹Indro, efa hanao zava-baovao Aho, koa efa miposaka izany ankehitriny; tsy mahalala izany va ianareo? Eny, any an-tany efitra no hanaovako lalana ary any amin’ny tany ngazana no hasiako ony.

²⁰Dia hanome voninahitra Ahy ny bibidia sy ny amboadia ary ny aotirisy, satria manisy rano any an-tany efitra sy ony any amin’ny tany ngazana Aho mba hampisotroina ny oloko, dia ilay voafidiko.

²¹Izao vahoaka noforoniko ho Ahy izao no hanambara ny fiderana Ahy.

²²Nefa tsy mba Izaho no nantsoinao, ry Jakoba! Fa sasatra Tamiko ianao, ry Israely!

²³Tsy nitondranao ny zanak’ondry ho fanatitra dorana manontolo Aho. Tsy nataonao ho fanomezam-boninahitra Ahy ny fanatitrao; tsy nataoko raharaham-panompoanao ny fanatitra, na nanasatra anao tamin’ny ditin-kazo manitra Aho.

²⁴Tsy nandoa vola namidy veromanitra ho Ahy ianao, na nahavoky Ahy tamin’ny jaboran’ny fanatitrao; fa nampanompo Ahy tamin’ny fahotanao kosa ianao sady nanasatra Ahy tamin’ny helokao.

²⁵Izaho dia Izaho ihany no mamono ny fahadisoanao noho ny amin’ny tenako ary tsy hotsarovako intsony ny fahotanao.

²⁶Ampahatsiarovy Aho, koa avia isika hifandahatra; alaharo ary ny teninao, mba hahitana izay mahamarina anao.

²⁷Ny razambenao voalohany indrindra dia efa nanota ary efa nikomy Tamiko ireny mpitondra teninao ireny.

²⁸Koa izany no nandotoako ny mpanapaka ny fitoerana masina sy nanolorako an’i Jakoba ho zavatra voaozona ary Israely ho latsa.