Read La Bible en Malgache Isaia 44 Bible Online

Isaia 44 - La Bible en Malgache bible

Isaia 44

¹Mihainoa ankehitriny, ry Jakoba mpanompoko sy ry Israely izay nofidiko.

²Izao no lazain’NY TOMPO izay namorona anao, sy namolavola anao hatrany am-bohoka sady mamonjy anao: Aza matahotra, ry Jakoba mpanompoko, ary ianao, ry Jesoròna[12] izay nofidiko;

³fa handatsaka rano amin’izay mangetaheta Aho ary handefa riaka ho amin’izay tany karankaina; eny, handrotsaka ny Fanahiko amin’ny taranakao Aho ary ny fitahiako ho amin’ny naterakao.

⁴Dia haniry eny afovoan’ny ahitra ireny, tahaka ny hazomalahelo eny anilan’ny rano mandeha.

⁵Ny iray dia hilaza hoe: An’NY TOMPO aho! Ary ny iray dia hiantso ny anaran’i Jakoba. Ary ny iray koa dia hanoratra eo amin’ny tanany hoe An’NY TOMPO, ary hotononiny amim-panajana ny anarana hoe Israely.

⁶Izao no lazain’NY TOMPO, Mpanjakan’ny Israely, Mpanavotra azy, dia Andriamanitra, Tompon’izao rehetra izao: Izaho no voalohany ary Izaho no farany, koa tsy misy Andriamanitra afa-tsy Izaho.

⁷Ary iza moa no tahaka Ahy? Aoka izy hiteny mafy! Aoka izy hanambara sy handahatra Amiko izay niseho hatrizay nampitoerako ny firenena fony fahagola! Ary aoka hambarany koa izay zavatra ho avy sy mbola ho tonga.

⁸Aza matahotra na mangovitra ianareo; tsy efa nampandre anareo hatramin’ny fahiny va Aho ka nanambara taminareo? Eny, ianareo no vavolombeloko. Moa misy Andriamanitra afa-tsy Izaho va? Tsia, tsy misy Vatolampy, tsy mahafantatra Aho.

⁹Izay mamorona sarin-javatra voasokitra dia zava-poana avokoa; tsy mahasoa akory ny zavatra tiany indrindra; ireny no vavolombelony, sady tsy mahita ireny no tsy mahalala, koa hitsanga-menatra noho izany izy.

¹⁰Iza no namorona andriamanitra, na nanao sarin-javatra voarendrika izay tsy mahasoa akory?

¹¹Indro, ho menatra ny namany rehetra; fa ny mpahay taozavatra nanao ireny dia olona ihany; aoka hivory izy rehetra ka handroso; aoka ho raiki-tahotra sy ho menatra avokoa izy.

¹²Ny mpanefy vy dia mandoro ny fiasany tahaka ny famaky ao anaty vainafo ary manamboatra azy amin’ny maritoa; miasa azy amin’ny sandriny matanjaka izy; nefa noana izy ka ketraka ny heriny; tsy misotro rano izy ka reraka.

¹³Ny mpandrafitra dia manenjana ny kofehy sy manamarika azy amin’ny fanoratana; manamboatra azy amin’ny vankona izy, ary manamarika azy amin’ny fanoritam-paribolana; mahavita azy ho tahaka ny endrik’olona izy, tahaka ny hatsaran-tarehin’ny olona, mba hampitoerina ao an-trano.

¹⁴Mikapa hazo sedera izy ary maka hazo kipreso sy hazo oaka izay efa nitombo tany an’ala; mamboly hazo kesika izy ka ampanirin’ny ranonorana izany;

¹⁵Fanaovan’ny olona kitay izany ary analany hamindroany. Ampirehetiny izany mba hanendasany mofo sady anaovany andriamanitra ka ivavahany; eny, anaovany sarin-javatra voasokitra koa izany ka iankohofany.

¹⁶Ny antsasany amin’ilay hazo dia dorany amin’ny afo ka amin’io antsasany io no ahandroany ny hena hohaniny; manatsatsika hena izy ka voky; eny, mamindro izy ka miteny hoe: Aha! Mafana aho izany, nahita afo aho!

¹⁷Ny hazo sisa kosa dia amboariny ho andriamanitra, ho sarin-javatra voasokitra, dia miondrika sy miankohoka eo anatrehany izy ka mivavaka aminy hoe: Vonjeo aho, fa andriamanitro ianao!

¹⁸Tsy mahalala na mahafantatra ireny; fa voatampina ny masony ka tsy mahita, toy izany koa ny fony ka tsy mahalala.

¹⁹Tsy mieritreritra izy na mba manana fahalalana sy saina akory hitenenana hoe: Nodorako tamin’ny afo ny antsasany; eny, nanendy mofo tamin’ny vainafony aho: nanatsatsika hena aho dia nihinana; koa ny sisa dia hataoko fahavetavetana! Hiankohoka eo anatrehan’ny vatan-kazo aho!

²⁰Homan-davenona izy; voafitaka ny fony ka nampivily azy, tsy mahavonjy azy izy na mahalaza hoe: Moa tsy lainga va no eto an-tanako havanana?

²¹Tsarovy izany, ry Jakoba, dia ianao ry Israely, fa mpanompoko ianao; noforoniko ianao ka mpanompoko; tsy hohadinoiko ianao, ry Israely ô.

²²Efa nandevona ny fahadisoanao tahaka ny fandevona ny zavona Aho, ary ny fahotanao tahaka ny rahona; koa miverena Amiko fa efa nanavotra anao Aho.

²³Mihobia, ry lanitra, fa NY TOMPO no nanao izany! Manaova feo fifaliana ianareo, ry toerana lalina any ambanin’ny tany! Velomy ny hoby, ry tendrombohitra! Ary ianao ry ala mbamin’izay hazo rehetra ao! Fa NY TOMPO efa nanavotra an’i Jakoba sady mampiseho ny voninahiny eo amin’Israely.

²⁴Izao no lazain’NY TOMPO, izay nanavotra anao sady namolavola anao hatrany am-bohoka: Izaho no TOMPO izay manao ny zavatra rehetra, Izaho irery no manenjana ny lanitra; ny tenako ihany no mamelatra ny tany;

²⁵Manafoana ny fambara lazain’ny mpibedibedy Aho ary mahavery saina ny mpisikidy; mampihemotra ny olon-kendry Aho ka mampody ny fahalalany ho fahadalana.

²⁶Mahatò ny tenin’ny mpanompoko Aho ary manatanteraka ny saina atolotry ny irako. Miteny amin’i Jerosalema Aho hoe: Honenana ianao, ary amin’ireo tanànan’i Joda hoe: Hatsangana ianareo ka hamboariko izay rava.

²⁷Milaza amin’ny rano lalina Aho hoe: Aoka ho maina ianao; hataoko tankina ny oninao.

²⁸Ary milaza an’i Kirosy Aho hoe: Izy no mpiandry ondriko! Koa izay sitrako rehetra dia hotanterahiny; ary hiteny amin’i Jerosalema izy hoe: Hatsangana ianao! Ary amin’ny tempoly hoe: Haorina indray ianao.