Read La Bible en Malgache Isaia 45 Bible Online

Isaia 45 - La Bible en Malgache bible

Isaia 45

¹Izao no lazain’NY TOMPO amin’ny Voahosony, dia i Kirosy izay notantanako tamin’ny tanany havanana mba handreseko firenena eo anoloany sy hamahako ny fehikibon’ny mpanjaka, mba hamohako varavarana eo anoloany ka tsy hirindrina intsony ny vavahady:

²Handroso eo alohanao Aho ary handravona ny mikitoantoana sy hanorotoro ny varavarana varahina ary hanapatapaka ny hidy vy;

³dia homeko anao ny harena ao amin’ny maizina sy ny harena nafenina ao amin’ny mangingina, mba hahafantaranao fa Izaho no TOMPO izay miantso anao amin’ny anaranao, dia Andriamanitry ny Israely.

⁴Noho ny amin’i Jakoba mpanompoko sy Israely voafidiko no niantsoako anao tamin’ny anaranao sy nanomezako anarana malaza ho anao, na dia tsy nahafantatra Ahy aza ianao.

⁵Izaho no TOMPO fa tsy misy hafa. Tsy misy Andriamanitra afa-tsy Izaho; efa nampisikina anao Aho, kanefa tsy nahafantatra Ahy ianao,

⁶mba hahafantarana hatrany amin’ny fiposahan’ny masoandro ka hatrany amin’ny filentehany fa tsy misy afa-tsy Izaho: Izaho no TOMPO ary tsy misy hafa,

⁷dia Izaho izay mamorona ny mazava sy mahary ny maizina, manao ny fiadanana sy mahary ny loza; Izaho TOMPO no manao izany rehetra izany.

⁸Manateteva avy any ambony, ry lanitra, ary aoka ny habakabaka hampilatsaka ny fahamarinana! Aoka ny tany hisokatra mba ho vokatra avy amin’ireo ny famonjena, aoka hitsimoka miaraka amin’izay ny fahamarinana. Izaho TOMPO no efa nahatonga izany.

⁹Lozan’izay miady amin’ny namorona azy, tavim-bilany isan’ny tavim-bilany amin’ny tany ihany ireny! Ny tanimanga va hilaza amin’ny mpanefy azy hoe: Inona no ataonao? Na ny asanao va hiteny hoe: Tsy manan-tanana izy!

¹⁰Lozan’izay miteny amin’ny ray hoe: Inona no aterakao? Na amin’ny reny hoe: Inona no aloaky ny kibonao?

¹¹Izao no lazain’NY TOMPO, ny Iray Masin’ny Israely, dia ny namorona azy: Ny zavatra ho avy va no anontaniana Amiko? Ny zanako sy ny asan’ny tanako dia aoka ho adidiko ihany.

¹²Izaho no nanao ny tany sy nahary ny olona eo amboniny; ny tanako ihany no namelatra ny lanitra sy nandahatra ny eny aminy rehetra.

¹³Izaho no nanaitra azy io tamin’ny fahamarinana ary haravoko avokoa ny lalany rehetra; izy no hanangana ny tanànako ary havelany handeha ny oloko voababo, nefa tsy amim-bola amin-karena, hoy Andriamanitra, Tompon’izao rehetra izao.

¹⁴Izao no lazain’NY TOMPO: Ny vokatry ny fisasaran’i Ejipta sy ny tombom-barotr’i Kosy sy ny Sabeana, olona lava tsanganana, dia hafindra ao aminao ka ho anao. Dia hanaraka ao aoriananao ireo; avy aman-gadra izy ary hiankohoka eo anatrehanao sady hifona aminao hoe: Ato aminao tokoa Andriamanitra ary tsy misy afa-tsy Izy, zava-poana ireo andriamanitra tsy izy!

¹⁵Marina tokoa fa Ianao dia Andriamanitra miafina, ry Andriamanitry ny Israely sady Mpamonjy ô!

¹⁶Hitsanga-menatra sy hangaihay izy rehetra; eny, handeha aman-kenatra avokoa ny mpamorona sarin-javatra hivavahana.

¹⁷Fa hahazo famonjena mandrakizay avy amin’NY TOMPO kosa ny Israely. Tsy hitsanga-menatra na hangaihay mandrakizay mandrakizay ianareo.

¹⁸Fa izao no lazain’NY TOMPO, izay nahary ny lanitra, Izy no Andriamanitra izay namolavola ny tany ka nahavita sy nampiorina azy, tsy ho tany tsy misy endrika tsy akory no nahariany azy, fa novolavolainy mba honenana: Izaho no TOMPO, ary tsy misy hafa.

¹⁹Tsy tao amin’ny mangingina no nitenenako, na tao amin’ny toerana maizina amin’ny tany. Tsy nilaza tamin’ny taranak’i Jakoba aho hoe: Tadiavo any amin’izay tsy misy endrika Aho! Izaho TOMPO no miteny ny marina sy manambara ny mahitsy.

²⁰Mivoria ka avia ary miaraha manatona, ianareo Jentilisa sisa afaka! Tsy manam-pahalalana ireo izay mitondra ny hazo natao sarin-javatra voasokitra ka mivavaka amin’izay andriamanitra tsy mahavonjy.

²¹Ambarao ka asehoy mazava! Eny, aoka hiara-misaina izy ireo! Iza moa no nanambara izany hatrizay hatrizay? Iza no nilaza izany hatramin’ny fahiny? Tsy Izaho TOMPO va? Fa tsy misy Andriamanitra afa-tsy Izaho, dia Andriamanitra marina sady Mpamonjy; eny, tsy misy afa-tsy Izaho.

²²Mijere Ahy dia ho voavonjy ianareo, ry vazan-tany rehetra! Fa Izaho no Andriamanitra ary tsy misy hafa.

²³Ny tenako no nianianako, ny vavako no ivoahan’ny fahamarinana, teny tsy hiverina foana izany, dia ny hoe: Izaho no handohalehan’ny lohalika rehetra sy hianianan’ny lela rehetra hoe:

²⁴Ao amin’NY TOMPO ihany no voalaza fa misy fahamarinana sy hery; ka Izy ihany no hohatonin’ny olona amin-kenatra, dia ireo rehetra tezitra Aminy.

²⁵Ao amin’NY TOMPO no hanamarinana ny taranak’Israely rehetra sy hananany rehareha.