Read La Bible en Malgache Isaia 46 Bible Online

Isaia 46 - La Bible en Malgache bible

Isaia 46

¹Mangozohozo i Bela, miraika i Nebo[13]; ny sampiny dia nampitondraina ny biby folahina sy ny biby fiompy; ianareo no tokony hitondra izany nefa novesaranareo azy ka tonga enta-mavesatra entin’ny biby reraka!

²Miraika sy mangozohozo avokoa izy ireo ka tsy mahavonjy ny entana akory; fa na dia ny tenany aza dia lasan-ko babo koa.

³Mihainoa Ahy, ry taranak’i Jakoba sy izay sisa rehetra amin’ny taranak’Israely, ianareo izay noentina hatrany an-kibo sy notrotroina hatramin’ny vao teraka:

⁴Na dia mandra-pahantitrareo aza dia tsy miova Aho, ary mandra-pahafotsy volo anareo dia Izaho ihany no hisahirana hitondra anareo; Izaho no nanao ka Izaho ihany no hitrotro; eny, Izaho no hitondra sy hanafaka.

⁵Hampitovianareo amin’iza moa Aho, ary amin’iza no hanoharanareo Ahy? Iza no hataonareo ho tahaka Ahy mba hitahany Amiko?

⁶Mandraraka volamena avy ao an-kitapo izy sady mandanja volafotsy amin’ny mizana dia manakarama mpanefy volamena mba hanao izany ho andriamanitra hiankohofany sy hivavahany.

⁷Dia batainy iny ka entiny eny an-tsorony ary apetrany eo amin’ny fitoerany. Tsy mahay miala eo amin’ny fitoerany iny! Na dia misy mitaraina aminy aza dia tsy mahay mamaly izy na mahavonjy azy amin’ny fahoriany.

⁸Tsarovy izany ka misehoa ho lehilahy ianareo! Eritrereto tsara izany, ry mpikomy!

⁹Tsarovy ny zavatra taloha izay efa lasa ela; fa Izaho no Andriamanitra ka tsy misy hafa; Izaho no Andriamanitra ka tsy misy tahaka Ahy,

¹⁰izay manambara hatramin’ny voalohany ny zavatra ho avy any aoriana, ary nanambara hatramin’ny ela izay tsy mbola natao akory. Ilay miteny hoe: Ho to ny fikasako, ary hefaiko ny sitrapoko rehetra.

¹¹Miantso vorona mpihaza avy any atsinanana Aho, dia lehilahy avy any an-tany lavitra hahefa ny fikasako. Sady niteny izany Aho no mahatanteraka azy koa, sady nikasa Aho no mahefa azy.

¹²Mihainoa Ahy, ianareo tsy laitra anarina, izay lavitra ny fahamarinana!

¹³Hampanatoniko ny fahamarinako ka tsy ho lavitra intsony; ary tsy hitaredretra ny famonjeko. Fa hametraka famonjena ao Ziona* Aho ary ny voninahitro ho an’ny Israely.