Read La Bible en Malgache Isaia 47 Bible Online

Isaia 47 - La Bible en Malgache bible

Isaia 47

¹Midìna ka mipetraha amin’ny vovoka ry Babilona, zanakavavy virijiny! Mipetraha eo amin’ny tany, nefa tsy amin’ny sezafiandrianana, ry zanakavavin’i Kaldea! Fa tsy hatao hoe vehivavy malemilemy sy mihantahanta intsony ianao.

²Alaivo ny vato fikosoham-bary ka kosohy ny koba; esory ny fisalobonanao, akaro ny morontongotr’akanjonao; aoka hiseho ny fenao ka miroboha mita ny ony!

³Hiseho ny fitanjahanao; eny, ho hita ny fahamenaranao. Hitondra famaliana Aho ka tsy hisy olona hahasakana Ahy.

⁴Ny anaran’ny Mpanavotra anay dia Andriamanitra, Tompon’izao rehetra izao, Iray Masin’ny Israely.

⁵Mipetraha mangingina ka midira ao amin’ny maizina, ry zanakavavin’i Kaldea! Fa tsy hatao hoe Tompovavin’ny fanjakana intsony ianao.

⁶Tezitra tamin’ny oloko Aho, navelako holotoina ny lovako ka natolotro ho eo an-tananao izy; tsy mba namindranao fo izy, fa na ny antitra aza dia nasianao zioga tena mavesatra.

⁷Ary hoy ianao: Ho tompovavy mandrakizay aho! Tsy nandatsaka am-po izany zavatra izany ianao, na nitsapa izay hiafarany.

⁸Koa mihainoa ankehitriny, ianao izay mihantahanta sady mipetraka tsy manana ahiahy ka miteny anakampo hoe: Izaho no izy, ary tsy misy hafa! Tsy mba hipetraka ho mpitondratena aho, na hahita fahafoanan’anaka!

⁹Kanjo hanjo anao tampoka ireto zavatra roa ireto, ao anatin’ny indray andro monja, dia ny fahafoanan’anaka sy ny maha mpitondratena; hotanterahina aminao avokoa izany na dia maro aza ny sikidinao, ary na dia be dia be aza ny odinao.

¹⁰Fa nitoky tamin’ny faharatsianao ianao ka niteny hoe: Tsy misy mahita ahy! Nampivily anao ny fahendrenao sy ny fahalalanao ka niteny anakampo ianao hoe: Izaho no izy, tsy misy afa-tsy izaho.

¹¹Kanjo hanjo anao ny fahoriana nefa tsy ho fantatrao izay fiposahany; hahazo anao ny loza nefa tsy ho hainao sakanana; eny, hanjo anao tampoka ny fandringanana nefa tsy hampoizinao.

¹²Arosoy ary ny odinao sy ny hamaroan’ny sikidinao, izay efa nisasaranao hatry ny fony ianao mbola kely! Angamba hahazo soa ianao; angamba ho tonga mahatahotra ianao!

¹³Sasatra noho ny hamaroan’ny hevitrao ianao; ankehitriny, aoka hitsangana ka hamonjy anao ireo mpamantatra ny lanitra sy mpandinika ny kintana ireo, dia ireo mpanambara isaky ny tsinam-bolana izay zavatra ho tonga aminao.

¹⁴Indro fa ho tahaka ny mololo ireo: Ho main’ny afo izy ka tsy hahavonjy ny tenany amin’ny herin’ny lelafo; tsy misy vainafo hamindroana akory; eny, fa na afo hitaninana aza.

¹⁵Ho toy izany no hanjo ireo efa nisasaranao ireo, dia ireo nifampivarotra taminao hatry ny fony ianao mbola kely; samy hipariaka mandositra ho any amin’ny fonenany avy izy ka tsy hisy hahavonjy anao!