Read La Bible en Malgache Isaia 48 Bible Online

Isaia 48 - La Bible en Malgache bible

Isaia 48

¹Mihainoa, ry taranak’i Jakoba, dia ianareo izay antsoina amin’ny anaran’Israely sy avy amin’ny loharanon’i Joda, ianareo izay mianiana amin’ny anaran’NY TOMPO ary mahatsiaro ny anaran’Andriamanitry ny Israely, kanefa tsy araka ny marina na araka ny hitsiny!

²Fa milaza ny tenany ho avy amin’ny tanàna masina izy ka miankina amin’Andriamanitry ny Israely; Andriamanitra, Tompon’izao rehetra izao, no anarany.

³Ny zavatra taloha dia efa voalazako hatramin’ny fahiny; naloaky ny vavako izany sady nambarako; tampoka no nanaovako izany ary tanteraka ihany.

⁴Satria fantatro fa maditra ianao ka hoza-by ny hatokao, ary varahina ny handrinao,

⁵dia nambarako taminao hatramin’ny fahiny izany; eny, fony tsy mbola tonga aza izany dia efa nambarako taminao rahateo, fandrao hataonao hoe: Ny sampiko no nanao izany ary ny sarin-javatra voasokitra sy ny sarin-javatra voarendrika no nandidy izany.

⁶Efa renao ka jereo izany rehetra izany! Moa tsy hanambara izany va ianareo? Mampandre anao zava-baovao kosa Aho hatramin’izao, dia zavatra miafina izay tsy fantatrao.

⁷Vao izao no namoronana azy fa tsy hatramin’ny fahiny dia tsy mbola nandre azy ianao talohan’ny andro androany, fandrao lazainao hoe: Indro, ny efa fantatro ihany izany!

⁸Fa tsy nandre ianao na nahalala na inona na inona; eny, hatramin’ny fahiny aza no tsy mbola nisokatra ny sofinao. Fa fantatro fa tena mpivadika ianao sady nantsoina hoe mpikomy hatrany an-kibo.

⁹Noho ny anarako dia mampitony ny fahatezerako Aho; ary mba hiderana Ahy dia manindry fo ny aminao Aho mba tsy hamongorana anao.

¹⁰Indro, nodioviko ianao nefa tsy toy ny volafotsy; nizaha toetra anao tao amin’ny memin’ny fahoriana Aho.

¹¹Noho ny tenako; eny, noho ny tenako ihany no anaovako izany. Indrisy, lotoina ny anarako! Ny voninahitro dia tsy homeko ny hafa.

¹²Mihainoa Ahy, ry Jakoba, sy ry Israely izay nantsoiko! Izaho; eny, Izaho no voalohany ary Izaho koa no farany.

¹³Ny tanako no nanorina ny fanambanin’ny tany, ny tanako ankavanana no namelatra ny lanitra; rehefa antsoiko ireo dia indray miseho avokoa.

¹⁴Mivoria ianareo rehetra ka mihainoa! Iza amin’ireny moa no mba efa nanambara izany? Ilay tian’NY TOMPO no hahefa ny sitrapony amin’i Babilona ary ho amin’ny Kaldeana ny sandriny.

¹⁵Izaho dia Izaho ihany no miteny sady miantso azy, nitondra azy Aho ka hambinina ny lalany.

¹⁶Manatòna Ahy ianareo ka mihainoa! Hatramin’ny taloha no efa tsy nitenenako tamin’ny mangingina, hatry ny fony vao nisian’ireo zavatra ireo dia teo Aho. Ary ankehitriny, NY TOMPO Andriamanitra no naniraka Ahy miaraka amin’ny Fanahiny.

¹⁷Izao no lazain’NY TOMPO Mpanavotra anao, dia ny Iray Masin’ny Israely: Izaho, TOMPO Andriamanitrao, no nampianatra anao mba hahitanao soa sady mitarika anao amin’ny lalana tokony halehanao.

¹⁸Toy izay anie ianao mba nihaino ny didiko! Dia ho tonga tahaka ny ony ny fiadananao ary ho tahaka ny onjan-dranomasina ny fahamarinanao;

¹⁹ho tahaka ny fasika ny taranakao ary ho tahaka ny sombim-pasika ny aloaky ny kibonao; tsy ho tapaka na ho foana eo anatrehako ny anarany.

²⁰Mivoaha hiala any Babilona; mandosira avy any amin’ny Kaldeana! Torio amin’ny feo mahafaly ary ambarao, aelezo hatrany amin’ny faran’ny tany ka lazao hoe: NY TOMPO efa nanavotra an’i Jakoba mpanompony!

²¹Tsy nangetaheta ireo tamin’ny nitondrany azy tany an-tany efitra; nampiboiboika rano ho azy avy tamin’ny vatolampy Izy; eny, nampitresaka ny vatolampy Izy dia nigororoana ny rano.

²²Tsy misy fiadanana ho an’ny ratsy fanahy, hoy NY TOMPO.