Read La Bible en Malgache Isaia 5 Bible Online

Isaia 5 - La Bible en Malgache bible

Isaia 5

¹Avelao aho hihira ho an’ny malalako, dia ny hiran’ny malalako ny amin’ny tanim-boalobony. Ny malalako dia nanana tanim-boaloboka teo amin’ny havoana lonaka.

²Nasainy io ka nesoriny ny vato dia novoleny karazam-boaloboka tsara; nanao trano fiambenana teo afovoany Izy ary nandavaka famiazam-boaloboka teo. Dia nanantena azy hamoa voaloboka tsara Izy, kanjo namoa voalobo-dratsy io.

³Noho izany, ry mponina any Jerosalema sy ry lehilahy amin’ny Joda, miangavy anareo aho, tsarao Aho sy ny tanim-boaloboko!

⁴Inona moa no mbola azo natao tamin’ny tanim-boaloboko ka tsy efa nataoko taminy? Koa raha nanantena azy hamoa voaloboka tsara Aho, nahoana no namoa voalobo-dratsy izy?

⁵Koa ankehitriny, aoka hambarako anareo izay hataoko amin’ny tanim-boaloboko. Hesoriko ny fefy tsilony ka holevonina izy; harodako ny fefy vatony ka ho voahitsakitsaka izy;

⁶Hataoko simba tanteraka izy: Tsy hohetezana ny sampam-boalobony ary tsy hohevoina izy fa ho rakotry ny anjavidy sy ny tsilo. Ary hodidiako ny rahona tsy hampilatsaka ranonorana aminy.

⁷Fa tanim-boalobok’Andriamanitra, Tompon’izao rehetra izao, ny taranak’Israely, ary ny lehilahy amin’i Joda no voly tiany. Dia nanantena fitsarana marina Izy, kanjo indro, heloka be vava! Niandry fahamarinana Izy, kanjo indro, fitarainana!

⁸Lozanareo izay manampy trano amin’ny trano sady manampy saha amin’ny saha ambara-paha tsy hisy hitoeran’ny sasany intsony! Fa ianareo irery no monina eo amin’ny tany!

⁹Izao no ren’ny sofiko tamin’Andriamanitra, Tompon’izao rehetra izao: Marina tokoa fa ho foana ny trano maro; eny, na dia izay lehibe sady tsara aza dia tsy hisy mpitoetra.

¹⁰Bata* iray monja no ho vokatry ny tanim-boaloboka folo zemeda[1], ary eran’ny efaha* monja no ho vokatry ny masomboly eran’ny homera.

¹¹Lozan’izay mifoha vao maraina ka mitady toaka, izay miboboka mandra-paharivan’ny andro ka ampirehetin’ny divay!

¹²Ny lokanga sy ny valiha, ny ampongatapaka sy ny sodina ary ny divay no foto-panasany; nefa tsy mba jereny ny asan’NY TOMPO, ary tsy mba hitany ny asan’ny tanany.

¹³Vokatr’izany dia ho lasan-ko babo ny oloko noho ny tsy fahalalany; ho mosarena ny olona ambony ary ho mainan’ny hetaheta ny valalabemandry.

¹⁴Koa izany no mampitanatana vava ny fitoeran’ny maty* hanao teli-moka an’i Jerosalema; any no hivarinan’ny olo-manankajany sy ny valalabemandriny ary ny tabatabany mbamin’ny fifaliany.

¹⁵Hatao mitanondrika ny zanak’olombelona ary haetry ny olona; ny mason’ny miandranandram-pijery dia haidina.

¹⁶Fa Andriamanitra, Tompon’izao rehetra izao, no hisandratra amin’ny fitsarany marina, ary Andriamanitra masina dia hiseho ho masina amin’ny fahamarinana.

¹⁷Hiraoka ahitra toy ny eny amin’ny tany fiandrasana azy ihany ny zanak’ondry, ary any an-tany foana no hipetrahan’ny ondry matavy ka mpirenireny no hiandry ondry ao.

¹⁸Lozan’izay mitari-keloka amin’ny kofehin’ny famitahana, ary mitarika ota toy ny amin’ny mahazakan-tsarety

¹⁹sady miteny hoe: Aoka hohafainganiny sy hododonany ny asany mba ho hitantsika! Ary aoka hanakaiky sy ho tanteraka izay kasain’ny Iray Masin’ny Israely ka ho fantatsika!

²⁰Lozan’izay milaza ny ratsy ho tsara ary ny tsara ho ratsy, izay manao ny maizina ho mazava ary ny mazava ho maizina, izay manao ny mangidy ho mamy ary ny mamy ho mangidy!

²¹Lozan’izay manao azy ho hendry sy mihevi-tena ho manan-tsaina!

²²Lozan’izay raindahiny amin’ny fisotroan-divay sy mahery amin’ny fampiharoharoana karazan-toaka!

²³Manamarina ny meloka noho ny kolikoly izy sady manala ny rariny amin’ny marina!

²⁴Koa toy ny fandevon’ny lelafo ny mololo sy toy ny fihalevonan’ny bozaka midedadeda no hahalovan’ny fotony sy hijofoan’ny voniny tahaka ny vovoka, satria efa nandà ny lalànan’Andriamanitra, Tompon’izao rehetra izao, izy sy nanamavo ny tenin’ny Iray Masin’ny Israely.

²⁵Koa izany no irehetan’ny fahatezeran’NY TOMPO amin’ny olony sy anaingany ny tanany aminy ka amelezany azy; dia mihorohoro ny tendrombohitra, ary ny fatin’ny olona dia tonga tahaka ny fako eny an-dalambe. Kanefa na eo aza izany rehetra izany dia tsy mbola afaka ihany ny fahatezerany fa mbola miainga ihany ny tanany.

²⁶Hanangana faneva ho amin’ny firenena lavitra Izy sady hisiaka hiantso firenena iray avy any am-paran’ny tany; ary indro, avy haingana dia haingana izy.

²⁷Tsy hisy reraka na tafintohina aminy; tsy hisy ho rendremana na hatory; tsy hisy hanana fehikibo miboraka, na fehin-kapa tapaka;

²⁸Maranitra ny zana-tsipìkany ary voahenjana avokoa ny tsipìkany; ny kitron-tsoavaliny dia atao ho tahaka ny afovato, ary ny kodiarany dia ho tahaka ny tadio.

²⁹Ny fierony dia tahaka ny fieron’ny liom-bavy; mierona tahaka ny liona tanora izy; eny, manerona izy ka mandrapaka ny remby, lasany izany ka tsy azo alaina intsony.

³⁰Hisy hirohondrohona aminy amin’izany andro izany, tahaka ny firohondrohon’ny ranomasina; ary raha mijery ny tany ny olona dia indro haizina sy fahoriana; ary ny fahazavana dia hohamaizinin’ny rahona matevina.