Read La Bible en Malgache Isaia 50 Bible Online

Isaia 50 - La Bible en Malgache bible

Isaia 50

¹Izao no lazain’NY TOMPO: Aiza izay taratasy fisaoram-bady nisaorako ny reninareo? Ary iza amin’izay manan-trosa Amiko no nivarotako anareo? Tsia, fa noho ny helokareo ihany no nivarotana anareo ary noho ny hadisoanareo ihany no nisaorana an-dreninareo.

²Nahoana no tsy nisy olona fony tonga Aho? Nahoana no tsy nisy namaly fony niantso Aho? Moa fohy tokoa va ny tanako ka tsy mahavonjy? Moa tsy manan-kery hoenti-manafaka va Aho? Indro, amin’ny teny mafy ataoko no andritako ny ranomasina sy anovako ny ony ho tany efitra; maimbo ny hazandranony noho ny tsy fisian’ny rano, fa matin-ketaheta ireny.

³Tafiako haizina ny lanitra ary lamba fisaonana no ataoko fisaronany.

⁴NY TOMPO Andriamanitra no nanome Ahy ny lelan’ny efa mahay, mba hahaizako milaza teny hampatanjaka izay reraka; fohaziny isa-maraina isa-maraina Aho; eny, fohaziny ny sofiko mba hihaino tahaka ny efa mahay.

⁵Nanokatra ny sofiko NY TOMPO Andriamanitra ary tsy nanohitra na nihemotra Aho.

⁶Natolotro ho amin’ny mpikapoka ny lamosiko ary ny takolako ho amin’izay manongotra ny volombavako. Tsy nafeniko tamin’ny henatra sy ny rora ny tavako.

⁷Nefa NY TOMPO Andriamanitra no namonjy Ahy ka tsy resin-kenatra Aho; efa nohamafisiko ho tahaka ny vatoafo ny tavako ka fantatro fa tsy hitsanga-menatra Aho.

⁸Efa akaiky izay manamarina Ahy: Iza no hiady Amiko? Andeha hiara-mitsangana isika! Iza no manana ady Amiko? Aoka izy ho avy eto Amiko.

⁹Indro NY TOMPO Andriamanitra no hamonjy ahy, koa iza no hanameloka ahy? Indro izy rehetra dia ho tonga tahaka ny lamba mangarahara, ho lanin’ny kalalao izy.

¹⁰Iza aminareo no matahotra NY TOMPO ka mihaino ny feon’ny Mpanompony? Na iza na iza mandeha amin’ny maizina ka tsy manana fahazavana dia aoka izy hatoky ny anaran’NY TOMPO sy hiankina amin’Andriamaniny!

¹¹E! Ianareo rehetra izay mampirehitra afo sy mifehy kilalaon’afo manodidina anareo, mandehana ao amin’ny fidedadedan’ny lelafonareo sy amin’ny zana-tsipìka misy afo izay narehitrareo! Izany no hanjo anareo avy amin’ny tanako; handry amin’ny fahoriana ianareo!