Read La Bible en Malgache Isaia 51 Bible Online

Isaia 51 - La Bible en Malgache bible

Isaia 51

¹Mihainoa Ahy ianareo izay miezaka mitady fahamarinana, dia izay mitady NY TOMPO! Tsarovy ny vatolampy izay nakana anareo sy ny aty lavaka izay nihadiana anareo.

²Eny, tsarovy i Abrahama rainareo sy i Saraha izay niteraka anareo; fa fony mbola izy irery dia nantsoiko sy notahiko ary nohamaroiko.

³Fa NY TOMPO mampionona an’i Ziona*; eny, mampionona izay rava rehetra ao Izy ka manao ny tany efitra ao ho tahaka an’i Edena, ary ny tany foana ao ho tahaka ny sahan’NY TOMPO. Hafaliana sy haravoana no hita ao, mbamin’ny fisaorana sy ny feo fiderana.

⁴Mihainoa Ahy, ry vahoakako! Ary atongilano Amiko ny sofinareo ry oloko! Fa hisy lalàna hivoaka avy Amiko; ary ny fitsipiko dia hampitoeriko ho fanazavana ny firenena.

⁵Akaiky ny fahamarinako, efa hiseho ny famonjeko, ary ny sandriko no hitsara ny firenena; Izaho no antenain’ny nosy, ary ny sandriko no andrasany.

⁶Andrandrao ho amin’ny lanitra ny masonareo ary jereo ny tany ambany. Fa ho levona tahaka ny setroka ny lanitra ary ho tahaka ny lamba mangarahara ny tany; ho faty tahaka ny fahafatesan’ny moka ny mponina ao, fa ny famonjeko kosa dia haharitra mandrakizay ary ny fahamarinako dia tsy mba ho rava.

⁷Mihainoa Ahy ianareo izay mahalala ny fahamarinana, dia ianao ry firenena izay manana ny lalànako ao am-ponao! Aza matahotra ny latsa ataon’ny zanak’olombelona na manahy noho ny fanaratsiana ataony.

⁸Fa hihinana azy tahaka ny fihinany ny lamba ny kalalao ary ny lolo fotsy dia hihinana azy tahaka ny fihinany ny volon’ondry; fa haharitra mandrakizay ny fahamarinako ary ny famonjeko dia hihatra amin’ny taranaka fara aman-dimby.

⁹Mifohaza, mifohaza! Ry sandrin’NY TOMPO, ka mitafia hery! Mifohaza tahaka ny tamin’ny andro fahiny, dia tamin’ny taranaka taloha ela! Tsy Ianao va Ilay nitetitetika an’i Rahaba sy nitomboka ny dragona*?

¹⁰Tsy Ianao va Ilay nahamaina ny ranomasina, dia ny rano ao amin’ny lalina lehibe* ka nanao ny ranomasina lalina ho lalana halehan’ny olona navotana?

¹¹Eny, hiverina ny navotan’NY TOMPO ka hankany Ziona* amin’ny fihobiana, fifaliana mandrakizay no ho eny an-dohany; hahazo fifaliana sy faharavoravoana izy ka handositra ny alahelo sy ny fisentoana.

¹²Izaho dia Izaho no mampionona anareo. Koa nahoana ianao no dia matahotra ny zanak’olombelona mety maty sy ny zanak’olona izay tahaka ny ahitra ny hanjo azy?

¹³Hadinonao angaha NY TOMPO, mpanao anao, izay namelatra ny lanitra sy nanorina ny tany! Matahotra lalandava ianao mandritra ny andro noho ny fahatezeran’ny mpampahory rehefa mikendry hamono izy. Fa aiza intsony izay fahatezeran’ny mpampahory?

¹⁴Tsy ho ela dia ho afaka izay mitanondrika; tsy ho faty havarina ao an-davaka izy ary tsy ho diso hanina.

¹⁵Fa Izaho TOMPO no Andriamanitrao, izay mampanonja ny ranomasina sy mampirohondrohona ny onjany; Andriamanitra, Tompon’izao rehetra izao no anarako.

¹⁶Nataoko eo am-bavanao ny teniko, ary ao amin’ny aloky ny tanako no nanaronako anao, Hamelatra ny lanitra sy hanorina ny tany Aho, ary hiteny amin’i Ziona* hoe: Oloko ianao!

¹⁷Mifohaza, mifohaza ianao! Mitsangàna, ry Jerosalema ô, ianao izay efa nisotro ny kapoaky ny fahatezerana avy tamin’ny tanan’NY TOMPO; eny, efa nisotro tamin’ny kapoaka mampiraikiraiky ianao ka notrohinao mbamin’ny faikany!

¹⁸Tsy misy mitondra azy ny zanany lahy rehetra izay naterany; ary tsy misy mitantana azy ny zanany lahy rehetra izay notezainy.

¹⁹Izao zavatra roa izao no manjo anao: Iza no hampitony ny alahelonao? Fandravana sy fandringanana ary mosary sy sabatra. Koa hataoko ahoana no fampionona anao?

²⁰Reraka ny zanakao lahy ka midabodaboka eny an-joron-dalambe rehetra eny, tahaka ny diera ao anatin’ny fandrika harato; eny, tahaka ny olona rakotry ny fahatezeran’NY TOMPO sy ny teny mafy ataon’Andriamanitrao.

²¹Koa mihainoa izao, ianao ry ilay ory sady mamo, nefa tsy tamin-divay!

²²Izao no lazain’NY TOMPO, ny Tomponao? dia Andriamanitrao izay mandaha-teny hiaro ny olony: Indro, esoriko eny an-tananao ny kapoaka mampiraikiraiky, dia ny kapoaky ny fahatezerako; tsy hisotroanao intsony iny!

²³Hataoko eo an-tanan’izay mampahory anao kosa izany, dia ireo izay nilaza taminao hoe: Miankohofa mba hohitsahinay! Dia nataonao tahaka ny tany ny lamosinao; eny, tahaka ny lalambe ho an’izay mandeha eo.