Read La Bible en Malgache Isaia 52 Bible Online

Isaia 52 - La Bible en Malgache bible

Isaia 52

¹Mifohaza, mifohaza ianao! Tafio ny herinao, ry Ziona* ô! Tafio ny fitafianao tsara tarehy, ry Jerosalema tanàna masina ô! Fa tsy hiditra ao aminao intsony ny tsy voafora sy ny maloto.

²Ahintsano hiala amin’ny tenanao ny vovoka, ka miarena ary mipetraha, ry Jerosalema ô! Vahao ny fatorana amin’ny tendanao, ry Ziona, zanakavavy babo!

³Fa izao no lazain’NY TOMPO: Tsy vola tsy harena no nivarotana anareo, koa tsy vola tsy harena koa ny hanavotana anareo.

⁴Fa izao no lazain’NY TOMPO Andriamanitra: Tany Ejipta no nidinan’ny oloko tamin’ny voalohany mba hivahiny tany. Nampahory azy tsy amin’antony koa ny Asiriana.

⁵Ary ankehitriny, inona no hataoko hoy NY TOMPO, fa nobaboina tsy amin’antony ny oloko? Manakora ny mpanapaka eo aminy, hoy NY TOMPO; ary mandrakariva, mandritra ny andro dia hamavoina ny anarako.

⁶Koa ny oloko dia hahalala ny anarako; Eny, amin’izany andro izany dia ho fantany fa Izaho no miteny hoe: Inty Aho!

⁷Akory ny hatsaran’ny fandehan’irỳ mitondra teny soa mahafaly erỳ an-tendrombohitra sady mitory fiadanana, dia izay mitondra teny soa mahafaly sady mitory famonjena; eny, izay miteny amin’i Ziona hoe: Mpanjaka Andriamanitrao!

⁸Injany ny feon’ny mpitilinao! Manandratra ny feony izy ka miara-mihoby; fa ho faly izy mahita samy imaso ny hiverenan’NY TOMPO ho any Ziona.

⁹Velomy ny hobinareo rehetra, ry toerana rava any Jerosalema! Fa NY TOMPO efa nampionona ny olony sady efa nanavotra an’i Jerosalema.

¹⁰NY TOMPO efa nampiseho ny sandriny masina teo imason’ny firenena rehetra; ary ny faran’ny tany rehetra dia hahita ny famonjen’Andriamanitsika.

¹¹Mialà, mialà ianareo, mivoaha tao! Aza mikasika izay maloto! Mivoaha tao aminy! Midiova ianareo izay mitondra ny fanaky NY TOMPO.

¹²Fa tsy tampoka no hivoahanareo, ary tsy amin’ny fandosirana no handehananareo; fa NY TOMPO no hitarika anareo eo aloha, ary Andriamanitry ny Israely no ho vodilalanareo.

¹³Indro, hambinina ny Mpanompoko; hisandratra sy ho ambony Izy ka ho avo indrindra.

¹⁴Fa toy ny nigagan’ny maro Anao, simba ny tarehiny ka ohatra ny tsy tarehin’olombelona akory, ary ny endriny dia ohatra ny tsy endriky ny zanak’olombelona.

¹⁵Toy izany no hampitalanjonany ny firenena maro. Hitampim-bava Aminy ny mpanjaka, satria izay tsy mbola nolazaina tamin’ireny no ho hitany ary izay tsy mbola reny akory no hosaintsaininy.