Read La Bible en Malgache Isaia 54 Bible Online

Isaia 54 - La Bible en Malgache bible

Isaia 54

¹Mihobia ianao, ry momba, izay tsy niteraka! Eny, velomy ny hoby ka manandrata feo, ianao izay tsy mba nihetsi-jaza! Fa ny zanaky ny mpitondratena dia maro noho ny zanaky ny manambady, hoy NY TOMPO.

²Halalaho ny itoeran’ny tranolainao ary aoka hohenjanina ny ambaindainao ka aza avela hisy hikentrona! Halavao ny kofehinao ary aoreno mafy ny tsatokan-dainao!

³Fa hiitatra any amin’ny ankavanana sy any amin’ny ankavia ianao ary hahazo firenena hafa ny taranakao ka hasiany mponina ny tanàna lao.

⁴Aza matahotra fa tsy hitsanga-menatra ianao; ary aza mangaihay fa tsy havela ho afa-baraka ianao; fa ho hadinonao ny henatry ny fahatanoranao ary tsy ho tsaroanao intsony ny tondro-masonao fony mpitondratena.

⁵Fa ny Mpanao anao no Vadinao, Andriamanitra, Tompon’izao rehetra izao, no anarany. Ny Iray Masin’ny Israely no Mpanavotra anao. Andriamanitry ny tany rehetra no anarany.

⁶Fa NY TOMPO efa nampody anao, dia ianao izay tahaka ny vady efa nafoy ka ory am-panahy. Vadin’ny fahatanorana va dia azo apetraka? hoy Andriamanitrao.

⁷Indray mipy maso monja no nahafoizako anao, fa amin’ny indrafo lehibe kosa no ampodiako anao;

⁸tamin’ny firehetan’ny fahatezerako no nanafenako ny tavako taminao indray mipy maso monja, fa amin’ny famindrampo mandrakizay kosa no amindrako fo aminao, hoy NY TOMPO, Mpanavotra anao.

⁹Fa Amiko izany dia tahaka ilay ranon’i Noa, koa tahaka ny nianianako fa tsy hanafotra ny tany intsony ilay ranon’i Noa dia toy izany no ianianako fa tsy ho tezitra aminao na hiteny mafy anao intsony Aho.

¹⁰Fa na dia hifindra aza ny tendrombohitra ary na dia hihetsika aza ny havoana, tsy mba hiala aminao ny famindrampoko, ary tsy hitsoaka ny faneken’ny fihavanako, hoy NY TOMPO, Mpamindra fo aminao.

¹¹Ianao ry ory izay asafotofoton’ny tafio-drivotra sady tsy manana fampiononana! Indro Aho hahatonga ny vatonao hiloko fotsy manopy manga sy hametraka ny fanorenanao amin’ny safira,

¹²hataoko robisy ny tilikambo fiambenanao, vato berila ny vavahadinao, ary vatosoa ny faritry ny taninao manodidina.

¹³Ny zanakao rehetra dia ho samy efa nampianarin’NY TOMPO ka ho be ny fiadanan’ny zanakao.

¹⁴Amin’ny fahamarinana no hampiorenana anao; manalavira ny fampahoriana, fa tsy hatahotra ianao, ary ny fampihorohoroana tsy hanakaiky anao intsony.

¹⁵Na dia misy miara-mioko hamely anao aza dia tsy avy Amiko izany; ary na iza na iza miara-mioko hamely anao dia ho lavo noho ny aminao kosa.

¹⁶Indro Izaho no nahary ny mpanefy izay mifofotra ny vainafon’arina ka mahavita fiadiana araka ny asany; Izaho koa no nahary ny mpandringana mba handringana azy.

¹⁷Ny fiadiana rehetra izay voaforona hamelezana anao dia tsy hisy hambinina; ary ny lela rehetra izay miady aminao dia horesenao lahatra. Izany no lovan’ny mpanompon’NY TOMPO sy fahamarinany avy Amiko, hoy NY TOMPO.