Read La Bible en Malgache Isaia 56 Bible Online

Isaia 56 - La Bible en Malgache bible

Isaia 56

¹Izao no lazain’NY TOMPO: Tandremo ny rariny ary manaova ny marina, fa efa madiva ho tonga ny famonjeko ary efa hiseho ny fahamarinako.

²Sambatra ny zanak’olombelona izay manao izany, ary ny zanak’olona izay mitana izany, dia izay mitandrina ny Sabata ka tsy manamavo azy sady miaro ny tanany tsy hanao izay ratsy akory.

³Aoka ny hafa firenena izay efa manaiky ho an’NY TOMPO tsy hiteny hoe: Hesorin’NY TOMPO tsy ho isan’ny olony tokoa aho; ary aoka ny ionòka* tsy hiteny hoe: Indro, hazo maina aho!

⁴Fa izao no lazain’NY TOMPO: Ny amin’ny ionòka izay mitandrina ny Sabatako sy mifidy izay sitrako ary mitana ny fanekeko,

⁵dia hanaovako fahatsiarovana sy anarana ao an-tranoko sy ao anatin’ny mandako izy, izay tsara lavitra noho ny an’ny zanakalahy sy ny zanakavavy; fa anarana mandrakizay izay tsy hesorina no homeko azy.

⁶Ary ny hafa firenena izay manaiky ho an’NY TOMPO mba hanompo Azy sy ho tia ny anaran’NY TOMPO mba ho mpanompony, dia izay rehetra mitandrina ny Sabata ka tsy manamavo azy sady mitana ny fanekeko,

⁷dia hoentiko ho any amin’ny tendrombohitro masina ka hampifaliako ao amin’ny tranoko fivavahana; ny fanatitra dorana manontolo atolony sy ny fanatiny hafa alatsa-dra dia hankasitrahana eo ambonin’ny alitarako, satria ny tranoko hatao hoe Trano fivavahana ho an’ny firenena rehetra.

⁸Izao no lazain’NY TOMPO Andriamanitra izay mamory ny Israely voaroaka: Mbola hamory ny sasany ho eo aminy koa Aho, hanampy izay efa voavory ao.

⁹E, ianareo bibidia rehetra, avia hihinana, dia ianareo biby rehetra any an’ala!

¹⁰Jamba avokoa ny mpitiliny, samy tsy mahalala izy rehetra, amboa moana avokoa izy rehetra ka tsy mahavovò; manonofy izy, eny, mandry ka tia torimaso.

¹¹Lian-kanina ireny amboa ireny ka tsy mahalala voky. Ireny dia mpiandry tsy mahafantatra na inona na inona. Samy efa nivily ho amin’ny lalany avy izy rehetra, samy mankany amin’ny tombontsoany avokoa izy rehetra.

¹²Avia, ianareo, hoy izy ireny, fa haka divay aho, aoka hiboboka toaka isika! Rahampitso dia ho tahaka ny anio ihany no hataontsika, fa mbola be dia be ny sisa tavela ao!