Read La Bible en Malgache Isaia 59 Bible Online

Isaia 59 - La Bible en Malgache bible

Isaia 59

¹Indro, ny tanan’NY TOMPO tsy fohy fa mahavonjy, ary ny sofiny tsy lalodalovana fa mahare.

²Fa ny helokareo no mampisaraka anareo amin’Andriamanitrareo, ary ny fahotanareo no mampiafina ny tavany aminareo ka tsy mihaino Izy.

³Fa ny tananareo dia voaloto amin’ny ra, ary ny rantsantananareo amin’ny heloka; miteny lainga ny molotrareo, ary mibedibedy faharatsiam-panahy ny lelanareo.

⁴Tsy misy mitory olona araka ny fahamarinana, na mandahatra eo amin’ny fitsarana araka izay tena izy; matoky ny misavorovoro sy miteny zava-poana izy; torontoronina fampahoriana izy ka miteraka loza.

⁵Mikotrika atodin’ny menarana izy ary manenona tranon-kala. Ho faty izay homana ny atodin’ireny, fa raha vakina iny dia menarana no miporitsaka avy ao.

⁶Ny tranon-kalany dia tsy azo atao fitafiana, ary tsy mahatafy azy ny asany; ny asany dia asa mampahory, ary herisetra no eny an-tanany.

⁷Ny tongony dia miriotra ho amin’ny ratsy sy milomay handatsaka ny ran’ny tsy manan-tsiny; ny fisainany dia fisainana fampahoriana, fandravana sy fandringanana no eo amin’ny alehany.

⁸Tsy fantany ny lalan’ny fiadanana ary tsy misy rariny ao amin’ny alehany; nataony miolakolaka ny lalany, koa na iza na iza mandia izany dia tsy mahita fiadanana.

⁹Noho izany dia lavitra antsika ny rariny, ary tsy mahatratra antsika ny fahamarinana; miandry ny mazava isika nefa indro ny maizina, ary miandry ny fahazavana nefa mbola ao amin’ny haizim-pito ihany no andehanantsika.

¹⁰Mitsapatsapa manara-drindrina tahaka ny jamba isika; eny, mitsapatsapa tahaka ny tsy mana-maso; tafintohina amin’ny mitataovovonana tahaka ny amin’ny maizimaizina isika, ary ao anatin’ny hery sy tanjaka nefa tahaka ny maty.

¹¹Mierona tahaka ny bera isika rehetra ary mitoloko tahaka ny voromailala; miandry ny rariny isika nefa tsy misy, ary miandry ny famonjena nefa lavitra antsika izany!

¹²Fa betsaka eo anatrehanao ny fikomianay ary miampanga anay ny fahotanay; eny, tsaroanay ny fahadisoanay ary fantatray ny helokay:

¹³Fikomiana sy fandavana NY TOMPO, fialana amin’ny fanarahana an’Andriamanitray, teny mampahory sy fikomiana, famoronana sy famoahana teny lainga avy ao am-po.

¹⁴Mihemotra ny rariny ary mijanona eny lavitra eny ny hitsiny; fa tafintohina eny an-kalalahana ny fahamarinana ary tsy mahazo miditra ny hitsim-po.

¹⁵Eny, tsy eo ny fahamarinana ary izay mifady ny ratsy dia manolo-tena hobaboin’ny sasany. Hitan’NY TOMPO ny tsy fisian’ny rariny ka tsy nankasitrahany izany.

¹⁶Eny, hitany fa tsy nisy olona na iray aza, ary talanjona Izy, satria tsy nisy mpanelanelana, koa ny sandriny ihany no nanao famonjena ho Azy, ary ny fahamarinany no nanohana Azy.

¹⁷Niakanjo fahamarinana tahaka ny fiarovan-tratra Izy, ary fiarovan-doha famonjena no teo amin’ny lohany; niakanjo ny akanjo famaliana Izy; eny, nandray ny fahasaro-piaro ho akanjo ivelany Izy.

¹⁸Araka ny asa natao no hamaliany, dia fahatezerana mirehitra ho an’ny fahavalony ary famaliana ho an’ny rafiny; ny nosy dia hovaliany tokoa araka ny nataony avy.

¹⁹Hatrany andrefana dia hatahotra ny anaran’NY TOMPO ny olona ary ny voninahiny dia hatramin’ny fiposahan’ny masoandro; ny fiaviny dia ho toy ny rano maria, ampandehanin’ny Fanahin’NY TOMPO.

²⁰Dia hisy Mpanavotra ho tonga any Ziona*, ho amin’ny taranak’i Jakoba izay miverina avy amin’ny fikomiany, hoy NY TOMPO.

²¹Raha Izaho dia izao no fanekeko aminy, hoy NY TOMPO: Ny Fanahiko izay ao aminao sy ny teniko izay nataoko teo am-bavanao dia tsy hiala amin’ny vavanao, na amin’ny vavan’ny taranakao, na amin’ny vavan’ny taranaky ny taranakao, hatramin’izao ka ho mandrakizay, hoy NY TOMPO.