Read La Bible en Malgache Isaia 60 Bible Online

Isaia 60 - La Bible en Malgache bible

Isaia 60

¹Mitsangàna, mihazavà, fa tonga ny fahazavanao, ary ny voninahitry NY TOMPO no efa miposaka aminao.

²Fa indro, manarona ny tany ny haizina, ary manarona ny firenena ny haizim-pito; fa aminao kosa no iposahan’NY TOMPO, ary aminao no isehoan’ny voninahiny.

³Manatona ny fahazavanao ny firenena maro ary mankeo amin’ny famirapiratan’ny fiposahanao ny mpanjaka.

⁴Atopazy manodidina ny masonao ka jereo: Izy rehetra dia mivory ka mankaty aminao; ny zanakao lahy dia tonga avy lavitra, ny zanakao vavy dia sakelehina.

⁵Hahita izany ianao ka ho miramirana, dia hiemponempona sady hohalehibiazina ny fonao, fa hoentina ho anao ny harenan’ny ranomasina ary hafindra ho anao ny fananan’ny firenena.

⁶Ho feno rameva betsaka ao aminao, dia rameva tanora avy any Midiana sy Efaha; samy avy any Seba izy rehetra; volamena sy ditin-kazo manitra no hoentiny, ary ny fiderana NY TOMPO no teny mahafaly hambarany.

⁷Ny ondry aman’osy rehetra avy any Kedara dia hangonina ao aminao, ary ny ondrilahin’i Nebaiota no hampiasainao; hatao fanatitra eo ambonin’ny alitarako ireo dia hankasitrahana, ary hataoko mamirapiratra ny tranon’ny voninahitro.

⁸Iza moa ireto manidina tahaka ny rahona sy tahaka ny voromailala ho amin’ny varavarankeliny?

⁹Fa Izaho no andrasan’ny nosy, ary ny sambon’i Tarsisy no hialoha lalana hitondra ny zanakao avy lavitra mbamin’ny volafotsiny sy ny volamenany, ho an’ny anaran’NY TOMPO Andriamanitrao sy ho an’ny Iray Masin’ny Israely, satria manome voninahitra anao Izy.

¹⁰Ny hafa firenena no hanangana ny mandanao, ary ny mpanjakany no hanompo anao; fa tamin’ny fahatezerako no namelezako anao, nefa amin’ny fitiavako kosa no amindrako fo aminao.

¹¹Hidanadana mandrakariva ny vavahadinao, tsy hirindrina izy na andro na alina, mba hampidirana ho ao aminao ny harenan’ny firenena sy ny mpanjakany izay voababo.

¹²Fa ho levona izay firenena sy fanjakana tsy hanompo anao; eny, hofongorana ireny firenena ireny.

¹³Ho tonga aminao ny voninahitr’i Libanona, ny hazo kipreso sy ny hazo kesika ary ny kirihitra koa dia handravahana ny fitoerako masina, ary hasiako voninahitra ny fitoeran-tongotro.

¹⁴Ny zanak’izay nampahory anao dia handeha hiondrika eo anatrehanao ary hiankohoka amin’ny faladianao izay rehetra nanamavo anao. Ary hiantso anao izy hoe Tanànan’NY TOMPO, Zionan’ny Iray Masin’ny Israely.

¹⁵Ho solon’ny nahafoizana anao sy ny nankahalana anao ary ny tsy nandehanan’olona namakivaky anao, dia hasandratro ho rehareha mandrakizay ianao; eny, ho fifaliana hatramin’ny taranaka fara aman-dimby.

¹⁶Hinono amin’ny Jentilisa* ianao sady hinono amin’ny mpanjaka; dia ho fantatrao fa Izaho TOMPO no Mpamonjy anao, ary Ilay Maherin’i Jakoba no Mpanavotra anao.

¹⁷Hahatonga volamena Aho ho solon’ny varahina, ary hahatonga volafotsy ho solon’ny vy; varahina ho solon’ny hazo, ary vy ho solon’ny vato; ny fiadanana no hataoko mpanapaka anao, ary ny fahamarinana no ho mpampiasa anao.

¹⁸Tsy ho re eo amin’ny taninao intsony ny fampahoriana, na ny fandravana sy ny fandringanana ao amin’ny faritry ny taninao; ny mandanao dia hataonao hoe Famonjena, ary ny vavahadinao dia hataonao hoe Fiderana.

¹⁹Tsy ny masoandro intsony no ho fanazavana anao amin’ny andro, ary tsy ny fangarangaran’ny volana no hanazava anao; fa NY TOMPO no ho fanazavana anao mandrakizay, ary Andriamanitrao no ho voninahitrao.

²⁰Tsy hilentika intsony ny masoandronao, ary tsy hisoka ny volanao; fa NY TOMPO no ho fanazavana anao mandrakizay. Ho tapitra ny andron’ny falahelovanao.

²¹Ho marina avokoa ny olonao rehetra, hanana ny tany ho mandrakizay izy; eny, ho voly maitso eo amin’ny sahako, asan’ny tanako ho fampisehoana ny voninahitro.

²²Ny kely dia ho tonga arivo, ary ny malemy dia ho tonga firenena matanjaka; Izaho TOMPO no hanafaingana izany amin’ny fotoanany.