Read La Bible en Malgache Isaia 61 Bible Online

Isaia 61 - La Bible en Malgache bible

Isaia 61

¹Ny Fanahin’NY TOMPO Andriamanitra no ato Amiko, satria NY TOMPO efa nanosotra Ahy mba hitory teny soa mahafaly amin’ny mpandefitra, naniraka Ahy hanasitrana ny torotoro fo Izy ary hitory fanafahana amin’ny babo sy hamoaka ny ao an-tranomaizina ho amin’ny mazava,

²hitory ny taona ankasitrahan’NY TOMPO sy andro famalian’Andriamanitsika; hampionona ny malahelo rehetra,

³hanolotra ho an’ny malahelo ao Ziona*; eny, hanome azy fehiloha tsara tarehy ho solon’ny lavenona sy diloilo fifaliana ho solon’ny fahalahelovana, ary fitafiana fiderana ho solon’ny fanahy reradreraka mba hanaovana azy hoe Hazon’ny fahamarinana, nambolen’NY TOMPO ho fampisehoam-boninahitra.

⁴Koa hanangana ny efa rava hatry ny fony fahagola izy ary hamboatra ny efa lao hatramin’ny fahiny, dia hohavaoziny indray ny tanàna rava, izay efa lao hatramin’ny taranaka nifandimby.

⁵Ho tonga ao ny vahiny ka hiandry ny ondry aman’osinareo, ary ny hafa firenena dia ho mpiasa tany sy ho mpikarakara tanim-boaloboka ho anareo.

⁶Fa ianareo kosa no hatao hoe mpisoron’NY TOMPO; mpanao fanompoam-pivavahana ho an’Andriamanitsika no hilazana anareo; hohaninareo ny harenan’ny firenena ary ho reharehanareo ny voninahiny.

⁷Ny henatrareo dia hosoloana avo roa heny ary ny tondro-maso dia hosoloana hoby amin’ny anjara lovany; noho izany dia hahazo indroa heny ao amin’ny taniny izy ary fifaliana mandrakizay no ho azy.

⁸Fa Izaho TOMPO dia tia fitsarana marina; halako ny fandrobana amin’ny faharatsiam-panahy; homeko ny valin’asany amin’ny fahamarinana izy, ary fanekena mandrakizay no hataoko aminy.

⁹Ho fantatra any amin’ny Jentilisa* ny taranany, ary any amin’ny firenena ny terany; izay rehetra mahita azy dia hahafantatra fa taranaka notahin’NY TOMPO izy.

¹⁰Hifaly dia hifaly ao amin’NY TOMPO aho, ho ravoravo ao amin’Andriamanitro ny fanahiko; fa notafiany fitafian’ny famonjena aho ary nampiakanjoiny akanjon’ny fahamarinana, toy ny mpampakatra manao fehiloha tsara tarehy tahaka ny mpisorona, ary toy ny ampakarina mihaingo amin’ny firavany.

¹¹Fa tahaka ny tany mampitsimoka izay ao aminy, ary tahaka ny tanimboly mampaniry izay nafafy teo aminy, dia toy izany no hampisehoan’NY TOMPO Andriamanitra fahamarinana sy fiderana eo anatrehan’ny firenena rehetra.