Read La Bible en Malgache Isaia 62 Bible Online

Isaia 62 - La Bible en Malgache bible

Isaia 62

¹Tsy hangina Aho noho ny amin’i Ziona* ary tsy hitsaha-miteny Aho noho ny amin’i Jerosalema, mandra-piposaky ny fahamarinany tahaka ny famirapiratry ny mazava, ary ny famonjena azy tahaka ny fanilo mirehitra.

²Hahita ny fahamarinanao ny firenena, ary ny mpanjaka rehetra dia hahita ny voninahitrao; homena anaram-baovao ianao, izay hotononin’ny vavan’NY TOMPO.

³Dia ho tonga satroboninahitra tsara tarehy eo an-tanan’NY TOMPO ianao ary satroka mpanjaka eo am-pelatanan’Andriamanitrao.

⁴Ianao dia tsy hatao intsony hoe Nafoy, ary ny taninao dia tsy hatao intsony hoe Lao, fa ianao dia hatao hoe Ilay ankasitrahako, ary ny taninao dia hatao hoe Vady ampakarina, satria ankasitrahan’NY TOMPO ianao, ary hampakarina ho vady ny taninao.

⁵Fa tahaka ny zatovo mampakatra virijiny ho vadiny no hampakaran’ny zanakao lahy anao; ary tahaka ny fifalian’ny mpampakatra amin’ny ampakariny no hifalian’Andriamanitrao aminao.

⁶Nanendry mpiambina ho eny ambonin’ny mandanao Aho, ry Jerosalema ô; koa na andro na alina dia tsy mahazo mangina ireny. Eny, ianareo izay mpampahatsiaro NY TOMPO, aza mitsahatra!

⁷Ary aza mamela Azy hitsahatra mandra-panaony an’i Jerosalema ho mafy orina sy hoderaina amin’ny tany.

⁸NY TOMPO efa nianiana tamin’ny tanany ankavanana, dia tamin’ny sandriny mahery hoe: Tsy homeko hohanin’ny fahavalonao intsony ny varinao, ary ny hafa firenena dia tsy hisotro ny ranom-boalobokao izay efa nisasaranao;

⁹fa izay nijinja azy no hihinana azy ka hidera NY TOMPO; ary izay nioty azy no hisotro azy ao amin’ny kianjako masina.

¹⁰Mivoaha, mivoaha amin’ny vavahady! Amboary ny lalana halehan’ny olona! Totofy tsara ny lalambe, esory ny vato eny aminy! Manangàna faneva ho tazan’ny firenena!

¹¹Indro, efa nanambara hatrany amin’ny faran’izao tontolo izao NY TOMPO hoe: Lazao amin’i Ziona zanakavavy: Indro avy ny famonjena anao; indro ny valim-pitia hatolony dia miaraka Aminy, ary ny valin’asa homeny dia eo anoloany.

¹²Ary ireny hotononina hoe: Firenena masina, olona navotan’NY TOMPO; ary ianao dia hatao hoe Ilay notadiavina, Tanàna tsy foy.