Read La Bible en Malgache Isaia 63 Bible Online

Isaia 63 - La Bible en Malgache bible

Isaia 63

¹Iza moa ity avy any Edoma, avy any Bozra, miakanjo mena midorehitra, mareva-pitafiana sy miandranandrana amin’ny haben’ny heriny? Izaho izay mitory fahamarinana sady manan-kery hamonjy.

²Nahoana no mena ny fitafianao, ary tahaka ny an’izay manosihosy ao amin’ny famiazam-boaloboka ny akanjonao?

³Nanosihosy irery tao amin’ny famiazam-boaloboka Aho fa tsy mba nisy niaraka Tamiko ny avy tamin’ny firenena na dia iray akory aza; nanitsaka ireny tamin’ny fahatezerako Aho ary nanosihosy azy tamin’ny fahavinirako, dia nipitipitihan’ny rany ny fitafiako ka voalotoko ny akanjoko rehetra.

⁴Fa efa ato am-poko ny andro hamaliako ary tonga ny taonan’ny fanavotako.

⁵Nitsinjo Aho, nefa tsy nisy olona hanampy Ahy; ary talanjona Aho, satria tsy nisy olona hanohana Ahy. Koa ny sandriko ihany no nanao famonjena ho Ahy ary ny fahavinirako no nanohana Ahy.

⁶Nanitsaka firenena tamin’ny fahatezerako Aho sady nahamamo azy tamin’ny fahavinirako ary nandatsaka ny rany tamin’ny tany.

⁷Ny famindrampon’NY TOMPO no hambarako, dia ny asany mendri-piderana araka izay rehetra nataon’NY TOMPO tamintsika sy ny haben’ny fahasoavana tamin’ny taranak’Israely, dia ny soa nataony taminy araka ny fiantrany sy ny haben’ny famindrampony.

⁸Fa hoy Izy: Oloko tokoa ireo, dia zanaka tsy mba handainga! Dia tonga Mpamonjy azy Izy.

⁹Tamin’ny fahoriany rehetra dia niory tokoa Izy, dia ilay Anjely nialoha Azy no namonjy ireo; ny fitiavany sy ny famindrampony no nanavotany azy sy nivimbinany azy ary nitondrany azy tamin’ny andro taloha ela rehetra.

¹⁰Ireo kosa dia nikomy ka nanome alahelo ny Fanahiny Masina. Dia tonga fahavalony Izy ka niady taminy.

¹¹Ary ny olony dia nahatsiaro ny andro taloha ela, tamin’ny andron’i Mosesy: Aiza Ilay nitondra azy mbamin’ny mpiandry ondriny niakatra avy tamin’ny ranomasina? Aiza Ilay nametraka ny Fanahiny Masina tao aminy?

¹²Dia Ilay nampandeha ny sandriny be voninahitra teo ankavanan’i Mosesy ka nampisaraka ny ranomasina teo anoloany, mba hanaovany anarana mandrakizay ho Azy,

¹³Ilay nitondra azy nita ny rano lalina, tahaka ny fandehan’ny soavaly any an-tany efitra ka tsy nahatafintohina azy.

¹⁴Tahaka ny fidinan’ny biby fiompy ho any an-dohasaha no nanomezan’ny Fanahin’NY TOMPO fitsaharana ho azy. Tahaka izany no nitondranao ny olonao mba hanaovana anarana be voninahitra ho Anao.

¹⁵Mitsinjova eny an-danitra ka mijere eny amin’ny fonenan’ny fahamasinanao sy ny voninahitrao: Aiza ny fahasaro-piaronao sy ny asanao lehibe? Ny fandevilevin’ny kibonao sy ny famindramponao dia voasakana tsy ho amiko.

¹⁶Kanefa Ianao no Rainay, fa tsy mahalala anay i Abrahama ary tsy mahafantatra anay Israely, TOMPO ô, Ianao no Rainay, Mpanavotra anay no anaranao hatrizay hatrizay.

¹⁷TOMPO ô, nahoana no nampiala anay hanalavitra ny lalanao Ianao? Sady nanamafy ny fonay tsy hatahotra Anao? Miverena noho ny amin’ny mpanomponao, dia ny firenena lovanao!

¹⁸Vetivety foana no nananan’ny olonao masina ny tany; efa nanitsaka ny toeranao masina ny fahavalonay.

¹⁹Efa tonga tahaka izay tsy nanananao fahefana hatrizay hatrizay izahay, sady tsy mba nantsoina tamin’ny anaranao akory. Enga anie ka hotriarinao ny lanitra mba hidinanao, dia hiempo eo anoloanao ny tendrombohitra;