Read La Bible en Malgache Isaia 64 Bible Online

Isaia 64 - La Bible en Malgache bible

Isaia 64

¹dia tahaka ny fandevon’ny afo ny tapa-kazo maina sy ny fampangotraky ny afo ny rano; mba ho fampahafantarana ny fahavalonao ny anaranao ka hangovitra eo anoloanao ny Jentilisa.

²Raha nanao zava-mahatahotra izay tsy nantenainay Ianao dia nidina ka niempo teo anoloanao ny tendrombohitra.

³Fa hatrizay hatrizay dia tsy mbola nisy nandre, na naheno, na nahita maso, izay Andriamanitra miasa ho an’ny miandry Azy, afa-tsy Ianao.

⁴Mitsena izay mifaly hanao ny marina Ianao dia izay mahatsiaro Anao amin’ny lalanao; Indro, tezitra Ianao, ary hita fa meloka izahay; fa tamin’ireo lalana fahiny no namonjena anay.

⁵Fa samy tahaka ny olo-maloto izahay rehetra, ary tahaka ny lamba mihosin-dra ny fahamarinanay rehetra; malazo tahaka ny ravina izahay rehetra ary mipaoka anay tahaka ny rivotra ny helokay.

⁶Tsy misy olona miantso ny anaranao na mifoha hifikitra Aminao. Fa efa nanafina ny tavanao taminay Ianao ka nandevona anay noho ny helokay.

⁷Nefa ankehitriny TOMPO ô, Rainay Ianao; izahay dia tanimanga, ary Ianao no mpanefy anay. Asan’ny tananao izahay rehetra.

⁸Aza dia tezitra mafy loatra TOMPO ô, ary aza dia mahatsiaro heloka mandrakizay; miangavy Anao izahay, tsinjovy, fa olonao izahay rehetra.

⁹Tonga tany efitra ireo tanànanao masina; eny, tonga tany efitra i Ziona* ary lao i Jerosalema.

¹⁰Ny tranonay masina sady mendrika, izay nideran’ny razanay Anao, dia voadoron’ny afo, ary rava ny zavatray sarobidy rehetra.

¹¹Koa mbola mahatsindry fo amin’izany zavatra izany ihany va Ianao, TOMPO ô? Hangina va Ianao ka hampahory anay mafy loatra?