Read La Bible en Malgache Isaia 65 Bible Online

Isaia 65 - La Bible en Malgache bible

Isaia 65

¹Notadiavin’izay tsy naniry Aho ary hitan’izay tsy nitady; hoy Aho tamin’ny firenena izay tsy niantso ny anarako: Inty Aho! Inty Aho!

²Nanatsotra hatrany ny tanako Aho tamin’ny firenena mpikomy izay mandeha amin’ny lalana tsy tsara araka ny fisainany ihany,

³firenena izay nahatezitra Ahy mandrakariva na dia eo imasoko aza, izay mamono zavatra hatao fanatitra eny amin’ny tanimboly, ary mandoro ditin-kazo manitra eny ambonin’ny biriky;

⁴mipetraka any amin’ny fasana izy ary mitoetra mandritra ny alina any am-pierena sady mihinana henan-kisoa, ary ny ron-kena maloto no ao amin’ny loviany.

⁵Hoy izy: Mihataha fa aza manakaiky ahy, fa izaho no masina fa tsy ianao. Ireny dia setroka ao am-bavoroko; eny, afo mirehitra mandritra ny andro.

⁶Indro, izao no voasoratra eo anatrehako: Tsy hangina Aho mandra-pamaliko anareo; eny, mandra-pamaliko ho ao an-tratranareo

⁷ny helokareo sy ny heloky ny razanareo koa, hoy NY TOMPO, dia izay olona nandoro ditin-kazo manitra teny an-tendrombohitra, ary nihantsy Ahy teny amin’ny havoana; eny, hamatra ny valin’ny asany ho ao an-tratrany Aho aloha.

⁸Izao no lazain’NY TOMPO: Tahaka ny ranom-boaloboka hita ao an-tsampahony ka ataon’ny olona hoe: Aza simbana fa misy fitahiana ao anatiny! Dia toy izany no hataoko noho ny amin’ireo mpanompoko ka tsy hanimba azy rehetra Aho.

⁹Hahatonga taranaka avy amin’i Jakoba Aho, ary mpandova ny tendrombohitro avy amin’i Joda; ireo voafidiko no handova azy; eny, ireo mpanompoko no honina ao.

¹⁰Ho tonga fiandrasana ondry i Saròna, ary ho fandrian’omby ny lohasahan’i Akora, ho an’ny oloko izay nitady Ahy.

¹¹Fa ny aminareo izay mahafoy NY TOMPO sy manadino ny tendrombohitro masina sady mamelatra latabatra ho an’i Gada[14] sy mampidina divay noharoharoan-javatra ho an’i Menỳ[15],

¹²dia hotendreko ho voan’ny sabatra ianareo ka hahohoka hovonoina avokoa, satria niantso Aho nefa tsy namaly ianareo, niteny Aho nefa tsy nihaino ianareo, fa nanao izay ratsy teo imasoko, ary izay tsy sitrako no nofidinareo.

¹³Noho izany dia izao no lazain’NY TOMPO Andriamanitra: Indro, hihinana ny mpanompoko, fa ianareo kosa dia ho mosarena; indro, hisotro ny mpanompoko, fa ianareo kosa dia ho main-tenda; indro, hifaly ny mpanompoko, fa ianareo kosa dia hitsanga-menatra;

¹⁴indro, hihoby ny mpanompoko noho ny haravoan’ny fo, fa ianareo kosa dia hitoloko noho ny alahelom-po, ary hidradradradra noho ny fahoriam-panahy.

¹⁵Hamela ny anaranareo ho fanozonana amin’ireo voafidiko ianareo, ary hahafaty anao NY TOMPO Andriamanitra. Fa ny mpanompony kosa dia homeny anaram-baovao;

¹⁶koa izay miarahaba tena etỳ ambonin’ny tany dia hanao izany amin’ny anaran’Andriamanitry ny Amena* ary izay mianiana etỳ ambonin’ny tany dia hianiana amin’Andriamanitry ny Amena, satria efa hadino ny fahoriana taloha sady voafina izany ka tsy hitan’ny masoko.

¹⁷Fa indro Aho mahary lanitra vaovao sy tany vaovao; tsy hotsarovana intsony ny taloha, na ho tonga ao an-tsaina akory aza.

¹⁸Fa mifalia kosa, ary miravoravoa mandrakizay, satria mahary izany Aho; fa indro, mahary an’i Jerosalema ho fifaliana Aho ary ny olony ho firavoravoana.

¹⁹Dia ho faly amin’i Jerosalema Aho ary ho ravoravo amin’ny oloko; tsy ho re any intsony ny feo mitomany sy ny feo mitaraina.

²⁰Ary tsy hisy ao intsony ny zaza minono fohy andro, ary tsy hisy lahiantitra izay tsy nahatapitra ny androny; fa mbola zatovo ihany izay maty na dia efa zato taona aza, ary ny mpanota izay mahatratra zato taona dia ho toy ny voaozona.

²¹Hanao trano ny olona ka hitoetra ao; ary hanao tanim-boaloboka ny olona ka hihinana ny vokatra aminy.

²²Tsy hanao trano hitoeran’olon-kafa izy, na hamboly zavatra hohanin’olon-kafa; fa ho tahaka ny andron’ny hazo ny andron’ny oloko, ary ireo voafidiko dia hanaram-po amin’ny asan’ny tanany.

²³Tsy hisasatra foana izy, na hitera-jaza ho tratry ny loza tampoka. Fa taranak’izay notahin’NY TOMPO ireo, ary ho ao aminy koa ny taranany.

²⁴Raha tsy mbola miantso aza izy dia hamaly Aho; ary raha mbola miteny izy dia hihaino Aho.

²⁵Hiara-komana ny amboadia sy ny zanak’ondry, ary hihina-mololo tahaka ny omby ny liona, ary ny menarana dia vovoka no ho fihinany; tsy handratra na hanimba manerana ny tendrombohitro masina izy, hoy NY TOMPO.