Read La Bible en Malgache Isaia 66 Bible Online

Isaia 66 - La Bible en Malgache bible

Isaia 66

¹Izao no lazain’NY TOMPO: Ny lanitra no sezafiandrianako ary ny tany no fitoeran-tongotro. Trano manao ahoana no hataonareo ho Ahy? Ary toerana manao ahoana no ho fitsaharako?

²Fa izao zavatra rehetra izao no nataon’ny tanako dia ary izao rehetra izao, hoy NY TOMPO. Nefa izao no olona hotsinjoviko: Izay mahantra sy torotoro fanahy sady mangovitra noho ny teniko.

³Izay mamono omby dia ohatry ny mamono olona; izay mamono ondry hatao fanatitra dia ohatry ny mamolaka ny vozon’alika; izay manolotra fanatitra avy amin’ny zavamaniry dia ohatry ny manatitra ran-kisoa; izay mandoro ditin-kazo manitra ho fanati-pahatsiarovana dia ohatry ny misaotra ny sampy. Eny, nifidy ny halehany ireny sady nifaly tamin’ny fahavetavetany.

⁴Dia tahaka izany kosa no hifidianako ny fampahoriana azy sy handatsahako ny fahatahorany ho ao aminy, satria niantso Aho nefa tsy nisy namaly; niteny Aho nefa tsy nihaino izy fa nanao izay ratsy teo imasoko, ary izay tsy sitrako no nofidiny.

⁵Mihainoa ny tenin’NY TOMPO, ianareo izay mangovitra noho ny teniny. Hoy ny rahalahinareo izay mankahala anareo ka mandroaka anareo noho ny amin’ny anarako: Aoka hampiseho ny voninahiny NY TOMPO, mba ho hitanay ny fifalianareo! Kanefa izy ireny kosa no hitsanga-menatra.

⁶Injany misy horakoraka avy any an-tanàna, misy feo avy ao amin’ny tempoly. Feon’NY TOMPO izany, mamaly ny ataon’ny fahavalony Izy.

⁷Mbola tsy nihetsi-jaza aza izy dia efa niteraka; mbola tsy nanaintaina aza izy dia efa niteraka zazalahy.

⁸Iza no nandre zavatra toy izany? Iza no nahita zavatra toy izany? Hisy tany hateraka indray andro va? Hisy firenena azo atao indray miteraka va? Fa raha vao nihetsi-jaza i Ziona* dia efa velon-jaza.

⁹Moa hahatonga vehivavy ho eo amin’ny fiterahana va Aho ka tsy hampiteraka azy? Hoy NY TOMPO; Izaho izay nampiteraka va no hanakana izany indray? Hoy Andriamanitrao.

¹⁰Miaraha mifaly amin’i Jerosalema ary miravoravoa aminy, ianareo rehetra izay tia azy; aoka hiara-mifaly aminy tokoa ianareo rehetra izay malahelo noho ny aminy,

¹¹mba hinonoanareo sy hivokisanareo amin’ny nonony mahafaly; eny, mba higoka ianareo ka hiravoravo amin’ny haben’ny voninahiny.

¹²Fa izao no lazain’NY TOMPO: Indro, hitarihako fiadanana tahaka ny ony izy ary ny voninahitry ny firenena, ho tahaka ny renirano tondraka. Hampinonoana ianareo; ary hosakelehina ianareo sady horotsirotsina eo ambony lohalika.

¹³Tahaka ny olona ampiononin’ny reniny no hampiononako anareo; eny, ao Jerosalema no hampiononana anareo.

¹⁴Dia hahita izany ianareo ka ho faly ny fonareo, ho tsara fitombo tahaka ny ahi-maitso ny taolanareo; ary ny tanan’NY TOMPO dia ataony fantatry ny mpanompony, fa ho tezitra amin’ny fahavalony kosa Izy.

¹⁵Fa indro NY TOMPO ho avy amin’ny afo, ary tahaka ny tadio ny kalesy fitondrany miady maro mba hanao famaliana amin’ny hatezerany mirehitra sy ny fitenenany mafy amin’ny lelafo.

¹⁶Fa ny afo no hoentin’NY TOMPO mitsara, ary amin’ny sabany no hitsarany ny nofo rehetra; ho maro ny voaringan’NY TOMPO.

¹⁷Izay manamasina sy manadio ny tenany ho ao an-tanimboly ka mifandimby mankeo afovoany ary mihinana henan-kisoa sy zava-betaveta ary totozy dia hiaraka ho levona avokoa, hoy NY TOMPO.

¹⁸Fa Izaho mahalala ny asany sy ny heviny. Ary ho avy ny fotoana hamoriana ny Jentilisa* rehetra sy ny samihafa fiteny; ho avy ireo ka hahita ny voninahitro.

¹⁹Hasiako famantarana eo aminy; izay afaka mandositra dia hisy halefako ho any amin’ny Jentilisa, dia ho any Tarsisy sy Pola ary Loda izay mpanenjana tsipìka, ho any Tobala sy Javana, dia ho any amin’ireo nosy lavitra izay tsy mbola nandre ny lazako na nahita ny voninahitro, ary hitory ny voninahitro any amin’ny Jentilisa izy.

²⁰Hitondra ny rahalahinareo rehetra avy any amin’ny Jentilisa rehetra ho fanatitra ho an’NY TOMPO izy, mitaingin-tsoavaly sy anaty kalesy sy filanjana izy, ary mitaingina ampondra sy rameva haingam-pandeha, ho any Jerosalema tendrombohitro masina, hoy NY TOMPO; tahaka ny fitondran’ny Zanak’Israely ny fanatitra avy amin’ny zavamaniry ao anatin’ny lovia madio ho any amin’ny tranon’NY TOMPO.

²¹Ary avy amin’ireo aza no hakako ho mpisorona sy levita*, hoy NY TOMPO.

²²Fa tahaka ny lanitra vaovao sy ny tany vaovao, izay hataoko ka haharitra eo anatrehako, hoy NY TOMPO, dia toy izany no haharetan’ny taranakareo sy ny anaranareo.

²³Ary isaky ny voaloham-bolana sy isan-tSabata dia ho avy hiankohoka eo anatrehako ny nofo rehetra, hoy NY TOMPO.

²⁴Ary rehefa hivoaka izy ireny dia hahita ny fatin’ny olona izay efa nikomy Tamiko; fa tsy ho faty ny kankany, tsy hovonoina ny afony, ary hataon’ny nofo rehetra ho fahavetavetana izy.