Read La Bible en Malgache Isaia 7 Bible Online

Isaia 7 - La Bible en Malgache bible

Isaia 7

¹Tamin’ny andron’i Ahaza, zanak’i Jotama, zanak’i Ozia mpanjakan’ny Joda, no niakaran’i Rezina, mpanjakan’i Arama, sy i Peka, zanak’i Remalia mpanjakan’ny Israely, hanafika an’i Jerosalema, nefa tsy afaka niady taminy izy.

²Dia nambara tamin’ny taranak’i Davida hoe: Injao ny Arameana efa mitoby any amin’ny Efraima. Ary nihovotrovotra ny fony sy ny fon’ny vahoakany, toy ny fihovitrovitry ny hazo any an’ala raha asian’ny rivotra.

³Ary hoy NY TOMPO tamin’Isaia: Mivoaha ianao sy i Seara-Iasoba[2] zanakao hitsena an’i Ahaza eo amin’ny faran’ny lakandrano amin’ny kamory ambony, eo amin’ny lalambe mankany amin’ny sahan’ny mpanasa lamba,

⁴koa lazao aminy hoe: Mitandrema ka aza taitaitra foana; aza matahotra, ary aoka tsy ho ketraka ny fonao noho ireto tapa-porohana roa midona-tsetroka ireto, dia ny firehetan’ny fahatezeran’i Rezina sy i Arama ary ny zanak’i Remalia.

⁵Satria manam-pikasana hampidi-doza anao i Arama sy i Efraima ary ny zanak’i Remalia ka miteny hoe:

⁶Andeha isika hananika an’i Joda ka hampaharaiki-tahotra azy ary haka azy ho antsika dia hanangana ny zanak’i Tabeala ho mpanjaka ao afovoany,

⁷dia izao no lazain’NY TOMPO Andriamanitra: Tsy ho tanteraka izany sady tsy hisy,

⁸satria ny lohan’i Arama dia i Damaskosy, ary ny lohan’i Damaskosy dia i Rezina. Ary ao anatin’ny dimy amby enimpolo taona dia ho rava i Efraima ka tsy ho vanon-ko firenena intsony.

⁹Ny lohan’i Efraima dia i Samaria, ary ny lohan’i Samaria dia ny zanak’i Remalia. Raha tsy mety mino ianareo dia tsy ho tafatoetra!

¹⁰Mbola niteny tamin’i Ahaza ihany NY TOMPO hoe:

¹¹Mangataha famantarana avy amin’NY TOMPO Andriamanitrao; eny, mangataha na ho avy amin’ny lalina*, any amin’ny fitoeran’ny maty*, na avy any amin’ny avo, any ambony indrindra any.

¹²Hoy anefa i Ahaza: Tsy hangataka aho, tsy haka fanahy NY TOMPO aho.

¹³Dia hoy Isaia: Mihainoa ary, ry taranak’i Davida! Heverinareo ho zavatra kely foana va ny hanasatra ny olona no mbola hanasatra an’Andriamanitro koa ianareo?

¹⁴Noho izany dia ny Tompo no hanome famantarana ho anareo: Indro, hanana anaka ny virijiny ka hiteraka zazalahy; ny anarany hataony hoe Imanoela, izany hoe: Amintsika Andriamanitra.

¹⁵Rehefa mahalala handa ny ratsy sy hifidy ny tsara ny zaza dia rononomandry sy tantely no ho fihinany.

¹⁶Fa raha tsy mbola mahalala handa ny ratsy sy hifidy ny tsara akory izany zaza izany dia ho lao ny tanin’ireo mpanjaka roa maharaiki-tahotra anao ireo.

¹⁷NY TOMPO hahatonga aminao sy ny olonao ary ny fianakavian’ny rainao izay andro tsy mbola nisy toa azy hatramin’ny andro nialan’i Efraima tamin’ny Joda. Ny mpanjakan’i Asiria izany.

¹⁸Amin’izany andro izany, NY TOMPO hisiaka hiantso ny lalitra izay any amin’ny faran’ny onin’i Ejipta, sy ny renitantely izay any amin’ny tany Asiria;

¹⁹dia ho avy ireo ka samy hipetraka any amin’ny lohasahan-driaka, eny an-tsefatsefaky ny harambato, eny amin’ny fefy tsilo rehetra, ary eny amin’ny saha fiandrasana rehetra.

²⁰Amin’izany andro izany koa dia hoharatan’ny Tompo amin’ny hareza nofaina tany ampitan’ny ony Eofrata, miaraka amin’ny mpanjakan’i Asiria, ny loha sy ny volon-tongotra; ary hokakasany koa ny volombava.

²¹Amin’izany andro izany dia samy hiompy ombivavy kely sy ondry roa ny olona.

²²Ho be tokoa ny ronono azo avy amin’ireo ka hihinana rononomandry ny olona; rononomandry sy tantely no ho fihinan’ny olona sisa rehetra ao amin’ny tany.

²³Amin’izany andro izany dia ho rakotry ny anjavidy sy ny tsilo ny tany rehetra izay nisy voaloboka arivo fototra tokony ho arivo sekela.

²⁴Zana-tsipìka sy tsipìka no hoentin’izay miditra ao satria rakotry ny anjavidy sy ny tsilo ny tany rehetra.

²⁵Ary ny havoana rehetra izay nohavàna tamin’ny angady dia tsy ho sahinao diavina noho ny fahatahorana ny anjavidy sy ny tsilo: Ho falehan’ny omby sy ho voahitsakitsaky ny ondry aman’osy izany.