Read La Bible en Malgache Isaia 8 Bible Online

Isaia 8 - La Bible en Malgache bible

Isaia 8

¹Hoy NY TOMPO tamiko: Makà fafana lehibe ka soraty eo araka ny fanoratry ny olona hoe: Mahera-Salala-Hasy-Baza, izany hoe: Avy haingana ny famaboana, mihazakazaka ny fandrobana!

²Ary haka vavolombelona mahatoky Aho, dia i Oria mpisorona sy i Zakaria, zanakalahin’i Jeberekia.

³Nanakaiky ny mpaminanivavy aho; dia nanana anaka izy ka niteraka zazalahy. Ary hoy NY TOMPO tamiko: Aoka ny anarany hataonao hoe Mahera-Salala-Hasy-Baza[3].

⁴Satria raha tsy mbola mahatonona hoe: Dada! Neny! Io zazalahy io dia hoentina eo anatrehan’ny mpanjakan’i Asiria ny harenan’i Damaskosy sy ny fananan’i Samaria.

⁵Mbola niteny tamiko indray NY TOMPO hoe:

⁶Satria mandà ny rano Siloa izay misononoka ity firenena ity ary mifaly amin’i Rezina sy ny zanak’i Remalia

⁷dia indro, hampiakarin’ny Tompo hanafotra azy ny ranobe manonja amin’ny ony Eofrata, dia ny mpanjakan’i Asiria sy ny voninahiny rehetra. Ho tondraka ny renirano ary hihoarany ny morony rehetra;

⁸dia hiriotra mafy izy ka hipaoka ny Joda ary hanafotra sady mbola hisondrotra ihany mandra-pahatongany havozona. Ary ny fivelatry ny elany dia hanenika ny taninao, ry Imanoela ô[4]!

⁹Mangovita ianareo, ry firenena ô, fa mbola ho ringana ianareo! Mihainoa tsara, ry tany lavitra rehetra! Misikìna ianareo hiady, nefa ho ringana ihany! Eny, misikìna ianareo hiady, nefa ho ringana tanteraka.

¹⁰Makà saina ianareo hanaovana vinavinan’asa, nefa hofoanana izany! Milazà teny iray; fa tsy ho tanteraka tsy akory izany! Fa aminay Andriamanitra.

¹¹Fa izao no nolazain’NY TOMPO tamiko raha nihazona ahy mafy ny tanany ka nanariny tsy handeha amin’ny falehan’ity firenena ity aho:

¹²Aza mba lazainareo ho tetika fikomiana izay lazain’ity firenena ity ho tetika fikomiana; aza matahotra izay atahorany ianareo na mangorohoro noho ny aminy.

¹³Andriamanitra, Tompon’izao rehetra izao, no hamasino; Izy ihany no tokony hatahoranareo, ary Izy ihany no tokony hampangovitra anareo.

¹⁴Dia ho fitoerana masina ho anareo Izy, fa ho vato mahatafintohina sy vatolampy mahasolafaka kosa ho an’ny firenena roa amin’ny Israely, sady ho fandrika sy tonta ho an’ny mponin’i Jerosalema.

¹⁵Maro no ho tafintohina Aminy sady ho lavo sy ho torotoro ary ho voafandrika sy ho voasambotra.

¹⁶Tehirizo ny teny vavolombelona, ary asio tombo-kase ny lalàna eo amin’ny mpianatro.

¹⁷Hiandry NY TOMPO izay manafina ny tavany amin’ny taranak’i Jakoba aho; hanantena Azy ihany aho.

¹⁸Indreto izaho sy ireo zaza nomen’NY TOMPO ahy, fambara sy fahagagana ao amin’ny Israely avy amin’Andriamanitra, Tompon’izao rehetra izao, izay monina ao amin’ny tendrombohitra Ziona*.

¹⁹Raha misy milaza aminareo hoe: Makà saina amin’ny olona izay mpiantso ny fanahin’ny maty sy ny mpanandro, izay mingonongonona sy miboredidredika! Moa tsy Andriamaniny va no tokony hilan’ny olona saina? Moa hila saina amin’ny maty ho an’ny velona va izy?

²⁰Ho amin’ny lalàna sy ny teny vavolombelona ihany! Raha tsy miteny araka izany teny izany izy dia ho olona izay tsy hiposahan’ny fahazavan’ny maraina.

²¹Hivezivezy amin’ny tany amin’ny fahantrana sy ny mosary ny olona; ary rehefa mosarena izy dia ho sosotra ka hanozona ny Mpanjakany sy Andriamaniny ary hiandrandra izy.

²²Hijery ny tany izy avy eo ka indro, fahoriana sy fahamaizinana ary tebiteby mampanjombona no eo; ary horoahina ho any amin’ny haizim-pito izy.

²³Tsy hanjombona mandrakariva anefa ilay efa niharam-pahoriana. Taloha dia natao tsinontsinona ny tany Zebolona sy ny tany Naftaly; fa amin’ny ho avy kosa dia homeny voninahitra ny lalana amoron-dranomasina, any andafin’i Jordana, dia any Galilia, tanin’ny Jentilisa*.