Read La Bible en Malgache Isaia 9 Bible Online

Isaia 9 - La Bible en Malgache bible

Isaia 9

¹Ny olona izay mandeha amin’ny maizina dia mahita mazava lehibe; izay mitoetra amin’ny tanin’ny aloky ny fahafatesana no amirapiratan’ny mazava.

²Hamaroinao ity firenena ity ary ampitomboinao ny hafaliany. Mifaly eo anatrehanao tahaka ny hafaliana amin’ny fararano izy; eny, tahaka ny fibitahan’ny olona raha mizara babo.

³Fa ny bao fitondrany entana sy ny tsorakazo nikapohana ny lamosiny, izay tsorakazon’ny mpampiasa azy, dia tapahinao tahaka ny tamin’ny andro namelezana ny Midianita.

⁴Fa ny kiraron’izay mivatravatra fandeha amin’ny ady sy ny fitafiana mihosin-dra dia samy hodorana, eny, ho kitay hatohoka amin’ny afo izany.

⁵Fa Zaza no teraka ho antsika, Zazalahy no omena antsika; ary ny fahefana dia eo an-tsorony; ny anarany atao hoe Mpanolotsaina mahagaga, Andriamanitra mahery, Rain’ny mandrakizay, Andrianan’ny fiadanana.

⁶Ny handrosoan’ny fiandrianana sy ny fiadanana dia tsy hanam-pahataperana eo amin’ny sezafiandrianan’i Davida sy ny fanjakany mba hampiorenana sy hampitoerana azy amin’ny fitsarana marina hatramin’izao ka ho mandrakizay. Izany no hotanterahin’ny fahasaro-piaron’Andriamanitra, Tompon’izao rehetra izao.

⁷Mandefa teny ho an’i Jakoba ny Tompo ka mihatra amin’ny Israely izany.

⁸Ho fantatr’izy iray firenena izany, dia i Efraima sy ny mponina any Samaria izay miteny amin’ny fiavonavonany sy ny fireharehan’ny fony hoe:

⁹Biriky no efa nirodana fa vato voapaika kosa no harafitsika; aviavy no voakapa fa sedera kosa no hasolontsika azy.

¹⁰Manandratra ny rafilahin’i Rezina hihoatra azy NY TOMPO ary mampirisika ny fahavalony,

¹¹dia ny Arameana avy any atsinanana sy ny Filistina avy any andrefana; misanasana vava handrapaka ny Israely ireo. Kanefa na eo aza izany rehetra izany dia tsy mbola afaka ihany ny fahatezerany fa mbola miainga ihany ny tanany.

¹²Tsy miverina amin’Izay mamely azy ny olona; eny, tsy mba tadiaviny Andriamanitra, Tompon’izao rehetra izao.

¹³Noho izany dia hofongoran’NY TOMPO amin’ny Israely ao anatin’ny indray andro monja ny loha sy ny rambo, ny sampana palma sy ny zozoro.

¹⁴Ny loholona sy ny olo-manankaja no loha, ny mpaminany izay mampianatra lainga no rambo.

¹⁵Fa ny mpitarika ity firenena ity no tonga mpampivily azy, ary izay tarihiny dia voatelina.

¹⁶Noho izany dia tsy mahafaly NY TOMPO ny zatovony, ary tsy iantrany ny kamboty sy ny mpitondratena ao aminy satria samy tsy mino sy mpanao ratsy izy, ary milaza hadalana ny vava rehetra. Kanefa na eo aza izany rehetra izany dia tsy mbola afaka ihany ny fahatezerany fa mbola miainga ihany ny tanany.

¹⁷Fa mandoro tahaka ny afo ny haratsiam-panahy, mandevona ny tsilo sy ny anjavidy ary mampirehitra ny ala mikirindro ka mitambolimbolina ny setroka misavoana.

¹⁸Noho ny fahatezeran’Andriamanitra, Tompon’izao rehetra izao, dia kilan’ny afo ny tany, ary tahaka ny kitay atohoka amin’ny afo ny olona. Tsy misy olona miantra ny rahalahiny.

¹⁹Mandripaka eny ankavanana izy nefa noana ihany; mandany eny ankavia izy nefa tsy voky ihany; samy mihinana ny nofon-tsandriny avy izy rehetra.

²⁰Eny, mihinana an’i Efraima i Manase ary mihinana an’i Manase kosa i Efraima; miara-mamely an’i Joda izy roa tonta. Kanefa na izany rehetra izany aza tsy mbola afaka ihany ny fahatezerany fa mbola miainga ihany ny tanany.