Read La Bible en Malgache Levitikosy 1 Bible Online

Levitikosy 1 - La Bible en Malgache bible

Levitikosy 1

¹NY TOMPO niantso an’i Mosesy ka niteny taminy avy tao amin’ny tranolay fihaonana* hoe:

²Mitenena amin’ny Zanak’Israely hoe: Raha misy aminareo manolotra biby fiompy ho fanatitra ho an’NY TOMPO dia omby na ondry na osy no hatolotrareo.

³Raha omby no atolony ho fanatitra dorana manontolo dia lahy tsy misy kilema no hoentiny; eo anoloan’ny varavaran’ny tranolay fihaonana no hanaterany azy mba hankasitrahana azy eo anatrehan’NY TOMPO.

⁴Hametraka ny tanany eo amin’ny lohan’ny fanatitra dorana manontolo izy, dia hahazoany fankasitrahana izany, hanaovana fanavotana ho azy.

⁵Dia hamono ny omby eo anatrehan’NY TOMPO izy ary ireo mpisorona, zanak’i Arona, dia hanatitra ny ra ka hamafy azy manodidina ny alitara izay eo anoloan’ny varavaran’ny tranolay fihaonana.

⁶Hendahiny ny hoditry ny fanatitra dorana manontolo ka horasainy tsara.

⁷Ary ireo zanak’i Arona mpisorona dia hanisy afo eo ambonin’ny alitara ka handahatra kitay eo amin’ny afo.

⁸Ireo mpisorona, zanak’i Arona, dia handahatra izay voarasa mbamin’ny lohany sy ny jaborany eo ambonin’ny kitay eo amin’ny afo izay eo ambonin’ny alitara;

⁹nefa ny taovany sy ny tongony kosa dia hosasany amin’ny rano. Hodoran’ny mpisorona ho fofona eo ambonin’ny alitara ireo rehetra ireo; fanatitra dorana manontolo izany, fanatitra levonina amin’ny afo ho hanitra ankasitrahana ho an’NY TOMPO.

¹⁰Raha ondry na osy no atolony ho fanatitra dorana manontolo dia lahy tsy misy kilema no hatolony.

¹¹Hamono azy eo avaratry ny alitara eo anatrehan’NY TOMPO izy, ary ireo mpisorona, zanak’i Arona, dia hamafy ny ra manodidina ny alitara.

¹²Horasainy tsara ilay fanatitra mbamin’ny lohany sy ny jaborany ka halahatry ny mpisorona eo ambonin’ny kitay izay eo amin’ny afo eo ambonin’ny alitara;

¹³nefa ny taovany sy ny tongony kosa dia hosasany amin’ny rano. Hoentin’ny mpisorona ireo rehetra ireo ka hodorany ho fofona eo ambonin’ny alitara. Ho fanatitra dorana manontolo izany, dia fanatitra levonina amin’ny afo ho hanitra ankasitrahana ho an’NY TOMPO.

¹⁴Raha vorona no atolony ho an’NY TOMPO ho fanatitra dorana manontolo dia domohina na voromailala no hatolony ho fanatitra.

¹⁵Haterin’ny mpisorona ho eo amin’ny alitara izany, dia hotapahiny ny lohany ka hodorany ho fofona eo ambonin’ny alitara sady hofiazany eo amin’ny rindrin’ny alitara ny rany.

¹⁶Hesoriny ny takorobabony sy ny volony dia hariany eo atsinanan’ny alitara, eo amin’ny fitoeran-davenona.

¹⁷Hosamahiny ny elany nefa tsy hotapahiny hiala amin’ny vatany; ary ny mpisorona dia handoro azy ho fofona eo ambonin’ny alitara, ambonin’ny kitay eo amin’ny afo; fanatitra dorana manontolo izany, fanatitra levonina amin’ny afo ho hanitra ankasitrahana ho an’NY TOMPO.