Read La Bible en Malgache Levitikosy 10 Bible Online

Levitikosy 10 - La Bible en Malgache bible

Levitikosy 10

¹Ary i Nadaba sy i Abiho, zanak’i Arona, dia samy naka ny fitondrana afony avy ary nanisy afo tao anatiny sy ditin-kazo manitra teo amboniny, dia nanatitra afo tsy izy teo anatrehan’NY TOMPO, izay tsy nandidiany azy.

²Ary nisy afo nivoaka avy teo anatrehan’NY TOMPO ka nahafaty azy roa lahy; maty teo anatrehan’NY TOMPO izy ireo.

³Hoy i Mosesy tamin’i Arona: Izany ilay nolazain’NY TOMPO hoe: Amin’izay akaiky Ahy no hisehoako ho masina ary eo anatrehan’ny olona rehetra no hampisehoako ny voninahitro. Dia sina i Arona.

⁴Ary i Mosesy dia niantso an’i Misaela sy i Elzafana, zanak’i Oziela, rahalahin-drain’i Arona, ka niteny taminy hoe: Manatòna ka ento hiala teo anoloan’ny fitoerana masina ny rahalahinareo ho eny ivelan’ny toby.

⁵Dia nanatona izy roa lahy ka nitondra azy, mbola miakanjo ny akanjo lavany ihany, ho eny ivelan’ny toby, araka izay nolazain’i Mosesy.

⁶Ary hoy i Mosesy tamin’i Arona sy i Eleazara ary Itamara, zanany lahy: Aza asaritaka ny volonareo na rovitina ny akanjonareo fandrao ho faty koa ianareo sady hisy fahatezerana hahatratra ny fiangonana manontolo; fa aoka ny rahalahinareo, dia ny taranak’Israely rehetra, no hitomany noho ny afo izay narehitry NY TOMPO.

⁷Aza miala eo anoloan’ny varavaran’ny tranolay fihaonana* fandrao maty ianareo satria eo aminareo ny diloilo fanosoran’NY TOMPO. Dia nanatanteraka ny tenin’i Mosesy izy ireo.

⁸NY TOMPO niteny tamin’i Arona hoe:

⁹Aza misotro divay na toaka ianao na ny zanakao, raha miditra ao amin’ny tranolay fihaonana*, mba tsy ho faty ianareo. Ho lalàna maharitra amin’ny taranakareo fara aman-dimby izany,

¹⁰mba hahaizanareo manavaka ny masina sy ny tsy masina, ny madio sy ny tsy madio,

¹¹ary mba hampianaranareo ny Zanak’Israely ny didy rehetra izay nasain’NY TOMPO holazain’i Mosesy taminy.

¹²Ary hoy i Mosesy tamin’i Arona sy i Eleazara ary Itamara zanany lahy sisa tavela: Raiso ny fanatitra avy amin’ny zavamaniry izay sisa amin’ny fanatitra levonina amin’ny afo ho an’NY TOMPO ka hano eo anilan’ny alitara izany nefa aza asiana masirasira satria zavatra tena masina izy io.

¹³Hohaninareo eo amin’izay fitoerana masina izany fa anjaranao sy ny zanakao avy amin’ny fanatitra levonina amin’ny afo ho an’NY TOMPO. Izany no nandidiany ahy.

¹⁴Ny tratrany natao fanatitra asandratra sy ny feny nalaina avy tamin’ny fanatitra koa dia hohaninareo eo amin’izay toerana madio, dia ianao mbamin’ny zanakao lahy sy ny zanakao vavy, fa nomena ho anjaranao sy ny zanakao ireo avy amin’ny fanati-pihavanana aterin’ny Zanak’Israely izany.

¹⁵Ny feny nalaina avy tamin’ny fanatitra sy ny tratrany natao fanatitra asandratra mbamin’ny jaborany izay fanatitra levonina amin’ny afo dia hoentiny mba hatao fanatitra asandratra eo anatrehan’NY TOMPO. Ho anao sy ny zanakao koa ireo, ho anjaranareo maharitra, araka izay nandidian’NY TOMPO.

¹⁶Dia nitady fatratra ny osilahy izay natao fanatitra fanadiovana i Mosesy, kanjo efa voadoro izany ka tezitra tamin’ny zanak’i Arona sisa tavela izy, dia tamin’i Eleazara sy Itamara ka hoy izy:

¹⁷Nahoana no tsy nohaninareo teo amin’ny fitoerana masina ny fanatitra fanadiovana? Fa zavatra tena masina izany ary efa nomeny anareo mba hitondranareo ny heloky ny fiangonana, hanaovana fanavotana ho azy eo anatrehan’NY TOMPO.

¹⁸Indro, tsy nampidirina tao anatin’ny fitoerana masina ny rany, nefa tokony ho nohaninareo teo amin’ny fitoerana masina mihitsy izany, araka izay nandidiako.

¹⁹Ary hoy i Arona tamin’i Mosesy: Indro, androany no nanoloran’ny olona ny fanatitra fanadiovana azy sy ny fanatitra dorana manontolo avy taminy teo anatrehan’NY TOMPO; koa amin’izao zavatra manjo ahy izao, raha toa ka nihinana ny fanatitra fanadiovana aho androany, moa ho tsara teo imason’NY TOMPO va izany?

²⁰Rehefa ren’i Mosesy izany dia nankasitrahany.