Read La Bible en Malgache Levitikosy 11 Bible Online

Levitikosy 11 - La Bible en Malgache bible

Levitikosy 11

¹Ary hoy NY TOMPO tamin’i Mosesy sy i Arona:

²Mitenena amin’ny Zanak’Israely hoe: Ireto avy no azonareo hanina amin’ny biby rehetra ambonin’ny tany:

³Izay biby rehetra mivaky kitro ka misaraka tsara ny kitrony sady mandinika no ho fihinanareo.

⁴Kanefa amin’izay mandinika sy mivaky kitro dia ireto kosa no tsy ho fihinanareo: Ny rameva, satria mandinika ihany izy nefa tsy mba mivaky kitro: Maloto aminareo izy;

⁵ny hiràka, satria mandinika ihany izy nefa tsy mba mivaky kitro: Maloto aminareo izy;

⁶ny bitro, satria mandinika ihany izy nefa tsy mba mivaky kitro; maloto aminareo izy;

⁷ny kisoa, satria mivaky kitro ihany izy sady misaraka tsara ny kitrony nefa tsy mba mandinika: Maloto aminareo izy.

⁸Tsy ho fihinanareo ny henan’ireny ary tsy hokasihinareo akory ny fatiny: Zava-maloto aminareo ireny.

⁹Amin’izay rehetra ao anatin’ny rano dia ireto no ho fihinanareo: Izay rehetra misy vombony sy kirany ao anaty rano, na ao anatin’ny ranomasina na ao anatin’ny ony, no ho fihinanareo;

¹⁰fa izay rehetra tsy misy vombony na kirany kosa, na ao anatin’ny ranomasina na ao anatin’ny ony na amin’izay rehetra mihetsiketsika ao anaty rano sy amin’izay zavamananaina ao anaty rano, dia ho fahavetavetana aminareo.

¹¹Eny, ho fahavetavetana aminareo ireny; tsy ho fihinanareo ny nofony ary hataonareo ho zava-betaveta ny fatiny.

¹²Izay rehetra ao anaty rano ka tsy misy vombony na kirany dia ho zava-betaveta aminareo.

¹³Ary izao no ho zava-betaveta aminareo amin’ny vorona ka tsy ho fihinanareo: Ny vaotoro, ny voromahery sy ny ankoay,

¹⁴ny papango sy ny voromahery isan-karazany,

¹⁵ny goaika rehetra isan-karazany,

¹⁶ny aotirisy, ny tararaka, ny vorondriaka sy ny hitsikitsika isan-karazany,

¹⁷ny vorondolo, ny manarana, ny vorondolo lehibe,

¹⁸ny ibisy sy ny sama, ny vaotoro madinika,

¹⁹ny vano sy ny vanobe isan-karazany ary ny takodara sy ny ramanavy.

²⁰Ny zava-mandady rehetra izay manana elatra sady mandia tongotra efatra dia ho zava-betaveta aminareo;

²¹nefa kosa ho fihinanareo amin’ny zava-mandady manana elatra sady mandia tongotra efatra, izay manan-tongotra lava ambonin’ny faladiany hitsipihany eo amin’ny tany.

²²Amin’ireny dia ireto no ho fihinanareo: Ny valala sy ny sopanga isan-karazany.

²³Fa ny biby mandady hafa rehetra izay manana elatra sady mandia tongotra efatra ankoatra ireo kosa dia ho zava-betaveta aminareo.

²⁴Ireo no ho zava-maloto aminareo; koa izay rehetra mikasika ny fatiny dia haloto mandra-paharivan’ny andro.

²⁵Hanasa ny fitafiany izay rehetra mitondra ny fatiny ka haloto mandra-paharivan’ny andro.

²⁶Ny biby rehetra izay mivaky kitro nefa tsy misaraka tsara ny kitrony sady tsy mandinika dia ho zava-maloto aminareo; haloto izay rehetra mikasika azy.

²⁷Izay rehetra mandeha amin’ny faladiany, amin’ny biby rehetra izay mandia tongotra efatra, dia zava-maloto aminareo; haloto mandra-paharivan’ny andro izay rehetra mikasika ny fatiny.

²⁸Hanasa ny fitafiany izay mitondra ny fatiny ka haloto mandra-paharivan’ny andro; ho zava-maloto aminareo ireny.

²⁹Amin’ny biby izay mandady na mikisaka amin’ny tany kosa dia ireto no haloto aminareo: Ny jaboady, ny totozy ary ny androngo isan-karazany,

³⁰ny matahotrandro, ny sitry, ny tana, ary ny antsiantsy.

³¹Ireo no maloto aminareo amin’ny biby rehetra izay mandady na mikisaka; izay rehetra mikasika ny fatin’ireo dia haloto mandra-paharivan’ny andro.

³²Izay zavatra rehetra ilatsahan’ny fatin’ireo, na fanaka hazo na fitafiana na hoditra na kitapo, izay mety ho fitaovana fampiasa, dia haloto ka tsy maintsy hatao anaty rano ary haloto mandra-paharivan’ny andro izy vao hadio.

³³Momba ny vilany tany rehetra izay ilatsahan’ny fatin’ireo dia haloto izay ao anatiny na inona na inona; koa hovakinareo ny vilany.

³⁴Ny hanina fihinana rehetra izay asiana rano dia haloto; ny fisotro rehetra izay sotroina koa dia haloto, na fitaovana inona na fitaovana inona no nisy azy.

³⁵Haloto izay zavatra rehetra ilatsahan’ny fatin’ireo, na fanendasana na vilany mirakotra, ka hopotipotehina; fa maloto ireny ary ho zava-maloto aminareo.

³⁶Kanefa ny loharano na ny lavaka famorian-drano izay misy rano dia hadio ihany; fa izay mikasika ny fatin-javatra eo no haloto.

³⁷Raha misy fatin’ireo latsaka amin’ny voan-javatra famafy, izay efa hafafy, dia hadio ihany izany.

³⁸Fa raha misy voan-javatra nalona tamin’ny rano ka ilatsahan’ny fatiny dia ho zava-maloto aminareo izany.

³⁹Raha misy maty izay biby fihinanareo dia haloto mandra-paharivan’ny andro izay mikasika ny fatiny.

⁴⁰Hanasa ny fitafiany izay mihinana amin’ny fatiny ka haloto mandra-paharivan’ny andro; ary izay mitondra ny fatiny dia hanasa ny fitafiany sady haloto mandra-paharivan’ny andro.

⁴¹Ny biby rehetra izay mandady na mikisaka amin’ny tany dia ho zava-betaveta aminareo ka tsy azo hanina.

⁴²Izay rehetra mandady amin’ny kibony sy izay rehetra mandia tongotra efatra ary izay rehetra maro tongotra, izany hoe ny biby rehetra izay mandady na mikisaka amin’ny tany, dia tsy azo hanina fa zava-betaveta ireny.

⁴³Aza mametaveta ny tenanareo amin’izay biby mandady na mikisaka; ary aza mandoto ny tenanareo aminy mba tsy hahaloto anareo.

⁴⁴Fa Izaho no TOMPO Andriamanitrareo, koa manamasìna ny tenanareo dia ho masina ianareo satria masina Aho; ary aza mandoto ny tenanareo amin’izay zavatra mandady na mikisaka amin’ny tany.

⁴⁵Fa Izaho no TOMPO izay nitondra anareo niakatra avy tany amin’ny tany Ejipta mba ho Andriamanitrareo ka ho masina ianareo satria masina Aho.

⁴⁶Izany no lalàna momba ny biby sy ny vorona, ny zavamananaina rehetra izay mihetsiketsika ao anaty rano ary ny zavamananaina rehetra izay mandady na mikisaka amin’ny tany,

⁴⁷mba hanavahana ny maloto sy ny madio ary ny biby azo hanina sy tsy azo hanina.