Read La Bible en Malgache Levitikosy 17 Bible Online

Levitikosy 17 - La Bible en Malgache bible

Levitikosy 17

¹Ary NY TOMPO niteny tamin’i Mosesy hoe:

²Mitenena amin’i Arona sy ireo zanany ary ny Zanak’Israely rehetra hoe: Izao no didy nomen’NY TOMPO:

³Na iza na iza amin’ny taranak’Israely no mamono omby na zanak’ondry na osy, na eo an-toby na any ivelan’ny toby,

⁴ka tsy mitondra azy ho eo anoloan’ny varavaran’ny tranolay fihaonana*, hanaterana azy ho fanatitra ho an’NY TOMPO eo anoloan’ny tabernakelin’NY TOMPO, dia ho meloka noho ny ra nalatsany io olona io ka hesorina tsy ho amin’ny fireneny izy.

⁵Araka izany dia hoentin’ny Zanak’Israely ho an’NY TOMPO eo anoloan’ny varavaran’ny tranolay fihaonana ho amin’ny mpisorona ny zavatra vonoiny ho fanatitra izay famonony tany an-tsaha; dia hateriny ho fanati-pihavanana ho an’NY TOMPO izany.

⁶Ary ny mpisorona dia hamafy ny ra amin’ny alitaran’NY TOMPO eo anoloan’ny varavaran’ny tranolay fihaonana, dia handoro ny jaborany ka ho fofona manitra ankasitrahana ho an’NY TOMPO izany.

⁷Tsy hanolotra intsony ny fanatiny ho an’ny Seìrima[2] izay nijangajangany izy. Ho lalàna maharitra amin’ny taranany fara aman-dimby izany.

⁸Ary lazao aminy hoe: Na iza na iza amin’ny taranak’Israely na amin’ny vahiny izay monina eo aminareo no manolotra fanatitra dorana manontolo na fanatitra hafa alatsa-dra

⁹ka tsy mitondra azy ho eo anoloan’ny varavaran’ny tranolay fihaonana hanatitra azy ho an’NY TOMPO dia hesorina tsy ho amin’ny fireneny.

¹⁰Ary na iza na iza amin’ny taranak’Israely na amin’ny vahiny izay monina eo aminareo, no mihinan-dra, na ra inona na ra inona dia ny Tavako no hifanandrina amin’ilay olona mihinan-dra ka hesorina tsy ho amin’ny fireneny izy.

¹¹Fa ny ain’ny nofo dia ao amin’ny ra; ary nomeko anareo izany hatao ambonin’ny alitara mba hanaovana fanavotana ho anareo satria ny ra, amin’ny aina, no manao fanavotana.

¹²Koa izany no nilazako tamin’ny Zanak’Israely hoe: Aza misy mihinan-dra ianareo na ny vahiny izay monina eo aminareo.

¹³Na iza na iza amin’ny Zanak’Israely na amin’ny vahiny eo aminy no mihaza ka mahazo biby na vorona izay fihinana, dia hararany amin’ny tany ny rany ka hototofany.

¹⁴Fa ny amin’ny ain’ny zavamananaina rehetra dia ny rany no ainy, koa izany no nilazako tamin’ny Zanak’Israely hoe: Aza mihinana hena mbola misy ra fa ny rany no ain’ny zava-mananaina rehetra, koa izay rehetra mihinana azy dia haringana.

¹⁵Ny olona rehetra, na tompon-tany na vahiny, izay mihinana izay maty ho azy na izay noviraviraim-biby, dia hanasa ny fitafiany sy handro amin’ny rano ary haloto mandra-paharivan’ny andro izy vao hadio.

¹⁶Fa raha tsy manasa ny fitafiany sy mandro izy dia ho meloka.