Read La Bible en Malgache Levitikosy 18 Bible Online

Levitikosy 18 - La Bible en Malgache bible

Levitikosy 18

¹Ary NY TOMPO niteny tamin’i Mosesy hoe:

²Mitenena amin’ny Zanak’Israely hoe: Izaho no TOMPO Andriamanitrareo.

³Aza manao ny fanaon’ny tany Ejipta izay nonenanareo; aza manao ny fanaon’ny tany Kanana izay ampidirako anareo ary aza manaraka ny fombany.

⁴Ny fitsipiko no hotanterahinareo ary ny didiko no hotandremanareo, harahinareo izany. Izaho no TOMPO Andriamanitrareo.

⁵Tandremo ny didiko sy ny fitsipiko; fa raha mahatandrina izany ny olona dia ho velona amin’izany izy. Izaho no TOMPO.

⁶Aoka tsy hisy handry amin’izay havany akaiky ianareo: Izaho no TOMPO.

⁷Aza mandry amin’izay nandrian’ny rainao fa reninao izy koa aza mandry aminy.

⁸Aza mandry amin’ny renikelinao fa nandrian’ny rainao izy.

⁹Aza mandry amin’ny anabavinao, izay zanaky ny rainao na zanaky ny reninao, na teraka tao an-trano na teraka tany ivelany; aza mandry aminy.

¹⁰Aza mandry amin’ny zanakavavin’ny zanakao lahy na ny zanakavavin’ny zanakao vavy; fa avy aminao no niavian’izy roa.

¹¹Aza mandry amin’ny zanakavavin’ny renikelinao izay teraky ny rainao; fa anabavinao izy; aza mandry aminy.

¹²Aza mandry amin’ny anabavin-drainao fa havan-drainao akaiky izy.

¹³Aza mandry amin’ny rahavavin-dreninao fa havan-dreninao akaiky izy.

¹⁴Aza mandry amin’izay nandrian’ny rahalahin-drainao; aza mila ny vadiny fa vadin’ny rahalahin-drainao izy.

¹⁵Aza mandry amin’ny vinantovavinao fa vadin’ny zanakao lahy izy, koa aza mandry aminy.

¹⁶Aza mandry amin’ny vadin’ny rahalahinao fa nandrian’ny rahalahinao izy.

¹⁷Aza mandry amin’ny vehivavy sy ny zanany vavy; aza maka ny zanakavavin’ny zanany lahy na ny zanakavavin’ny zanany vavy, handry aminy; havany akaiky ireo ka fahavetavetana izany.

¹⁸Aza mampakatra vehivavy ho rafin’ny rahavaviny izay mbola velona.

¹⁹Aza mila vehivavy mararin’ny fadimbolany handry aminy.

²⁰Aza mandry amin’ny vadin’ny namanao, handoto ny tenanao aminy.

²¹Aza misy arosonao ho sorona ho an’i Moloka ny zanakao; ary aza manamavo ny anaran’Andriamanitrao: Izaho no TOMPO.

²²Aza mandry amin’ny lehilahy tahaka ny fandry amin’ny vehivavy; fa fahavetavetana izany.

²³Aza mandry amin’ny biby handoto ny tenanao aminy; aoka tsy hisy vehivavy hanaiky handrian’ny biby; fa zavatra fady indrindra izany.

²⁴Aza mandoto ny tenanareo amin’izany zavatra izany akory fa ny Jentilisa* izay efa horoahiko eo anoloanareo no nandoto ny tenany tamin’ireo rehetra ireo.

²⁵Maloto ny tany noho izany ka hamaly azy Aho noho ny helony, ary haloan’ny tany ny mponina ao.

²⁶Fa mitandrema ny didiko sy ny fitsipiko ianareo koa aza misy ataonareo izany fahavetavetana izany, na ny tompon-tany na ny vahiny izay monina eo aminareo;

²⁷fa izany fahavetavetana rehetra izany no nataon’ny tompon-tany izay talohanareo ka naloto ny tany,

²⁸mba tsy handotoanareo ny tany ka tsy handoavany anareo, tahaka ny nandoavany ny firenena izay talohanareo.

²⁹Fa izay rehetra manatanteraka izany fahavetavetana izany na dia iray aza dia hesorina tsy ho amin’ny fireneny.

³⁰Koa dia tandremo izay asaiko tandremana mba tsy hisy hataonareo akory izany fanao vetaveta izany, izay nataon’ny olona talohanareo. Aza mandoto ny tenanareo amin’ireo. Izaho no TOMPO Andriamanitrareo.