Read La Bible en Malgache Levitikosy 2 Bible Online

Levitikosy 2 - La Bible en Malgache bible

Levitikosy 2

¹Raha misy manolotra fanatitra avy amin’ny zavamaniry ho an’NY TOMPO dia koba tsara toto no hataony fanatitra ary handraraka diloilo sy hanisy ditin-kazo manitra eo amboniny izy.

²Hitondra izany ho any amin’ireo mpisorona zanak’i Arona izy, dia handraofan’izy ireo eran’ny tanana ila ny koba sy ny diloilon’ny fanatitra mbamin’ny ditin-kazo manitra rehetra. Hodoran’ny mpisorona ho fofona eo ambonin’ny alitara izany fanati-pahatsiarovana avy aminy izany. Fanatitra levonina amin’ny afo ho hanitra ankasitrahana ho an’NY TOMPO izany.

³Ny sisa amin’ny fanatitra avy amin’ny zavamaniry dia ho an’i Arona sy ireo zanany; anjara tena masina avy amin’ny fanatitra levonina amin’ny afo ho an’NY TOMPO izany.

⁴Raha manolotra fanatitra avy amin’ny zavamaniry voaendy tamin’ny fanendasa-mofo ianao dia aoka ho mofo tsy misy masirasira vita amin’ny koba tsara toto sady voaharo diloilo, miampy mofo manify tsy misy masirasira sady voahosotra diloilo.

⁵Raha fanatitra avy amin’ny zavamaniry voaendy tamin’ny lapoaly no fanatitrao dia aoka ho koba tsara toto voaharo diloilo sady tsy misy masirasira.

⁶Hovakivakinao sy horarahanao diloilo ilay izy; fanatitra avy amin’ny zavamaniry izany.

⁷Raha fanatitra avy amin’ny zavamaniry nahandroina tamin’ny vilany no atolotrao dia koba tsara toto asiana diloilo no atao.

⁸Hoentinao ho an’NY TOMPO ny fanatitra avy amin’ny zavamaniry izay vita amin’ireo zavatra ireo; rehefa voaatitra eo amin’ny mpisorona ireo dia hoentiny eo amin’ny alitara.

⁹Ary haka ny fanati-pahatsiarovana avy amin’ny fanatitra avy amin’ny zavamaniry ny mpisorona ka handoro azy ho fofona eo ambonin’ny alitara. Fanatitra levonina amin’ny afo, ho hanitra ankasitrahana ho an’NY TOMPO, izany.

¹⁰Ny sisa amin’ny fanatitra avy amin’ny zavamaniry dia ho an’i Arona sy ny zanany, ho anjara tena masina avy amin’ny fanatitra levonina amin’ny afo ho an’NY TOMPO.

¹¹Ny fanatitra avy amin’ny zavamaniry rehetra izay atolotrareo ho an’NY TOMPO dia aza asiana masirasira; fa ny masirasira sy ny tantely dia samy tsy hakanareo hodorana ho fofona ho fanatitra levonina amin’ny afo ho an’NY TOMPO.

¹²Ho fanatitra voaloham-bokatra ihany no hahazoanareo manolotra ireo ho an’NY TOMPO, kanefa tsy hakarina eo ambonin’ny alitara ho hanitra ankasitrahana izany.

¹³Samy asio sira avokoa ny fanatitra avy amin’ny zavamaniry atolotrao rehetra; ny siran’ny faneken’Andriamanitrao dia aza atsahatra amin’ny fanatitra avy amin’ny zavamaniry atolotrao; fa manolora sira miaraka amin’ny fanatitrao rehetra.

¹⁴Raha manolotra fanatitra avy amin’ny zavamaniry ho an’NY TOMPO avy amin’ny voaloham-bokatra ianao dia salohim-bary voaendy amin’ny afo, lango avy amin’ny salohy vao, no hatolotrao ho fanatitra avy amin’ny zavamaniry avy amin’ny voaloham-bokatrao.

¹⁵Hasianao diloilo izany sady hasianao ditin-kazo manitra eo amboniny. Fanatitra avy amin’ny zavamaniry izany.

¹⁶Hodoran’ny mpisorona ho fofona ny fanati-pahatsiarovana avy amin’ny lango sy avy amin’ny diloilo ary ny ditin-kazo manitra rehetra. Fanatitra levonina amin’ny afo ho an’NY TOMPO izany.