Read La Bible en Malgache Levitikosy 21 Bible Online

Levitikosy 21 - La Bible en Malgache bible

Levitikosy 21

¹Ary NY TOMPO niteny tamin’i Mosesy hoe: Mitenena amin’ireo mpisorona, zanak’i Arona hoe: Aoka ny mpisorona tsy handoto ny tenany amin’izay maty amin’ny mpiray firenena aminy,

²afa-tsy amin’ny havany akaiky, dia ny reniny, ny rainy, ny zanany lahy, ny zanany vavy ary ny rahalahiny;

³ary amin’ny fatin’ny anabaviny mbola virijiny izay havany akaiky satria mbola tsy manambady, no ahazoany mandoto ny tenany.

⁴Tsy hiditra am-paty handoto ny tenany izy satria lehibe eo amin’ny fireneny.

⁵Tsy hanasola ny tampon-dohany izy na hanaratra ny volombavany na hitetika ny tenany.

⁶Ho masina ho an’Andriamaniny izy ireo ka tsy hanamavo ny anaran’Andriamaniny; fa mpanolotra ny fanatitra levonina amin’ny afo ho an’NY TOMPO izy, dia ny hanin’Andriamaniny, ka ho masina izy.

⁷Aoka izy tsy hanambady izay vehivavy mpijangajanga na izay voaloto, ary aoka tsy hanambady vehivavy izay efa nisaoran’ny lahy; fa masina ho an’Andriamaniny ny mpisorona.

⁸Dia hamasino izy fa ny hanin’Andriamanitrao no ateriny; ho masina aminao izy fa Izaho TOMPO dia masina ka manamasina anareo.

⁹Raha ny zanakavavin’ny mpisorona no mandoto ny tenany amin’ny fijangajangana dia efa manamavo ny rainy izy ka hodorana amin’ny afo.

¹⁰Ary ny Mpisoronabe* izay nalaina tamin’ny rahalahiny ka nandrarahana ny diloilo fanosorana ny lohany sady natokana mba hitafy ny fitafiana, dia aoka tsy hirakaraka volo na handriatra ny fitafiany.

¹¹Ary aoka tsy hiditra am-paty akory izy ka handoto ny tenany na dia amin’ny ray aman-dreniny aza.

¹²Aoka tsy hiala avy tao amin’ny fitoerana masina izy na handoto ny toerana masin’Andriamaniny satria ny diloilo nanosoran’Andriamaniny azy no eo an-dohany: Izaho no TOMPO.

¹³Aoka ho vehivavy mbola virijiny no hampakariny.

¹⁴Fa ny maty vady na ny efa nisaorana na ny voaloto tamin’ny fijangajangana dia tsy azony ampakarina; fa virijiny avy amin’ny fireneny ihany no hampakariny.

¹⁵Aoka tsy hanao izay hampaloto ny taranany eo amin’ny fireneny izy fa Izaho TOMPO no nanamasina azy.

¹⁶Ary NY TOMPO niteny tamin’i Mosesy hoe:

¹⁷Mitenena amin’i Arona hoe: Izay rehetra misy kilema amin’ny zanakao, hatramin’ny taranany fara aman-dimby, dia aoka tsy hanatona hanatitra ny hanin’Andriamaniny;

¹⁸fa izay rehetra misy kilema dia tsy mahazo manakaiky hanatanteraka izany na ny jamba na ny mandringa na ny loaka orona na ny sampona amin’ny rantsam-batana

¹⁹na ny tapa-tongotra na ny tapa-tanana

²⁰na ny vokoka na ny saozanina na ny misy pentimpentina eo amin’ny masony na ny feno hatina na ny feno tsingaoka na ny manana aretin-dahy.

²¹Ny olona rehetra amin’ny zanak’i Arona mpisorona izay misy kilema dia tsy mahazo manatona hanolotra ny fanatitra levonina amin’ny afo ho an’NY TOMPO; misy kilema izy ka tsy mahazo manatona mba hanatitra ny hanin’Andriamaniny.

²²Ny hanin’Andriamaniny kosa, izay avy amin’ny zavatra masina indrindra sy ny zavatra masina, dia azony hanina ihany;

²³kanefa tsy mahazo mankeo amin’ny efitra lamba na manakaiky ny alitara izy, satria misy kilema, mba tsy handoto ny fitoerako masina fa Izaho TOMPO no manamasina ireo.

²⁴Dia nilaza izany tamin’i Arona sy ireo zanany ary ny Zanak’Israely rehetra i Mosesy.