Read La Bible en Malgache Levitikosy 25 Bible Online

Levitikosy 25 - La Bible en Malgache bible

Levitikosy 25

¹Ary NY TOMPO niteny tamin’i Mosesy teo an-tendrombohitra Sinay hoe:

²Mitenena amin’ny Zanak’Israely hoe: Rehefa tonga any amin’ny tany izay omeko anareo ianareo, aoka hisy fitsaharana ho an’ny tany, dia Sabata* ho an’NY TOMPO.

³Enina taona no hamafazanao ny taninao, enina taona no handrantsananao ny voalobokao sy hanangonanao ny vokatra avy aminy;

⁴fa ny taona fahafito kosa dia ho tena fitsaharana ho an’ny tany, dia Sabata ho an’NY TOMPO; aza mamafy amin’ny taninao ianao ary aza mandrantsana ny voalobokao.

⁵Aza mijinja izay naniry ho azy avy tamin’ny voa nihintsana tamin’ny fararano ary aza mioty ny voaloboka avy tamin’izay tsy nandrantsananao; fa aoka ho taona fitsaharana ho an’ny tany izany.

⁶Ary izay maniry ho azy amin’ny Sabatan’ny tany no ho sakafo ho anao, ho an’ny mpanompolahinao sy ny mpanompovavinao, ho an’ny mpikarama sy ny vahiny eo aminao

⁷ary ho an’ny biby fiompinao sy ny bibidia izay eo amin’ny taninao; izay vokatra rehetra eo no ho sakafo.

⁸Manisà taon-tSabata fito ho anao, fito taona impito, koa ny hanisanao ny andron’ireo taon-tSabata fito ireo dia sivy amby efapolo taona.

⁹Dia mitsofa anjomara avo feo amin’ny andro fahafolo amin’ny volana fahafito; amin’ny Andro Fanavotana Lehibe no hitsofanareo anjomara manerana ny taninareo.

¹⁰Ary hamasino ny taona fahadimampolo ka miantsoa fanafahana amin’ny tany ho an’ny mponina rehetra ao aminy; Jobily* ho anareo izany ka samia mody any amin’ny taninareo sy any amin’ny fokonareo avy ianareo.

¹¹Jobily ho anareo izany taona fahadimampolo izany: Aza mamafy ianareo, aza mijinja izay maniry ho azy avy tamin’ny voa nihintsana tamin’ny fararano lasa ary aza mioty ny avy tamin’izay tsy nandrantsananareo

¹²fa Jobily izany ka ho masina ho anareo. Izay vokatra alaina any an-tsaha no hohaninareo.

¹³Amin’izany taon-Jobily izany dia samy hody amin’ny taninareo avy ianareo.

¹⁴Raha mivarotra na mividy zavatra amin’ny mpiray firenena aminareo ianareo dia aza misy mampahory ny rahalahiny.

¹⁵Araka ny isan’ny taona aorianan’ny Jobily no hividiananao amin’ny namanao; ary araka ny isan’ny fararano no hivarotany aminao.

¹⁶Araka ny hamaron’ny taona no hampitomboanao ny vidiny, ary araka ny havitsin’ny taona sisa no hampihenanao ny vidiny; fa araka ny isan’ny fararano no hivarotany aminao.

¹⁷Aza misy mampahory ny mpiray firenena aminareo ianareo fa matahora an’Andriamanitrao; Izaho no TOMPO Andriamanitrareo.

¹⁸Araho ny didiko ka tandremo ny fitsipiko, ary araho izany, dia handry fehizay amin’ny tany ianareo.

¹⁹Ary hanome vokatra ny tany ary hihinana ianareo ka ho voky sady honina am-piadanana eo amin’ny tany.

²⁰Ary fandrao ianareo hiteny hoe: Inona no hohaninay amin’ny taona fahafito satria tsy mamafy izahay na manangona ny vokatray

²¹dia hodidiako ho aminareo ny fitahiako amin’ny taona fahenina ka hisy vokatra ampy ho anareo amin’ny telo taona.

²²Ary hamafy ianareo amin’ny taona fahavalo ka hihinana ny tranainy mandra-pahatonga ny taona fahasivy. Mandra-piakatry ny vokatra vaovao no hihinananareo ny tranainy.

²³Tsy hatao varo-maty ny tany satria Ahy ny tany; fa vahiny sy mpivahiny Amiko ianareo.

²⁴Ary havelanareo ho azo avotana ny tany eo amin’ny tany rehetra izay lovanareo.

²⁵Raha toa ka mihamahantra ny rahalahinao ka nivarotany ny taniny dia ho avy ny havany akaiky ka hanavotra izay namidin’ny rahalahiny.

²⁶Raha tsy manan-kavana hanavotra Ralehilahy ka amin’izay tratry ny tanany no ahazoany izay ampy hoenti-manavotra azy

²⁷dia aoka hanisa ny taona hatramin’ny nivarotany azy izy ary handoa izay mifanentana amin’ny taona sisa ho an’ny lehilahy izay nivarotany azy dia hody amin’ny taniny izy.

²⁸Fa raha tsy nahatratra izay ampy handoavana izany izy dia mbola hijanona eo an-tanan’ilay nividy azy ihany ny tany izay namidiny mandra-pahatongan’ny taon-Jobily. Ho afaka izany amin’ny Jobily* ka hody amin’ny taniny Ralehilahy.

²⁹Raha misy olona mivarotra trano itoerana ao amin’ny tanàna mimanda dia hahazo manavotra azy izy mandra-pahatapitra ny herintaona nivarotany azy; ao anatin’izany no hahazoany manavotra azy.

³⁰Fa raha tsy voaavotra mandra-pahatapitra ny herintaona kosa ilay trano ao amin’ny tanàna mimanda dia tapaka ho varo-maty ho an’izay nividy azy sy ho an’ny taranany izany; tsy ho afaka izany na dia amin’ny Jobily aza.

³¹Fa ny trano ao amin’ny vohitra izay tsy misy manda manodidina kosa dia hatao tahaka ny tany ihany; ho azo avotana ihany izany ka ho afaka amin’ny Jobily.

³²Kanefa ny amin’ny tanànan’ny levita*, ny trano ao amin’ny tanàna izay ho anjarany dia ho azon’ny levita avotana ihany na rahoviana na rahoviana.

³³Fa raha misy levita hafa manavotra azy dia ho afaka amin’ny Jobily ny trano izay namidy sy ny tanàna izay anjarany; fa ny trano ao an-tanànan’ny levita dia lovany ao amin’ny Zanak’Israely.

³⁴Fa ny tany manodidina ny tanànany kosa dia tsy azo amidy satria ho lovany maharitra izany.

³⁵Raha mihamahantra ny rahalahinao izay miara-monina aminao ka reraka dia tohano izy ka aoka mba ho velona eo aminao tahaka ny vahiny sy ny mpivahiny.

³⁶Aza maka zana-bola na tombony aminy fa matahora an’Andriamanitrao mba ho velona eo aminao ny rahalahinao.

³⁷Aza mampanjana-bola aminy, ary aza mampisambotra hanina hahazoana tombony:

³⁸Izaho no TOMPO Andriamanitrareo izay nitondra anareo nivoaka avy tany amin’ny tany Ejipta mba hanome anareo ny tany Kanana ka ho Andriamanitrareo Aho.

³⁹Raha mihamahantra ny rahalahinao ka mivarotra ny tenany aminao dia aza asainao manompo anao toy ny andevo izy;

⁴⁰fa aoka hitoetra eo aminao tahaka ny mpikarama sy tahaka ny vahiny izy ary mandra-pahatongan’ny taon-Jobily no hiasany ho anao.

⁴¹Dia ho afaka izy sy ny zanany ka hody amin’ny ankohonany sy amin’ny tanindrazany koa.

⁴²Fa mpanompoko izay nentiko nivoaka avy tany amin’ny tany Ejipta izy ka tsy hamidy tahaka ny andevo.

⁴³Aza mifehy azy amin-kery fa matahora an’Andriamanitrao.

⁴⁴Fa ny amin’izay ho andevolahinao sy andevovavinao dia amin’ny Jentilisa* izay manodidina anareo no hividiananareo azy.

⁴⁵Amin’ny zanaky ny vahiny izay monina eo aminareo sy amin’ny taranany izay haterany eo amin’ny taninareo koa no hividiananareo; dia ho fanananareo ireny.

⁴⁶Ary hataonareo lovan’ny zanakareo mandimby anareo ireny ho fananana holovany ka hampanompoinareo maharitra; fa ny Zanak’Israely rahalahinareo dia aza mba anjakazakana amin-kery.

⁴⁷Raha tonga manankarena ny vahiny izay monina eo aminao na ny mpivahiny ary ny rahalahinao izay mifandray aminy kosa mihamahantra ka mivarotra ny tenany amin’ny vahiny eo aminao, na amin’ny taranaky ny vahiny

⁴⁸na dia nivarotra ny tenany aza izy dia azo avotana indray ka ny iray amin’ny rahalahiny no mahazo manavotra azy;

⁴⁹na ny rahalahin-drainy, na ny zanak’olo-mirahalahy aminy, na izay havany akaiky azy amin’ny ankohonany no mahazo manavotra azy kanefa raha tratry ny ananany dia afaka manavotra ny tenany izy.

⁵⁰Ary izany dia hisainy amin’izay nividy azy manomboka amin’ny taona nivarotana azy ka hatramin’ny taon-Jobily. Ny vola nivarotany ny tenany kosa dia hifanentana amin’ny isan’ny taona. Toy ny fanisa ny andro niasan’ny mpikarama no hiheverana azy.

⁵¹Raha mbola maro ny taona sisa dia ara-keviny ihany no handoavany ny fanavotana azy avy amin’ny vola vidiny teo aloha.

⁵²Fa raha vitsy kosa ny taona sisa mandra-pahatongan’ny taon-Jobily dia hanisa izany aminy izy, koa ara-keviny amin’ny taona ihany no handoavany ny vola fanavotana azy.

⁵³Tahaka izay karamaina isan-taona no hitoerany eo aminy; fa aza avelanao hampijaliana eo imasonao izy.

⁵⁴Raha tsy voavotra amin’izany izy dia ho afaka amin’ny taon-Jobily izy sy ireo zanany.

⁵⁵Fa mpanompoko ny Zanak’Israely, dia mpanompoko izay nentiko nivoaka avy tany amin’ny tany Ejipta. Izaho no TOMPO Andriamanitrareo.