Read La Bible en Malgache Levitikosy 3 Bible Online

Levitikosy 3 - La Bible en Malgache bible

Levitikosy 3

¹Raha fanati-pihavanana no atolony, ka ombilahy na ombivavy no atolony, dia izay tsy misy kilema no hatolony eo anatrehan’NY TOMPO.

²Hametraka ny tanany eo amin’ny lohan’ny fanatiny izy dia hamono azy eo anoloan’ny varavaran’ny tranolay fihaonana*; ary ireo mpisorona, zanak’i Arona, dia hamafy ra manodidina ny alitara.

³Dia hakan’ny mpisorona ny fanati-pihavanana ka hateriny ho fanatitra levonina amin’ny afo ho an’NY TOMPO, dia ny jabora mandrakotra ny taovany rehetra sy ny jaboran-tsinainy,

⁴ny voany roa, ny jabora mandrakotra azy, izay rehetra eo amin’ny takibany ary ny ila atiny lehibe. Hataony indray manala amin’ny voany no fanalany izany.

⁵Ary ireo zanak’i Arona dia handoro an’ireo ho fofona eo ambonin’ny alitara miaraka amin’ny fanatitra dorana manontolo izay eo ambonin’ny kitay eo amin’ny afo. Fanatitra levonina amin’ny afo ho hanitra ankasitrahana ho an’NY TOMPO izany.

⁶Raha ondry na osy no atolony ho fanati-pihavanana ho an’NY TOMPO dia izay tsy misy kilema, na lahy na vavy, no hatolony.

⁷Raha ondry no atolony ho fanatitra dia hoentiny eo anatrehan’NY TOMPO izany.

⁸Hametraka ny tanany eo amin’ny lohan’ny fanatiny izy dia hamono azy eo anoloan’ny tranolay fihaonana ary hofafazan’ireo zanak’i Arona ra ny manodidina ny alitara.

⁹Hakan’ireo ny fanati-pihavanana ka hatolony ho fanatitra levonina amin’ny afo ho an’NY TOMPO, dia ny hofany manontolo; faranana hatreo amin’ny faran’ny taolan-damosina no fakàny izany. Ny jaborany, dia ny jabora mandrakotra ny taovany rehetra sy ny jaboran-tsinainy,

¹⁰ny voany roa mbamin’ny jabora mandrakotra azy, izay rehetra eo amin’ny takibany ary ny ila atiny lehibe. Hataony indray manala amin’ny voany no fanesorany izany.

¹¹Ny mpisorona dia handoro izany ho fofona eo ambonin’ny alitara; hanina avy amin’ny fanatitra levonina amin’ny afo ho an’NY TOMPO izany.

¹²Ary raha osy no fanatiny dia hatolony azy eo anatrehan’NY TOMPO izany.

¹³Hametraka ny tanany eo amin’ny lohany izy dia hamono azy eo anoloan’ny tranolay fihaonana ary hamafy ra manodidina ny alitara ireo zanak’i Arona.

¹⁴Avy amin’io no hanaterany ny fanatiny atao amin’ny afo ho an’NY TOMPO, dia ny jabora mandrakotra ny taovany rehetra, ny jaboran-tsinainy,

¹⁵ny voany roa mbamin’ny jabora mandrakotra azy, izay eo amin’ny takibany ary ny ila atiny lehibe. Hataony indray manala amin’ny voany no fakany ireny.

¹⁶Ary ny mpisorona dia handoro izany ho fofona eo ambonin’ny alitara; sakafo avy amin’ny fanatitra levonina amin’ny afo ho hanitra ankasitrahana izany fa an’NY TOMPO ny jabora rehetra.

¹⁷Ho lalàna maharitra amin’ny taranakareo fara aman-dimby izany; eny amin’izay rehetra itoeranareo dia tsy hihinana jabora na ra akory ianareo.