Read La Bible en Malgache Levitikosy 7 Bible Online

Levitikosy 7 - La Bible en Malgache bible

Levitikosy 7

¹Ary izao no lalàna momba ny fanati-panonerana izay zavatra tena masina:

²Eo amin’ny toerana famonoana ny fanatitra dorana manontolo no hamonoana ny fanati-panonerana. Hafafy manodidina ny alitara ny ra.

³Haterina avokoa ny hofany sy ny jaborany rehetra, dia ny jabora mandrakotra ny taovany rehetra sy ny jaboran-tsinainy,

⁴ny voany roa mbamin’ny jabora mandrakotra azy, izay eo amin’ny takibany ary ny ila atiny lehibe; hatao indray manala amin’ny voany no fakàna ireo.

⁵Hodoran’ny mpisorona ho fofona eo ambonin’ny alitara ho fanatitra levonina amin’ny afo ho an’NY TOMPO ireo. Fanati-panonerana izany.

⁶Ny lehilahy rehetra amin’ny mpisorona no mahazo mihinana izany; eo amin’izay fitoerana masina no hihinanany azy. Zavatra tena masina izany.

⁷Ho tahaka ny fanatitra fanadiovana ny fanati-panonerana ka lalàna iray no ho amin’izy roa: Ho an’ny mpisorona izay manao ny fanavotana izany.

⁸Hahazo ny hoditry ny fanatitra dorana manontolo izay aterin’ny olona ilay mpisorona izay manao ny fanatitra.

⁹Ny fanatitra avy amin’ny zavamaniry rehetra izay voaendy amin’ny fanendasa-mofo sy izay rehetra atao amin’ny vilany fahandroana na amin’ny lapoaly dia ho an’ilay mpisorona manolotra azy.

¹⁰Fa ny fanatitra avy amin’ny zavamaniry rehetra na izay voaharo diloilo, na ny maina, dia ho an’ny zanak’i Arona rehetra tsy an-kanavaka.

¹¹Ary izao no lalàna momba ny fanati-pihavanana izay hatolotra ho an’NY TOMPO:

¹²Raha misy manolotra izany ho fanati-pisaorana dia izao no hatolony ho fanampiny: Mofo tsy misy masirasira sady voaharo diloilo sy mofo manify tsy misy masirasira voahosotra diloilo ary mofo atao amin’ny koba tsara toto voaendy sady voaharo diloilo.

¹³Miaraka amin’ny mofo misy masirasira no hanolorany ny fanatiny, ho fanampin’ny fanati-pihavanana izay ataony ho fanati-pisaorana.

¹⁴Hakany iray avy ny isam-panatitra ho anjara fanomezana ho an’NY TOMPO; ho an’ilay mpisorona mamafy ny ran’ny fanati-pihavanana izany.

¹⁵Ny henan’ny fanati-pihavanana izay ataony ho fanati-pisaorana dia hohanina amin’ny andro anaterana azy fa tsy hisy havela ho tra-maraina.

¹⁶Raha fanalam-boady na fanatitra an-tsitrapo kosa no atolony dia amin’ny andro itondrany ny fanatiny no hihinanana azy ary hohanina ny ampitson’iny izay ambiny.

¹⁷Fa ny sisa amin’ny henan’ny fanatitra dia hodorana amin’ny afo amin’ny andro fahatelo.

¹⁸Raha toa ka ihinanana amin’ny andro fahatelo ny henan’ny fanati-pihavanana, na dia sombiny kely aza, dia tsy horaisina na hisaina ho an’izay manolotra azy izany fa maloto; ary ny olona izay mihinana amin’izany dia ho meloka.

¹⁹Tsy hohanina ny hena izay mikasika zava-maloto fa hodorana amin’ny afo; ary ny amin’ny hena, dia izay madio rehetra no mahazo mihinana azy;

²⁰fa ny olona izay misy fahalotoana, nefa mihinana hena avy amin’ny fanati-pihavanana, izay an’NY TOMPO, dia hesorina tsy ho amin’ny fireneny.

²¹Ny olona izay mikasika zava-maloto, na fahalotoan’olona na biby maloto na izay zava-betaveta maloto, ka mihinana amin’ny henan’ny fanati-pihavanana izay an’NY TOMPO, dia hesorina tsy ho amin’ny fireneny.

²²Ary NY TOMPO niteny tamin’i Mosesy hoe:

²³Mitenena amin’ny Zanak’Israely hoe: Aza mihinana jabora mihitsy ianareo, na jaboran’omby na jaboran’ondry na jaboran’osy.

²⁴Azo ampiasaina amin’ny raharaha rehetra ihany ny jaboran’ny biby izay maty ho azy sy ny jaboran’izay noviraviraim-biby kanefa aza mihinana azy ianareo.

²⁵Fa izay rehetra mihinana jaboran’ny biby fiompy, izay fanao fanatitra levonina amin’ny afo ho an’NY TOMPO, dia hesorina tsy ho amin’ny fireneny.

²⁶Aza mihinana ra eny amin’izay rehetra itoeranareo, na ny an’ny vorona, na ny an’ny biby fiompy.

²⁷Izay rehetra mihinana ra dia hesorina tsy ho amin’ny fireneny.

²⁸Ary NY TOMPO niteny tamin’i Mosesy hoe:

²⁹Mitenena amin’ny Zanak’Israely hoe: Izay manolotra ny fanati-pihavanany ho an’NY TOMPO dia hitondra ny fanatiny ho an’NY TOMPO avy amin’ny fanati-pihavanany.

³⁰Ny tanany ihany no hitondra ny fanatitra levonina amin’ny afo ho an’NY TOMPO; ny jaborany mbamin’ny tratrany no hoentiny ka ny tratrany dia hataony fanatitra asandratra eo anatrehan’NY TOMPO.

³¹Hodoran’ny mpisorona ho fofona eo ambonin’ny alitara ny jaboran’ny fanatiny, fa ny tratrany kosa dia ho an’i Arona sy ireo zanany.

³²Ary ny feny havanana dia halainareo amin’ny fanati-pihavananareo ka homenareo ny mpisorona.

³³Ny iray amin’ireo zanak’i Arona izay manolotra ny ran’ny fanati-pihavanana sy ny jaborany no hahazo ny feny havanana ho anjarany.

³⁴Fa ny tratran’ny fanatitra asandratra sy ny feny nalaina avy tamin’ny fanatitra dia efa nalaiko tamin’ny Zanak’Israely avy amin’ny fanati-pihavanany ary nomeko ho an’i Arona mpisorona sy ireo zanany, ho anjarany maharitra avy amin’ny Zanak’Israely.

³⁵Ireo no anjaran’i Arona sy anjaran’ireo zanany avy amin’ny fanatitra levonina amin’ny afo ho an’NY TOMPO, nanomboka tamin’ilay andro nanolorana azy ireo ho mpisorona ho an’NY TOMPO,

³⁶dia izay nodidian’NY TOMPO mba homena azy avy amin’ny Zanak’Israely amin’ilay andro hanosorana azy, ho lalàna maharitra amin’ny taranany fara aman-dimby.

³⁷Izany no lalàna momba ny fanatitra dorana manontolo sy ny fanatitra avy amin’ny zavamaniry, ny fanatitra fanadiovana sy ny fanati-panonerana, ny fanati-panokanana ary ny fanati-pihavanana,

³⁸izay didy nomen’NY TOMPO an’i Mosesy tao amin’ny tendrombohitra Sinay, tamin’ny andro izay nanomezany didy ny Zanak’Israely hanolotra ny fanatiny ho an’NY TOMPO, tany an-tany efitr’i Sinay.