Read La Bible en Malgache Jeremia 1 Bible Online

Jeremia 1 - La Bible en Malgache bible

Jeremia 1

¹Ny tenin’i Jeremia, zanak’i Hilkia, isan’ny mpisorona tao Anatota, tao amin’ny tanin’ny Benjamina.

²Izany tenin’NY TOMPO izany dia nampitondraina an’i Jeremia tamin’ny andron’i Josia, zanak’i Amona, mpanjakan’ny Joda, tamin’ny taona fahatelo amby folo nanjakany,

³sy tamin’ny andron’i Joiakima, zanak’i Josia, mpanjakan’ny Joda, ka hatramin’ny faran’ny taona fahiraika amby folo nanjakan’i Zedekia, zanak’i Josia, mpanjakan’ny Joda, dia hatramin’ny namaboana an’i Jerosalema tamin’ny volana fahadimy.

⁴Tonga tamiko ny tenin’NY TOMPO hoe:

⁵Hatry ny fony ianao tsy mbola noforoniko tany an-kibo no efa fantatro; ary hatry ny fony ianao tsy mbola teraka no efa nohamasiniko sy notendreko ho mpaminany ho an’ny firenena maro.

⁶Dia hoy aho: Indrisy, RY TOMPO Andriamanitra ô! Indro, tsy mahay mandaha-teny aho, fa mbola zaza.

⁷Fa hoy NY TOMPO tamiko: Aza miteny hoe: Mbola zaza aho; fa handeha amin’izay rehetra hanirahako anao ianao, ary izay rehetra handidiako anao no hambaranao.

⁸Aza matahotra azy ianao; fa momba anao Aho ka hamonjy anao, hoy NY TOMPO.

⁹Dia nanatsotra ny tanany NY TOMPO ka nanendry ny vavako ary hoy NY TOMPO tamiko: Indro, efa nataoko ao am-bavanao ny teniko,

¹⁰ary indro Aho manendry anao izao andro anio izao hanam-pahefana amin’ny firenena sy fanjakana maro mba hanongotra sy hanjera, handrava sy handrodana, ary hanorina sy hamboly.

¹¹Tonga tamiko indray ny tenin’NY TOMPO hoe: Ry Jeremia, inona izao hitanao izao? Dia novaliko hoe: Rantsan-kazo mahatsiaro[1] no hitako.

¹²Dia hoy NY TOMPO tamiko: Marina ny ahitanao azy; fa mahatsiaro Aho mba hahatanteraka ny teniko.

¹³Ary tonga tamiko fanindroany ny tenin’NY TOMPO hoe: Inona izao hitanao izao? Dia novaliko hoe: Vilany mangotraka no hitako ary mitongilana avy any avaratra ny vavany.

¹⁴Dia hoy NY TOMPO tamiko: Hiroatra avy any avaratra ny loza hanjo ny mponina rehetra amin’ny tany.

¹⁵Fa indro, hantsoiko ny firenena rehetra amin’ny fanjakana any avaratra, hoy NY TOMPO; dia ho tonga ka samy hametraka ny sezafiandrianany eo anoloan’ny vavahadin’i Jerosalema avokoa, hamelezany ny mandany rehetra manodidina sy ny tanàna rehetra any Joda.

¹⁶Ary hifandahatra aminy Aho noho ny haratsiany rehetra, dia ny nahafoizany Ahy sy ny nandoroany ditin-kazo manitra ho an’ny andriamanitra hafa ary ny niankohofany teo anatrehan’ny asan’ny tanany.

¹⁷Fa ianao kosa dia misikìna ary miomàna ka lazao aminy izao rehetra andidiako anao izao. Aza matahotra azy ireo, fandrao hataoko raiki-tahotra eo anatrehany ianao.

¹⁸Indro, ianao dia hataoko ho toy ny tanàna mimanda sy andry vy ary manda varahina mba tsy ho leon’ny tany rehetra, na ny mpanjakan’ny Joda, na ny lehibeny, na ny mpisorony, na ny vahoaka.

¹⁹Fa hiady aminao ireny nefa tsy hahaleo anao satria momba anao hamonjy anao Aho, hoy NY TOMPO.