Read La Bible en Malgache Jeremia 11 Bible Online

Jeremia 11 - La Bible en Malgache bible

Jeremia 11

¹Izao no teny tonga tamin’i Jeremia avy tamin’NY TOMPO:

²Mihainoa ny tenin’izao fanekena izao ianareo, ary mitenena amin’ny Joda sy amin’ny mponina any Jerosalema.

³Izao no holazainao aminy: Izao no lazain’NY TOMPO, Andriamanitry ny Israely: Ho voaozona izay olona tsy mankatò ny tenin’izao fanekena izao,

⁴dia izay nandidiako ny razanareo tamin’ny andro nitondrako azy nivoaka avy tany amin’ny tany Ejipta, izay avy tao amin’ny memy fandrendreham-by, ka nilazako hoe: Mihainoa ny feoko ary mankatoava ireny araka izay rehetra andidiako anareo, dia ho oloko ianareo, ary Izaho kosa ho Andriamanitrareo

⁵mba hotanterahiko ny fianianana izay nianianako tamin’ny razanareo, dia ny hanomezana azy tany tondra-dronono sy tantely tahaka ny amin’izao anio izao. Dia namaly aho hoe: Amena*, RY TOMPO ô!

⁶Ary hoy NY TOMPO tamiko: Torio any an-tanànan’ny Joda sy any an-dalamben’i Jerosalema izany teny rehetra izany ka lazao hoe: Henoy ny tenin’izao fanekena izao ary ankatoavy izany.

⁷Fa nananatra mafy ny razanareo Aho tamin’ny andro nitondrako azy nivoaka avy tany amin’ny tany Ejipta ka mandraka androany; eny, nifoha vao maraina Aho ka nananatra hoe: Mihainoa ny feoko.

⁸Nefa tsy nihaino izy ireo na nanongilana ny sofiny, fa samy nandeha tamin’ny ditran’ny fo ratsiny ihany izy ireo. Koa nataoko mihatra aminy ny teny rehetra amin’izao fanekena izao, dia ilay nasaiko nataony nefa tsy nataony.

⁹Ary hoy koa NY TOMPO tamiko: Misy tetika fikomiana hita ao amin’ny Joda sy amin’ny mponina any Jerosalema.

¹⁰Fa izy dia niverina nankany amin’ny heloky ny razany izay tsy nety nihaino ny teniko, ary lasa nanaraka andriamanitra hafa izy ka nanompo azy. Nivadika ny fanekeko, izay nataoko tamin’ny razany, ny taranak’Israely sy ny taranak’i Joda.

¹¹Koa izao no lazain’NY TOMPO: Indro, hahatonga loza aminy, izay tsy azony andosirana Aho; ary na dia hitaraina Amiko aza izy dia tsy hihaino azy Aho.

¹²Dia handeha ny tanànan’ny Joda sy ny mponina any Jerosalema ka hitaraina amin’ireny andriamaniny izay efa nandoroany ditin-kazo manitra ireny; nefa tsy hahavonjy azy akory ireny amin’ny andro fahoriany.

¹³Fa araka ny isan’ny tanànanao, ry Joda, no isan’ny andriamanitrao; ary araka ny isan’ny lalamben’i Jerosalema no isan’ny alitara naorinareo ho an’ilay mampahamenatra, dia alitara handoroana ditin-kazo manitra ho an’ny Baala*.

¹⁴Koa aza mivavaka ho an’ity firenena ity ianao, ary aza manandratra fitarainana na fifonana ho azy; fa amin’ny andro izay hitarainany Amiko noho ny fahoriany dia tsy hihaino azy Aho.

¹⁵Hanao inona ao an-tranoko ny malalako? Efa namoron-tsain-dratsy niaraka tamin’ny maro izy. Moa ny voady sy ny hena masina va no hampiala ny faharatsianao, na hahafahanao handositra? Raha azon-doza ianao, mifalia ary!

¹⁶Hazo oliva maitso sady misy voany tena tsara endrika no nataon’NY TOMPO anaranao. Tamin’ny fihorakorahana be no nandrehetany afo taminy ary nokapaina ny rantsany.

¹⁷Fa Andriamanitra, Tompon’izao rehetra izao, izay namboly anao, no nanambara ny loza hanjo anao, noho ny ratsy nataon’ny taranak’Israely sy ny taranak’i Joda, izay nahavoa ny tenany ka nahatezitra Ahy, dia tamin’ny nandoroany ditin-kazo manitra ho an’ny Baala*.

¹⁸Nampahafantarin’NY TOMPO aho ka nahalala; nasehonao ahy tamin’izany ny fanaony.

¹⁹Fa izaho dia tahaka ny zanak’ondry bonaika izay entina hovonoina; ary tsy fantatro fa izao no tetika nataony namelezany ahy: Aoka hosimbaintsika ny hazo mbamin’ny voany, ary aoka hofongorantsika hiala amin’ny tanin’ny velona izy mba tsy hotsarovana intsony ny anarany.

²⁰Nefa, Andriamanitra, Tompon’izao rehetra izao ô, izay mitsara marina ka mamantatra ny voa sy ny fo, aoka ho hitako ny famalianao azy; fa Aminao no efa nanankinako ny adiko.

²¹Koa izao no lazain’NY TOMPO ny amin’ny mponina ao Anatota, izay mitady ny ainao ka miteny hoe: Aza maminany amin’ny anaran’NY TOMPO, fandrao matin’ny tananay ianao.

²²Izao no lazain’Andriamanitra, Tompon’izao rehetra izao: Indro, hovaliako izy ka ho fatin-tsabatra ny zatovo ary ho fati-mosary ny zanany lahy sy ny zanany vavy.

²³Tsy hisy hiangana izy, fa hahatonga loza amin’ny mponina ao Anatota Aho amin’ny taona hamaliana azy.