Read La Bible en Malgache Jeremia 12 Bible Online

Jeremia 12 - La Bible en Malgache bible

Jeremia 12

¹Raha mifandahatra aminao aho, TOMPO ô, dia Ianao no marina; nefa aoka ihany kosa aho mba handahatra Aminao: Nahoana ary no ambinina ny lalan’ny ratsy fanahy? Nahoana no miadana ny mpikomy rehetra?

²Nambolenao izy ka mamaka; mitombo izy ka mamoa; manakaiky Anao amin’ny vavany izy nefa manalavitra Anao amin’ny fony.

³Fa Ianao, TOMPO ô, no mahalala ahy; mahita ahy Ianao sady mizaha toetra ny foko, fa ao Aminao izy. Avaho toy ny ondry hovonoina ireny ary atokàny ho amin’ny andro hamonoana azy.

⁴Mandra-pahoviana no hisaonan’ny tany sy hahalazoan’ny ahitra eny amin’ny saha rehetra? Noho ny faharatsian’ny mponina any dia lany ringana ny biby sy ny vorona; fa hoy ireo: Tsy mba mahita izay hoavintsika Izy.

⁵Raha niara-nihazakazaka tamin’izay mpandeha an-tongotra ianao ka tsy naharaka azy dia hataonao ahoana no fihaika ny soavaly? Ary raha eny amin’ny tany mandry fahalemana ihany no anananao toky dia hanao ahoana kosa ianao, raha tonga any amin’ny kirihitrala eny amoron’i Jordana?

⁶Fa na dia ny rahalahinao sy ny mpianakavin’ny rainao aza dia samy namitaka anao; eny, niantso mafy tao aoriananao ireo. Aza mino azy, na dia tsara fiteny aminao aza izy ireo.

⁷Nilaozako ny tranoko, nafoiko ny lovako; ny sombin’aiko dia natolotro ho eo an-tanan’ny fahavalony.

⁸Amiko, ny lovako dia efa toy ny liona any anaty ala; mierona Amiko izy ka halako.

⁹Moa tahaka ny vorona mpihaza hafahafa volo Amiko va ny lovako, no mivory manodidina azy ny vorona mpihaza? Avia ka angony ny bibidia rehetra, ampanatony ireny hihinana.

¹⁰Mpitondra maro no nanimba ny tanim-boaloboko, nohitsakitsahiny ny anjarako; nataony tany efitra lao ny anjarako mahafinaritra.

¹¹Nataony lao izany, eny, lao izy ka nitomany teo anatrehako; nataony lao avokoa ny tany rehetra satria tsy nisy nandatsaka am-po.

¹²Ny mpandrava dia tonga any amin’ny tendrombohitra mangadihady rehetra any an-tany efitra; fa misy sabatry NY TOMPO mandringana hatrany amin’ny faran’ny tany ka tsy misy fiadanana ho an’ny nofo rehetra.

¹³Vary no nafafiny, nefa tsilo no nojinjainy; nanasatra ny tenany izy, kanjo herim-po very maina izany; dia hangaihay noho ny zavatra azonareo ianareo noho ny firehetan’ny fahatezeran’NY TOMPO.

¹⁴Izao no lazain’NY TOMPO ny amin’ireo firenena ratsy fanahy rehetra mifanakaiky sisintany amin’ny oloko ireo, dia izay mikasikasika ny tany nomeko ho lovan’ny Israely oloko: Indro, hongotako tsy ho amin’ny taniny ireo ary ny taranak’i Joda koa dia hongotako tsy ho eo aminy.

¹⁵Nefa nony efa voaongotra izy dia hamindra fo aminy indray Aho ka samy hoentiko mody any amin’ny lovany sy ny taniny avy indray izy.

¹⁶Koa raha mba nianatra ny fanaon’ny oloko tokoa ireo ary hianiana amin’ny anarako hoe: Velona NY TOMPO, tahaka ny nampianaran’ireo ny oloko hianiana amin’ny Baala*, dia haorina ao amin’ny oloko izy.

¹⁷Fa raha tsy hankatò kosa izy dia hongotako izany firenena izany, eny, hongotako sy haringako izy, hoy NY TOMPO.