Read La Bible en Malgache Jeremia 13 Bible Online

Jeremia 13 - La Bible en Malgache bible

Jeremia 13

¹Izao no nolazain’NY TOMPO tamiko: Andeha mividy fehikibo lamba rongony ho anao ka afehezo amin’ny kibonao fa aza alona ao anaty rano.

²Dia nividy fehikibo aho araka ny tenin’NY TOMPO ka namehezako ny kiboko.

³Ary tonga tamiko fanindroany ny tenin’NY TOMPO hoe:

⁴Ento ny fehikibo izay novidinao, dia ilay amehezanao ny kibonao, ka mitsangàna, mankanesa any ony amin’ny Eofrata ary afeno ao an-tsefatsefaky ny harambato izany.

⁵Dia nandeha aho ary nafeniko tao amoron’ny ony Eofrata izany, araka ny nandidian’NY TOMPO ahy.

⁶Nony afaka andro maro dia hoy NY TOMPO tamiko: Mitsangàna ka mankanesa any amin’ny ony Eofrata ary alao any ny fehikibo, dia ilay nasaiko nafeninao tany.

⁷Dia nankany amin’ny ony Eofrata aho ka nikaroka sy naka ilay fehikibo tao amin’ny toerana nanafenako azy; kanjo indro, simba ilay fehikibo ka tsy misy ilàna azy intsony.

⁸Dia tonga tamiko ny tenin’NY TOMPO hoe:

⁹Izao no lazain’NY TOMPO: Tahaka izany no hanimbako ny avonavon’ny Joda sy ny haben’ny avonavon’ny Jerosalema.

¹⁰Ity firenena ratsy ity izay tsy mety mihaino ny teniko, fa mandeha amin’ny ditran’ny fony ka manaraka andriamanitra hafa mba hotompoiny sy hiankohofany, dia ho tahaka ity fehikibo ity ka tsy azo atao na inona na inona intsony.

¹¹Fa toy ny firaikitry ny fehikibo amin’ny andilan’ny olona no nampiraiketako ny taranak’Israely sy ny taranak’i Joda rehetra tamiko, hoy NY TOMPO, mba ho oloko, ho laza sy fiderana ary voninahitra ho Ahy ireny, kanjo tsy nety nihaino izy.

¹²Ary lazao aminy izao teny izao: Izao no lazain’NY TOMPO, Andriamanitry ny Israely: Ny tavoara rehetra dia hofenoina divay; ary raha miteny aminao izy hoe: Moa tsy efa fantatray ihany va fa hofenoina divay ny tavoara rehetra?

¹³Dia holazainao aminy hoe: Izao no lazain’NY TOMPO: Indro, hataoko leo ny mponina rehetra amin’ity tany ity, dia ny mpanjaka izay mipetraka amin’ny sezafiandrianan’i Davida, ny mpisorona sy ny mpaminany ary ny mponina rehetra any Jerosalema.

¹⁴Ary hampifamotehiko izy, dia ny ray mbamin’ny zanany, hoy NY TOMPO; tsy hiantra Aho, na hitsitsy, na hamindra fo tsy handringana azy.

¹⁵Mandrenesa ka mihainoa, aza miavonavona; fa NY TOMPO no miteny.

¹⁶Manomeza voninahitra NY TOMPO Andriamanitrareo, dieny tsy mbola mahatonga ny haizina Izy, ary dieny tsy mbola tafintohina amin’ny tendrombohitra maizimaizina ny tongotrareo; fa amin’izany, raha miandry ny mazava ianareo dia hataony tonga aloky ny fahafatesana izany ka hampodiny ho haizim-pito.

¹⁷Fa raha tsy hihaino izany ianareo dia hitomany any amin’ny mangingina aho satria misy fiavonavonana; eny, ny masoko dia hamarin-dranomaso hijononoka be satria voababo ny ondrin’NY TOMPO.

¹⁸Lazao amin’ny andriamanjaka sy ny reniny hoe: Mitombena amin’ny tany fa ho afaka ny firavaka eo an-dohanareo, dia ny satroboninahitrareo tsara tarehy.

¹⁹Voarindrina ny tanàna any Negeva ka tsy misy mamoha; lasan-ko babo i Joda manontolo, eny, lasan-ko babo avokoa izy rehetra.

²⁰Atopazy ny masonareo ka tazano izay avy any avaratra; aiza ny andian’ondry izay nomena anao, dia ny ondrinao tsara tarehy?

²¹Ahoana re no holazainao raha tendreny hanapaka anao ireny sakaizanao ireny, nefa ianao izao ihany no nampianatra azy handrafy anao? Tsy hahazo anao va ny fanaintainana toy ny an’ny vehivavy miteraka?

²²Ary raha miteny anakampo ianao hoe: Ahoana no nahatonga izao tamiko? Noho ny haben’ny helokao no nampiaingana ny morontongotr’akanjonao sy nandratrana ny voditongotrao.

²³Moa mahova ny hodiny va ny Kosita? Ary mahova ny sorany va ny leoparda? Toy izany koa, moa mahay manao ny tsara va ianareo izay efa zatra nanao izay ratsy?

²⁴Koa dia haeliko toy ny vodivary indaosin’ny rivotra avy any an-tany efitra izy.

²⁵Izany no anjara azonao tamin’ny antsapaka, dia anjara voarefy ho anao, avy Amiko hoy NY TOMPO, satria nanadino Ahy ianao ka nitoky tamin’ny lainga.

²⁶Ary Izaho kosa dia hampiainga ny morontongotr’akanjonao ho eny amin’ny tavanao mba hisehoan’ny henatrao.

²⁷Ny fijangajanganao sy ny fanenonao[2], ny fahavetavetan’ny fijejojejoanao any amin’ny havoana any an-tsaha, eny, samy efa hitako avokoa ireo fahavetavetanao ireo. Lozanao, ry Jerosalema! Mandra-pahoviana ianao no mbola tsy hanadio ny tenanao?