Read La Bible en Malgache Jeremia 14 Bible Online

Jeremia 14 - La Bible en Malgache bible

Jeremia 14

¹Ny tenin’NY TOMPO izay tonga tamin’i Jeremia noho ny hain-tany.

²Misaona ny Joda ary mivalaketraka ny tanànany; mitafy lamba fisaonana izy ka mipetraka amin’ny tany; ary miakatra ny fitarainan’i Jerosalema.

³Maniraka ny madinika hantsaka rano ny lehibeny; dia tonga any amin’ny lavaka famorian-drano ireny, nefa tsy mahita rano ka miverina mitondra siny tsy misy rano; menatra sy mangaihay izy ka misaron-doha.

⁴Noho ny fangentan’ny tany, noho ny tsy nilatsahan’ny ranonorana taminy dia menatra ny mpiasa ka misaron-doha.

⁵Ary na dia ny dieravavy any an-tsaha aza, rehefa miteraka, dia mandao ny zanany noho ny tsy fisian’ny ahi-maitso.

⁶Ary mijanona eny an-tendrombohitra mangadihady ny borikidia, mihanahana maniry ny rivotra toy ny amboadia izy; jambena ny masony noho ny tsy fisian’ny ahitra.

⁷TOMPO ô, na dia miampanga anay aza ny helokay dia miasà ihany Ianao noho ny anaranao; fa be ny fikomianay; taminao no nanotanay.

⁸Ry fanantenan’ny Israely ô, mpamonjy azy amin’ny andro fahoriana! Nahoana Ianao no dia toy ny vahiny amin’ny tany ary toy ny mpandeha izay manorin-day handry indray alina monja?

⁹Nahoana Ianao no dia toy ny olona ankona ary toy ny lehilahy mahery tsy mahavonjy? Nefa mbola ato aminay ihany Ianao, RY TOMPO ô, ary ny anaranao dia efa nantsoina taminay; aza dia mandao anay.

¹⁰Izao no lazain’NY TOMPO amin’ity firenena ity: Tiany ny mirenireny ka tsy mahajanona ny tongony; tsy sitraky NY TOMPO izy. Ankehitriny dia tsaroany ny helony ary valìny ny fahotany.

¹¹Dia hoy NY TOMPO tamiko: Aza mivavaka ho an’ity firenena ity hahasoa azy.

¹²Fa na dia mifady hanina aza izy dia tsy hihaino ny fitarainany Aho; ary na dia manolotra fanatitra dorana manontolo sy fanatitra avy amin’ny zavamaniry aza izy dia tsy hankasitraka azy Aho, fa haripako amin’ny sabatra sy ny mosary ary ny areti-mandringana izy.

¹³Dia hoy aho hoe: Indrisy, RY TOMPO Andriamanitra ô! Indreo ny mpaminany miteny aminy hoe: Tsy hiharan’ny sabatra ianareo ary tsy ho mosarena; fa homeko fiadanana maharitra eto amin’ity toerana ity ianareo.

¹⁴Dia hoy NY TOMPO tamiko: Ireo mpaminany ireo dia maminany lainga amin’ny anarako; tsy naniraka azy Aho, na nandidy azy, na niteny taminy; fa fahitana mandainga sy faminaniana tsy marina ary tsinontsinona sy fitaky ny fony no aminaniany aminareo.

¹⁵Koa izao no lazain’NY TOMPO ny amin’ireo mpaminany izay maminany amin’ny anarako ireo, nefa tsy nirahiko akory, ary milaza fa tsy hisy sabatra sy mosary eto amin’ity tany ity: Ny sabatra sy ny mosary indrindra no handringanana ireo mpaminany ireo.

¹⁶Ary ny firenena izay aminanian’ireo koa dia hiely eny an-dalamben’i Jerosalema noho ny mosary sy ny sabatra ny fatiny ka tsy hisy mpandevina ireny, na ny tenany na ny vadiny na ny zanany lahy na ny zanany vavy; haidiko ao aminy ny faharatsiany.

¹⁷Koa lazao aminy izao teny izao: Hijononoka andro aman’alina ny ranomasoko ka tsy hitsahatra; fa ny oloko, zanakavavy virijiny, dia naratra mafy tokoa tamin’ny kapoka tena maharary.

¹⁸Raha mankany an-tsaha aho dia indreny ny matin-tsabatra! Ary raha miditra ao an-tanàna kosa aho dia indreo ny anan’ny mosary! Eny, ny mpaminany sy ny mpisorona dia mandeha mirenireny manerana ny tany ka tsy mahalala na inona na inona.

¹⁹Efa narianao tokoa va i Joda? Efa naharikoriko ny fanahinao va i Ziona*? Nahoana no dia mikapoka anay Ianao ka tsy mety sitrana izahay? Nanantena fiadanana izahay, kanjo tsy nahita soa; ary niandry andro fanasitranana, nefa indro fampitahorana.

²⁰TOMPO ô, tsaroanay ny faharatsianay sy ny heloky ny razanay fa efa nanota Taminao izahay.

²¹Noho ny amin’ny anaranao dia aza arianao izahay; aza atao ho tsinontsinona ny sezafiandrianan’ny voninahitrao; tsarovy ka aza tsoahanao ny fanekenao taminay.

²²Mba misy mahalatsaka ranonorana va ireny sampin’ny Jentilisa* ireny? Na koa mahay mandatsaka ranonorana mivatravatra va ny lanitra? Fa tsy Ianao ihany va no Izy, RY TOMPO Andriamanitray ô? Koa manantena Anao izahay, satria Ianao no nanao ireo zavatra rehetra ireo.