Read La Bible en Malgache Jeremia 16 Bible Online

Jeremia 16 - La Bible en Malgache bible

Jeremia 16

¹Ary tonga tamiko ny tenin’NY TOMPO hoe:

²Aza manambady ianao, ary aoka tsy hanana zanakalahy na zanakavavy amin’ity tany ity.

³Fa izao no lazain’NY TOMPO ny amin’ny zanakalahy sy ny zanakavavy izay teraka amin’ity tany ity sy ny amin’ny reniny izay niteraka azy ary ny amin’ny rainy izay niteraka azy amin’ity tany ity koa:

⁴Ho fatin’ny aretina izy, nefa tsy hisaonana na halevina fa ho zezika eny ambonin’ny tany; ary ho lanin-tsabatra sy mosary izy ka ho fihinan’ny voromanidina sy ny bibidia ny fatiny.

⁵Fa izao no lazain’NY TOMPO: Aza miditra amin’ny trano misy fisaonana ary aza misaona na mitsapa alahelo azy; fa efa nesoriko tsy ho amin’ity firenena ity ny fiadanako, hoy NY TOMPO, dia ny famindrampo sy ny fiantrana.

⁶Ho faty na ny lehibe na ny kely amin’ity tany ity; samy tsy halevina na hisaonana izy, tsy hitetehan’ny sasany tena, na hihetezany volo koa

⁷Ary tsy hisy hamahan-kanina azy ao amin’ny fisaonany mba hampionona azy ny amin’ny maty; ary tsy hisy hampisotro azy amin’ny kapoaka fampiononana, raha maty ny rainy na ny reniny.

⁸Ary aza miditra ao amin’ny trano misy fanasana koa ianao, hiara-mitoetra aminy hihinana sy hisotro.

⁹Fa izao no lazain’Andriamanitra, Tompon’izao rehetra izao, Andriamanitry ny Israely: Indro, hatsahatro amin’ity tany ity eo imasonareo sy amin’ny andronareo ny feo mifaly sy ny feo miravoravo, dia ny feon’ny mpampakatra sy ny feon’ny ampakarina.

¹⁰Ary raha ambaranao amin’ity firenena ity izany teny rehetra izany ka hoy izy aminao: Nahoana NY TOMPO no nilaza izany loza mafy rehetra izany hamelezana anay? Fa inona no helokay? Ary inona no fahotana izay nanotanay tamin’NY TOMPO Andriamanitray?

¹¹Dia lazao aminy hoe: Noho ny nahafoizan’ny razanareo Ahy, hoy NY TOMPO, noho ny nanarahany andriamanitra hafa, noho ny nanompoany azy sy ny niankohofany teo anatrehany ary ny nahafoizany Ahy sy ny tsy nitandremany ny lalànako.

¹²Ary ny tenanareo koa dia nanao izay ratsy mihoatra noho ny razanareo. Fa e ianareo samy mandeha araka ny ditran’ny fo ratsinareo avokoa ka tsy mihaino Ahy!

¹³Dia horoahiko hiala amin’ity tany ity ianareo ho any amin’ny tany tsy fantatrareo na ny razanareo; any no hanompoanareo andriamanitra hafa andro aman’alina satria tsy hamindra fo aminareo Aho.

¹⁴Koa indro, avy ny andro, hoy NY TOMPO, izay tsy hilazana intsony hoe: Raha velona koa NY TOMPO izay nitondra ny Zanak’Israely niakatra avy tany amin’ny tany Ejipta;

¹⁵fa izao kosa: Raha velona koa NY TOMPO izay nitondra ny Zanak’Israely niakatra avy tany amin’ny tany avaratra sy avy tany amin’ny tany rehetra izay nandroahany azy; eny, hampodiko ho amin’ny tany izay nomeko ny razany izy.

¹⁶Indro, haniraka mpanarato maro Aho, hoy NY TOMPO, izay hanarato azy; ary rehefa afaka izany dia haniraka mpihaza maro Aho, izay hihaza azy any amin’ny tendrombohitra sy ny havoana rehetra ary any an-tsefatsefaky ny harambato.

¹⁷Fa ny masoko dia mijery ny alehany rehetra, tsy miafina amin’ny tavako izany, ary tsy takona amin’ny masoko ny helony.

¹⁸Alohan’izany anefa dia hovaliko avo sasaka ny helony sy ny fahotany noho ny nandotoany ny taniko, dia ny namenoany ny lovako tamin’ireo fatin’ny sampiny sy fahavetavetany ireo.

¹⁹TOMPO ô, Ianao no heriko sy fialofako ary fandosirako amin’ny andro fahoriana! Ho tonga eo aminao ny Jentilisa* avy any amin’ny faran’ny tany ka hiteny hoe: Eny tokoa, lainga no nolovan’ny razanay, dia zava-poana sady tsy misy mahasoa.

²⁰Moa mahay manao andriamanitra ho an’ny tenany va ny olona? Tsy andriamanitra ireny.

²¹Koa indro, hampahafantariko azy amin’izao indray mandeha izao, eny, hampahafantariko azy ny tanako sy ny heriko ka ho fantany fa NY TOMPO no anarako.