Read La Bible en Malgache Jeremia 17 Bible Online

Jeremia 17 - La Bible en Malgache bible

Jeremia 17

¹Ny fahotan’ny Joda dia voasoratra tamin’ny vy fanoratana sy tamin’ny diamondra fanoratana; voasoratra ao am-pony tahaka ny amin’ny vato fisaka sy eo amin’ny tandroky* ny alitarany izany,

²dia amin’izay hahatsiarovan’ny zanany ny alitarany sy ny tsangakazon-tsampin’ny Aserahany*, akaikin’ny hazo maitso, ambonin’ny vohitra avo.

³Ry tendrombohitro any an-tsaha, ny fanananao sy ny harenanao rehetra dia hatolotro ho babo, eny, na dia ny toerana fanaovanao sorona koa aza noho ny fahotana tao anatin’ny faritaninao rehetra.

⁴Avy aminao ihany no mahatonga anao hamoy ny lova izay nomeko anao; hampanompoiko ny fahavalonao any amin’ny tany izay tsy fantatrao ianao; Eny, ny afo izay narehitrareo tamin’ny fahatezerako dia hirehitra mandrakizay.

⁵Izao no lazain’NY TOMPO: Ho voaozona izay olona matoky olona sy manao ny nofo ho sandriny ka miala amin’NY TOMPO ny fony.

⁶Fa ho tahaka ny anjavidy any an-tany ngazana izy ka tsy mba hahita ny soa, na dia avy aza izany; fa honina any amin’ny tany karankaina any an-tany efitra izy, dia any amin’ny tanin-tsira izay tsy azo onenana.

⁷Hotahina izay olona matoky NY TOMPO, dia izay manana NY TOMPO ho tokiny.

⁸Fa ho toy ny hazo ambolena eo amoron-drano izy, izay mamaka eo anilan’ny rano mandeha; koa tsy matahotra na dia avy aza ny hainandro, sady ho maitso foana ny raviny; tsy hanahy izy na dia mihantona aza ny andro satria tsy hitsahatra ny famoany.

⁹Ny fo dia mamitaka mihoatra noho ny zavatra rehetra sady manana aretina tsy hay sitranina; iza moa no mahafantatra ny aminy?

¹⁰Izaho TOMPO no mpandinika ny fo sy mpamantatra ny voa, mba hanome ny olona rehetra araka ny alehany avy, dia araka ny vokatry ny asany.

¹¹Toy ny tsipoy mikotrika izay tsy atodiny, dia toy izany izay mahazo harena tsy amin’ny rariny: Hilaozan’izany eo antenantenan’androny izy; ho lasa adala no hiafarany.

¹²Sezafiandrianana be voninahitra sady avo hatramin’ny voalohany ny fitoera-masintsika.

¹³Ry TOMPO, fanantenan’ny Israely ô! Ho menatra izay rehetra mahafoy Anao ary hosoratana amin’ny vovoka izay miala Aminao satria efa nahafoy NY TOMPO, loharano velona izy.

¹⁴TOMPO ô, sitrano aho dia ho sitrana; vonjeo aho dia ho voavonjy fa Ianao no fiderako.

¹⁵Indro, ireo dia miteny amiko hoe: Aiza ny tenin’NY TOMPO? Aoka ho tanteraka izany.

¹⁶Fa tsy nihifikifika niala tsy ho mpiandry manaraka Anao aho; tsy niriko ny andro hiavian’ny loza, eny, fantatrao izany; izay nivoaka avy tamin’ny molotro dia miharihary eo anatrehanao.

¹⁷Aoka tsy ho fampatahorana ahy Ianao! Fialofako amin’ny andro fahoriana Ianao!

¹⁸Aoka ho menatra izay manenjika ahy, fa aoka kosa aho tsy mba ho menatra; aoka hivadi-po ireo, fa aoka kosa aho tsy mba hivadi-po; ataovy tonga aminy ny andro fahoriana, ary fahatorotoroana roa heny no anorotoroy azy.

¹⁹Izao no nolazain’NY TOMPO tamiko: Mandehana ka mijoroa eo amin’ny vavahadim-bahoaka, dia ilay fandehanan’ny mpanjakan’ny Joda miditra sy mivoaka, ary eo amin’ny vavahady rehetra eto Jerosalema

²⁰ka lazao amin’ny olona hoe: Henoinareo, ny tenin’NY TOMPO, ry mpanjakan’ny Joda sy ry Joda rehetra ary ianareo mponina rehetra eto Jerosalema, izay miditra amin’ireto vavahady ireto.

²¹Izao no lazain’NY TOMPO: Mitandrema ianareo ka aza mitondra entana amin’ny andro Sabata ary aza mampiditra entana amin’ny vavahadin’i Jerosalema;

²²aza mitondra entana mivoaka avy amin’ny tranonareo amin’ny andro Sabata, na manao raharaha akory; fa hamasino ny andro Sabata araka izay efa nandidiako ny razanareo.

²³Nefa tsy nihevitra izy, na nanongilana ny sofiny, fa nanamafy ny hatony mba tsy hihaino na hino anatra.

²⁴Fa raha mihaino Ahy tokoa ianareo, hoy NY TOMPO, ka tsy mampiditra entana amin’ny vavahadin’ity tanàna ity amin’ny andro Sabata ary tsy manao raharaha amin’izany andro izany,

²⁵izay mpanjaka na mpanapaka mipetraka eo amin’ny sezafiandrianan’i Davida, dia hiditra amin’ny vavahadin’ity tanàna ity mitaingina kalesy fitondra miady sy soavaly, dia izy sy ny mpanapaka, ny Joda ary ny mponina eto Jerosalema, ka honenana mandrakizay ity tanàna ity.

²⁶Ary ho avy ny olona avy amin’ny tanànan’ny Joda, ny manodidina an’i Jerosalema sy ny tanin’ny Benjamina, ny avy any Sefela sy ny tany havoana ary ny avy any Negeva ka hitondra fanatitra dorana manontolo sy fanatitra hafa alatsa-dra ary fanatitra avy amin’ny zavamaniry sy ditin-kazo mani-pofona, ary hitondra fanati-pisaorana ho ao amin’ny tranon’NY TOMPO.

²⁷Fa raha tsy mihaino Ahy kosa ianareo ka tsy manamasina ny andro Sabata, fa mitondra entana miditra amin’ny vavahadin’i Jerosalema ihany amin’ny andro Sabata, dia handrehitra afo tsy mety maty eo am-bavahadiny Aho handevonana ny tranobe eto Jerosalema.